MEEQQAT ajunngitsulioraangamik angajoqqaatik nuannaartittarpaat. Niviarsiaraappat ataataa tulluusimaassaaq allanut ima oqarsinnaalluni: “Tassa paniga!” Nukappiaraappallu ataataa tulluusimaarluni ima oqassaaq: “Tassa ernera!”

Jiisusi Ataatami nuannarisaanik iliortuaannarpoq. Taamaattuminguna Ataataata tulluusimaarutigigaa. Eqqaamaviuk ullut ilaanni Jiisusip ajoqersukkani pingasut ilagimmagit Jehova qanoq iliornersoq? — Qilammiit oqaluppoq ima oqarluni: “Tassa ernera asasara nuannarisara.” — Matthæusi 17:5.

Jiisusip nuannariuaannarpaa Ataatami iluarisaanik iliornissani. Sooq taamaassoraajuk? — Taamaappoq Ataatani asagamiuk. Arlaannik iliuusererusunngisamik iliuuseqartitaaneq sapernarsinnaasarpoq. Kisiannili nammineq kajumissutsimik iliuuseqaraanni ajornannginnerujussuusarpoq. Kajumissuseqarneq qanoq paasisariaqarami? — Tassa imaappoq iliuuseqarusulluni iliuuseqarneq.

Jiisusi maanga nunarsuarmukanngikkallaramili kajumissuseqarluni Ataatami peqqusai tamaasa iliuuserisarpai. Ataatanimi, Jehova Guuti, asavaa. Jiisusi qilammi Ataatani ilagalugu nuanningaartumik najugaqarsimavoq. Guutilli ernini immikkut ittumik iliuuseqartikkusulerpaa, Jiisusillu Ataatami iliuusereqqusaa naammassissaguniuk qilak qimattariaqarpaa. Maani nunarsuarmi naalungiarsuttut inunngortariaqarpoq. Jehovammi tamanna kissaatigaa, Jiisusi aamma piumavoq.

Jiisusili maani nunarsuarmi inunngussaguni anaanaqartariaqarpoq. Kina anaanagilerneraa nalunngiliuk? — Niviarsiaq Mariamik atilik anaanagilerpaa. Jehovap inngili Gabrielimik atilik qilammiit  aallartippaa Maria oqaluttuuteqqullugu. Gabrielip oqaluttuuppaa nukappiaqqamik ernertaassasoq, nukappiararlu Jiisusimik ateqassasoq. Taavami kina nukappiaqqamut ataataassagami? — Inngili oqarpoq Jehova Guuti Ataataassasoq. Taamaammat Jiisusi Guutip erneranik taaneqartassaaq.

Mariamita qanoq oqarpa? — Isumaqarpit imatut oqartoq: “Uanga Jiisusimut anaanaarusunngilanga”? Naamik, kajumissuseqarpoq Guutip piumasaanik iliuuseqarnissaminut. Qanormi Guutip ernera qilammiittoq maani nunarsuarmi naalungiarsuttut inunngorsinnaagami? Meeqqat allat inunngortarnerattut inunngorsimanerpa? Nalunngiliuk? —

Taamani Guutip ataataq anaanarlu siulliit pinngortikkamigit, tassa Adami Evalu, pinngortippai immikkut ittumik nuannersumik marluusinnaanngortillugit. Taamatut marlooreersimagaangata arnap naavata iluani meerannguaq ineriartulersinnaasarpoq. Amerlasuut oqartarput tupinnartuliaasoq. Taamaapporlu.

Massakkulli Guuti suli tupinnarnerusumik iliuuseqarpoq. Ernermi inuunera qilammiit Mariap naavanut nuuppaa. Guuti siornatigut taamaaliunngisaannarsimavoq, kingornalu taamaalioqqissimanani. Tupinnartuliap tamatuma pereerneratigut Mariap naavata iluani Jiisusi ineriartulerpoq meeraaqqat allat anaanamik naavata iluani ineriartortarnerattut. Marialu katippoq angummut Josefimik atilimmut.

