SHI bana balonga bintu biyampe, boba bebalelele basangalanga. Shi mwana mwana-mukaji nansha mwana mwana-mulume ulonga bintu biyampe, shandi usepelelanga ne kwitemba’ye ku bakwabo amba: “Uno i wami mwana.”

Yesu uloñanga nyeke bintu bisangaja Shandi. O mwanda mwine Shandi witembanga’ye. Lelo uvulukile kyālongele Shandya Yesu difuku dimo pādi Yesu na balondi bandi basatu?​—Bine, Leza wānene aye mūlu, kāibasapwila’mba: “Uno i wami Mwana o nsenswe, untōkele mutyima.”​—Mateo 17:5.

Yesu usepelelanga nyeke kulonga bintu bisangaja Shandi. Le uyukile mwanda waka ulonga namino? Mwanda uswele Shandi bya binebine. Shi muntu ulonga bintu na kuningilwa, bikamumwekela bu bikomo. Ino shi aye mwine usakile kwibilonga na mutyima tō, bikekala bipēla. Lelo uyukile mushintulwila kulonga kintu na mutyima tō?​—Kishintulula kusaka bya binebine kulonga kintu kampanda.

Nansha ke kumeso kwa Yesu kwiya pano pa ntanda, wādi usangela kulonga kintu kyonso kyādi kimusakila Shandi kulonga. Mwanda aye uswele Shandi, Yehova Leza. Yesu wādi na kitenta kitendelwa momwa mūlu pamo na Shandi. Ino Leza wādi na mwingilo wa pa bula wa kupa Yesu. Pa kusaka kwingila uno mwingilo, Yesu wādi ufwaninwe kutaluka momwa mūlu. Wādi wa kubutulwa bu kana kalukeke pano panshi. Yesu wāsakile kwingila uno mwingilo mwanda Yehova wādi usaka engile’o.

Pa kusaka amba Yesu abutulwe bu mwana walukeke pano pa ntanda, byādi bilomba ekale na inandi. Lelo uyukile i ani wāikele ke inandi?​—Dijina dyandi i Madia. Yehova wātumine mwikeulu wandi Ngabudyele kutamba mūlu aye kwisamba na Madia. Ngabudyele wāmusapwila amba ukabutula mwana mwana-mulume. Mwana’ye wādi  ufwaninwe kupebwa dijina dya bu Yesu. Lelo shandya mwana wādi wa kwikala ani?​—Mwikeulu wānene amba Shandi ukekala Yehova Leza. O mwanda mwine Yesu wādi wa kwitwa bu Mwanā Leza.

Molangila, Madia wēivwene namani?​—Lelo wāpelele amba: “Ami nkisenswepo kwikala inandya Yesu”? Ehe, Madia wādi usepelele kulonga kyādi kisaka Leza. Ino le Mwanā Leza wa momwa mūlu wādi wa kubutulwa bu kana kalukeke namani pano pa ntanda? Le kubutulwa kwa Yesu kwādi kwishile namani na kubutulwa kwa bana bakwabo bonso? Lelo uyukile kino?​—

Eyo, Leza wālongele bambutwile betu babajinji, ba Adama ne Eva, mu muswelo obakokeja kusambakena pamo mu dishinda dimo dya kutendelwa. Kupwa, mwana wādi wa kushilula kukula munda mwa inandi. Bantu banenanga amba bine kino i kingelengele! Mona amba nobe uketabija amba i amo.

Pano napo kadi Leza wālongele kingelengele kitulumukwa mpata. Wāyete būmi bwa wandi Mwana momwa mūlu kupwa wātundulwila’bo munda mwa Madia. Kashā, Leza wādi kalongele kino kintu, ne kupwa papo kālongele’kyo monka. Kino kingelengele pa kulongeka, Yesu wāshilula kukoma munda mwa Madia pamo’nka mukomenanga bana bakwabo munda mwa bainabo. Kupwa, Yosefa wātundaila Madia.

Kitatyi kya Yesu kubutulwa pa kubwana, Madia ne Yosefa bāendele mu kibundi kya Betelema. Ino mwādi muyule bantu bā. Kemwādipo nansha kyumba kimo kya kufikila’mo ba Madia ne Yosefa,  o mwanda mwine bākashikete mu kipombo kya banyema. Mwine’mwa mo mwābutwidile Madia, ebiya Yesu wātūlwa mu kidīlo kya banyema, enka na mowikimwena pano’pa. Kidīlo i kyaba kyelelwanga’mo bañombe ne banyema bakwabo byakudya.

