PADI bana benza malu mimpe, ba ndeji babu badi basanka. Padi muana wa bakaji wenza bualu buimpe, tatuende udi udisua ne wambila bakuabu ne: “Eu mmuananyi wa bakaji.” Anyi padi muana wa balume wenza bualu buimpe, tatu udi umvua disanka dia kuamba ne: “Eu mmuananyi wa balume.”

Yezu utu wenza misangu yonso malu adi asankisha Tatuende. Nunku Tatuende utu udisua bua bualu buende. Udi muvuluke tshivua Tatuende wa Yezu muenze dikuabu dituku pavua Yezu muikale ne bayidi bende basatu anyi?​— Dîyi dia Nzambi diakafumina mu diulu diamba ne: ‘Eu udi Muananyi munanga, yeye udi unsankisha bimpe.’​—Matayo 17:5.

Yezu utu anu ne disanka dia kuenza malu adi asankisha Tatuende. Udi mumanye ne: mbua tshinyi anyi? Bualu mmunange Tatuende bikole. Padi muntu wenza malu anu bualu badi bamuenzejawu ku bukole, bidi bimueneka bimukolela bua kuenza. Kadi padiye wenza ne disua diende dionso, bidi bilua bipepele. Udi mumanye tshidi kuenza bualu ne disua dionso kabiyi bia batuenzeja ku bukole kumvuija anyi?​— Kudi kumvuija kuanyisha bua kuenza bualu kampanda ne muoyo webe mujima.

Nansha kumpala kua Yezu kuluaye panu pa buloba, uvua witaba bua kuenza tshionso tshivua Tatuende umulomba bua kuenza. Uvua wenza nanku bualu mmunange Tatuende Yehowa Nzambi. Yezu uvua ne muaba mulenga menemene mu diulu ne Tatuende. Kadi Nzambi uvua ne mudimu wa mushinga munene wa dikema wa kupesha Yezu. Bua kuenza mudimu au, Yezu uvua ne bua kumuka mu diulu. Uvua ne bua kuledibua panu pa buloba anu bu mutu muana wa mu maboko uledibua. Yezu uvua muitabe bua kuledibua panu pa buloba bualu Yehowa uvua musue bua yeye kuenza nanku.

Bua Yezu kuledibuaye panu pa buloba, bivua bikengela bua ikale ne wende mamuende. Udi mumanye uvua mamuende wa Yezu anyi?​— Dîna diende divua Mariya. Yehowa wakatuma muanjelu wende Gabriele  (anyi Gabaliele) ufumina mu diulu bua kuyikilaye ne Mariya. Gabriele wakamuambila ne: nealele muana wa balume. Bavua ne bua kuinyika muana au ne: Yezu. Tatuende wa muana uvua ne bua kuikala nganyi?​— Muanjelo wakamba ne: Tatuende wa muana uvua ne bua kuikala Yehowa Nzambi. Ke bualu kayi bavua ne bua kubikila Yezu ne: Muana wa Nzambi.

Udi wela meji ne: Mariya wakumvua munyi?​— Wakambaku ne: “Tshiena musue kuikala mamuende wa Yezu” anyi? Tòo, Mariya uvua muitabe bua kuenza muvua Nzambi musue. Kadi mmunyi muvua Muana wa Nzambi muikale mu diulu mua kulua kuledibua bu muana mutoke panu pa buloba apa? Mmunyi muvua kuledibua kua Yezu kushilangane ne kua bana bakuabu bonso? Udi mumanye anyi?​—

Nzambi uvua mufuke baledi betu ba kumpala, Adama ne Eva, bua buobu kuikala bamanyangana bu mulume ne mukajende. Pashishe, Eva uvua mua kuimita difu dia muana, ne muana eu kutuadija kukola munda mua mamuende. Bantu batu bamba ne: bualu ebu ntshishima! Ndi mumanye ne: nansha wewe pebe newitabe tshitubu bamba etshi.

Mpindieu Nzambi wakenza bualu buvua buobu tshishima tshia dikema. Wakangata muoyo wa Muanende uvua mu diulu e kuubueja munda mua Mariya. Nzambi kavua muanji kuenza bualu bua nunku, ne katshia anu pine apu katu mubuenze kabidi to. Bua tshishima atshi, Yezu wakabanga kukola munda mua Mariya anu bu mutu bana bakuabu bakola munda mua bamamuabu. Pashishe, Mariya bakamusela kudi Yosefe.