 Jiisusi inunngungajalersoq Maria Josefilu illoqarfimmi Betlehemimiipput. Illoqarfilli inunnik ulikkaavippoq. Maria Josefilu inissaminnik nassaanngitsoorput, allatullu ajornarmat nersutaasivimmiiginnartariaqarput. Tassani Maria meerartaarpoq, Jiisusilu nersutaatit nerisarfiannut ilivaat, soorlu uani takusinnaagit. Nersutaatit nerisarfiannut nersussuit imaluunniit uumasut allat nerisassaat ilineqartarput.

Unnuk taanna Jiisusi inunngormat pissanganartorpassuarnik pisoqarpoq. Betlehemip eqqaani inngili savanik paarsisunut takutippoq. Oqaluttuuppai inoorlaaq Jiisusi pingaarluinnartuusoq. “Takuat,” inngili oqarpoq. ‘Tipaatsunnartumik oqaluttuutissavassi tipaatsungaarutissassinnik inuit tamarmik pissaannik: Ullumi inunnut erniuvoq annaassisoq.’ — Lukasi 2:10, 11.

 Inngilillu savanik paarsisut oqarfigai Jiisusi Betlehemimi nanisinnaagaat, nersutaatillu nerisarfianni innangasoq. Inngilerpassuillu erserput inngililu siulleq ilagalugu Guuti unnersiutigilerpaat. Ima tussiarput: ‘Naalannarsili Guuti, nunarsuarmilu eqqissineq pili inunnut Guutip nuannarisaanut!’ — Lukasi 2:12-14.

Inngilit peerummata savanik paarsisut Betlehemiliarput, tassanilu Jiisusi nassaarivaat. Josefi Marialu tusakkaminnik nuannersunik oqaluttuuppaat. Takorloorsinnaassavat Maria Jiisusimut anaananngorumasimagami qanoq nuannaartigisimassasoq, ilaa?

Kingusinnerusukkut Josefip Mariallu Jiisusi Nazaretimukaqatigaat. Tassani Jiisusi alliartorpoq.  Inersimasunngoramilu ilinniartitsisutut suliassani annertooq aallartippaa. Jehovallu ernini nunarsuarmut aallartikkamiuk tamanna eqqarsaataasa ilagisimavaat. Jiisusip Ataatani asaqigamiuk suliassaq tamanna kajumilluni suliaraa.

Jiisusili Ajoqersuisorsuartut ajoqersuilertinnani Jordanip kuussuani Johannesimit Kuisisumit kuineqarpoq. Taamanilu tupinnartumik pisoqarpoq. Jiisusi kuussuarmiit qaqilermat Jehova qilammiit tutsiuppoq oqarlunilu: “Tassa ernera asasara, nuannarisara.” (Matthæusi 3:17) Ataatavit anaanavillu oqarfigigaangatsit asallutit nuannarisarpat, ilaa? — Qularinngilarput Jiisusi aamma nuannaalersimassasoq.

Jiisusi eqqortumik iliuuseqartuaannarpoq. Imminut angisuutinneq ajorpoq. Guutiulluni oqanngisaannarpoq. Inngilip Gabrielip Maria oqarfigaa Jiisusi Guutip erneranik taaneqartarumaartoq. Jiisusilu nammineerluni oqarpoq Guutip ernerigaani. Aamma oqanngilaq Ataataminit silatunerulluni. Oqarpormi: ‘Ataataq uannit anneruvoq.’ — Johannesi 14:28.

Jiisusi qilammiikkallaramili Ataatami peqqussutai iliuuserisarpai. Angiinnarneq ajorpoq, allamillu iliuuseqarluni. Ataatani asavaa, taamaammat oqaasii tusarnaaqqissaartarpai. Nunarsuarmut pigami Ataatami oqaasii malillugit iliorpoq, piffissanilu allanut atornagu. Paasisinnaavarput Jehovap ernini nuannarimmagu.

Uaguttaaq Jehova nuannaartikkusupparput, ilaa? — Taamaaliorsinnaavugut tusarnaarneratigut, soorlu Jiisusi taamaaliorsimasoq. Jehovap Biibili aqqutigalugu oqaluffigisarpaatigut. Tusarnaartuusaassallugu allamillu upperisaqassalluni imaluunniit Biibilimi allaqqasunut akerliusumik iliussalluni eqqunngitsuliornerussaaq, ilaa? Aamma eqqaamassavat Jehova asasorujussuugutsigu nuannaarutigissagatsigu nuannarisaanik iliornissarput.