Mu bufuku bwābutwilwe Yesu mwālongekele bintu bileta nsangaji. Mwikeulu wāmwekele bakumbi bamo kubwipi na Betelema. Wēbasapwila amba Yesu i muntu wa mvubu mpata. Mwikeulu wānena’mba: ‘Talai’po byonemuletela myanda miyampe ya kusepelela kukata kwa bantu bonso. Dyalelo dino’di kubemubutwilwa yewa ukapandija bantu.’​—Luka 2:10, 11.

Mwikeulu wāsapwila bakumbi amba bakatana Yesu mu Betelema, ulēle mu kidīlo. Penepo lubilo lonka bamwikeulu bakwabo ba mūlu bēlunga pamo na mwikeulu mubajinji’wa kebatumbija Leza.  “Leza atumbijibwe ntumbo,” bo bamwikeulu bemba’bo, “ne pano panshi napo ndoe ikale ku bantu bonso bamusangaja.”​—Luka 2:12-14, Myanda Miyampe ku Bonso.

Bamwikeulu pa kutaluka, bakumbi bāenda ku Betelema, bātana Yesu. Abo pa kufika’ko, bāsapwila ba Yosefa ne Madia bintu byonso biyampe byobāivwene. Langa’po nsangaji yāikele na Madia pa mwanda wa kwitabija kwaāitabije kwikala inandya Yesu!

Mwenda mafuku, ba Yosefa ne Madia bāenda na Yesu ku kibundi kya Nazala. Ye ako kwātamine Yesu. Aye pa kutama, wāshilula mwingilo wandi mukatampe wa kufundija. Uno wādi umo wa mu mingilo yādi isaka Yehova Leza wandi Mwana engile’yo pano pa ntanda. Yesu wādi usangedile  kwingila uno mwingilo mwanda Yesu wādi uswele mpata Shandi wa mūlu.

Kumeso kwa Yesu kushilula uno mwingilo wa bu Mufundiji Mukatampe, wābatyijibwe bidi mu Munonga wa Yodano na Yoano Mubatyiji. Kupwa kwālongeka bine kintu kimo kitulumukwa! Yesu pa kutamba mu mema, Yehova wānena aye mūlu amba: ‘Uno i wami Mwana wa kuswedibwa o ntōkelwe pa mutyima.’ (Mateo 3:17) Mwene nobe wivwananga nsangaji kitatyi kikusapwilanga bambutwile bobe amba bakuswele?​—Tukulupile amba ne Yesu mwine nandi wāivwene nsangaji.

Yesu wādi ulonga nyeke bintu byoloke. Kādipo wilangila bikwabo aye koku wikele muswelo ungi. Kādipo usapwila bantu amba aye ye Leza mwine. Mwikeulu Ngabudyele wālombwele Madia amba Yesu uketwa bu Mwanā Leza. Yesu aye mwine wānene amba ndi Mwanā Leza. Kadi kādipo usapwila bantu amba aye uyukile bintu bivule kupita Shandi. Wānene amba: “Tata untabukile bukata.”​—Yoano 14:28.

Nansha ke mūlu mwine, Shandya Yesu shi wamupe mwingilo wa kwingila, Yesu wādi wingila’o. Kādipo unena’mba nsa kwingila’o, ino wakolama kalonga kintu kingi. Aye wādi uswele Shandi. O mwanda mwine wādi wivwana binena Shandi. Ebiya pāile Yesu pano pa ntanda, wādi ulonga byobya byāmutumīne Shandi wa mūlu kulonga. Kādipo ujimija kitatyi kyandi mu kulonga kintu kingi. Bine, i kimweke patōka amba Yehova usangelanga wandi Mwana!

Netu tusakanga kusangaja Yehova, mwene i amo?​—Nabya tulombolei amba tutejanga Leza binebine, mwādi mumutejeja Yesu. Leza wisambanga netu kupityila mu Bible. Ke biyampepo kulanga amba tutejanga Leza koku kadi twitabija ne kulonga bintu byampikwa kukwatañana na Bible, mwene i amo?​—Kadi vuluka amba, tukekala na dyese dya kusangaja Yehova enka shi tumuswele binebine.