Pakakumbana tshikondo tshia Yezu kuledibuaye, Mariya ne Yosefe bavua mu luendu ku Beteleheme. Kadi bantu bavuaku bapite bungi.  Kakuvua nansha nzubu umuepele uvua Mariya ne Yosefe mua kuanji kusombela to, nanku bakaya kusomba muaba uvuabu balamina nyama. Mariya wakalelela muaba au, ne bakateka Yezu mu tshidilu tshia nyama, anu muudi mumone mu tshimfuanyi etshi. Tshidilu tshia nyama ntshintu tshidibu belela ngombe ne nyama mikuabu biakudia bua kudiayi.

Malu a dikema akenzeka butuku buvua Yezu muledibue. Muanjelu mukuabu wakamuenekela balami ba mikoko pabuipi ne Beteleheme. Wakabambila ne: Yezu uvua muntu munene. Muanjelu au wakamba ne: ‘Monayi! Ndi nnumanyisha lumu luimpe luasankisha bantu. Lelu’eu kudi muntu udi muledibue wasungila bantu.’​—Luka 2:10, 11.

Muanjelu wakambila balami ba mikoko ne: nebasangane Yezu ku Beteleheme muladika mu tshidilu tshia nyama. Katantshi aka, banjelu bakuabu ba mu diulu bakadisangisha kudi muanjelu wa kumpala eu bua kutumbisha Nzambi. Banjelu bavua bimba ne: ‘Butumbi buikale  kudi Nzambi, ditalala dikale panshi pa buloba munkatshi mua bantu badi basankisha Nzambi.’​—Luka 2:12-14.

Pakaya banjelu, balami ba mikoko bakaya ku Beteleheme e kumonabu Yezu. Kuine aku bakambila Yosefe ne Mariya malu onso mimpe avuabu bumvue. Udi mua kutshinka bungi bua disanka divua Mariya nadi bua muvuaye muitabe bua kulua mamuende wa Yezu anyi?

Pashishe, Yosefe ne Mariya bakaya ne Yezu ku musoko wa Nazaleta. Ku Nazaleta ke kuvua Yezu mukolele. Pakakolaye, wakabanga mudimu wende munene wa dilongesha bantu. Etshi tshivua tshitupa tshia mudimu uvua Yehowa musue bua Muanende kuenzaye panu pa buloba. Yezu uvua muanyishe bua kuenza mudimu au bualu yeye uvua munange Tatuende wa mu diulu bikole menemene.

 Kumpala kua Mulongeshi Munene Yezu kutuadijaye mudimu wende, Yone Mubatiji wakamutambuisha mu musulu wa Yadene. Pashishe bualu bua dikema buakenzeka! Pavua Yezu ujuka mu mâyi apu, Yehowa wakakula dîyi diende difumina mu diulu, e kuamba ne: “Eu udi Muana wanyi munanga, yeye udi unsankisha bimpe.” (Matayo 3:17) Kutuku umvua disanka padi baledi bebe bakuambila ne: mbakunange anyi?​— Tudi bajadike ne: nansha Yezu wakumvua pende disanka.

Yezu uvua misangu yonso wenza malu mimpe. Kavuaku muleje kasangu nansha kamue ne: yeye uvua muntu kampanda pine apu kayi mene muntu au to. Kavua muambile bantu ne: yeye uvua Nzambi to. Muanjelu Gabriele uvua muambile Mariya ne: nebabikile Yezu ne: Muana wa Nzambi. Yezu nkayende wakamba ne: uvua Muana wa Nzambi. Kakambila bantu ne: uvua mumanye malu a bungi kupita Tatuende to. Kadi wakamba ne: “Tatu udi muntambe meme.”​—Yone 14:28.

Nansha mu diulu, pavua Tatuende wa Yezu mumupeshe mudimu wa kuenza, Yezu wakawenza. Kakamba ne: neenze kadi ulua kuenza bikuabu to. Uvua munange Tatuende. Nunku uvua uteleja tshivua Tatuende wamba. Pashishe pakalua Yezu pa buloba, wakenza mudimu uvua Tatuende wa mu diulu mumutume bua kulua kuenza. Kakajimija dîba wenda wenza malu makuabu to. Ke bualu kayi Yehowa udi ne disanka bua bualu bua Muanende eu!

Tuetu petu tudi basue kusankisha Yehowa, ki mmuomu anyi?​— Nunku tudi ne bua kuleja ne: tudi bushuwa tuteleja Nzambi anu bu muvua Yezu mumuteleje. Nzambi udi wakula netu mu Bible. Kabiakuikala bimpe tuetu tuamba ne: tudi tuteleja Nzambi kadi eku tuitaba malu ne tuenza makuabu adi mabengangane ne a mu Bible, ki mmuomu anyi?​— Vuluka kabidi ne: netuikale ne disanka dia kuenza malu adi asankisha Yehowa bituikala bushuwa bamunange.