WARMAKUNA kasukuqllaña kaptinkuqa tayta-mamankum anchata kusikunku. Chaymi kusikuymanta ninku: “Paymi kuyakusqay churiy, paymi kuyakusqay waway”, nispa.

Jehova Diospas churin Jesucristo kasukuqllaña kaptinmi anchata kusikurqa. ¿Yuyachkankichu Jesucristo kimsan qatiqninkunawan kachkaptin hanaq pachamanta ima nimusqanta?... Nimurqam: “Paymi kuyasqay churiy, paytam kuyani hinaspapas chaskinim”, nispa (Mateo 17:5).

Jesusqa taytanpa kamachisqankunatam kusisqallaña ruwaq. ¿Imanasqa? Anchata kuyasqanraykum. Imatapas qillapakustin ruwaspaqa manam kusisqachu kasun, sunqumanta ruwaspam ichaqa kusisqa kasun.

Manaraq kay pachaman hamuchkaspanpas Jesusqa taytanpa kamachisqantam tukuy sunqunwan ruwaq. Hinaptinqa, ¿imaynatam ñuqanchikpas qatipakuchwan?... Imatapas tukuy sunquwan ruwaspam. Jesusqa hanaq pachapi allin llamkayninta saqiykuspam kay pachaman hamurqa. Chaytaqa ruwarqa taytanpa munayninta sunqumanta ruwayta munasqanraykum.

Jesusqa wakin wawakuna hinam kay pachapi nacerqa. ¿Imataq mamanpa sutin karqa?... Mariam. Jehova Diosmi angel Gabrielta kamachirqa Mariaman wawayuq kananmanta willananpaq. Chay wawapa sutinqa kanan karqa Jesusmi. Hinaptinqa, ¿pitaq taytanqa kanman karqa?... Angelpa willakusqanman  hinaqa Jehova Diosmi. Chaymi Jesusqa Jehova Diospa churin karqa.

¿Ima nirqataq Mariaqa?... ¿Ninmanchu karqa: “Jesuspa maman kaytaqa manam munanichu”, nispa? Manam, Mariaqa sunqumantam kasukurqa. Ichaqa, ¿imaynatataq Jesusqa hanaq pachamanta kay pachapi rikurirurqa? ¿Imaynatataq Mariaqa qariwan mana puñuchkaspanqa wiksayakururqa? ¿Yachanki?...

¿Imaynatataq wawakuna rikurinku? Warmiwan qari puñuptinkum warmipa wiksanpi wawa rikurin. Chaynam karqa Adanwan Eva unanchasqa kasqankumantapacha. Chaymi wawakunapa nacesqanqa ancha kusikuypaq.

Jesuspa nacesqanmi ichaqa mana chaynachu karqa. Diosqa Maria manaraq Joseywan casarakuchkaptinmi Jesuspa kawsakuyninta Mariapa wiksanman churaykurqa. Chayqa wamaqmi karqa. Chaynapiñam Jesusqa wakin wawakuna hina Mariapa wiksanpi sulluchallamanta wiñarqa.

Belen llaqtaman Joseywan Maria risqankupim Mariapaqqa unqukunan punchaw chayaramurqa. Hinaptinmi samapakunankupaq wasita mana tarispanku uywakunapa puñunan wasimanña rirqaku. Chaypim Mariaqa Jesusta wachakururqa.  Chaymi wawa naceruptin kay dibujopi qawasqaykiman hina uywakunaman qarana artesapi churaykurqa.

Jesuspa nacesqan tutapim Belen llaqtapi michiqkunaman angel rikuriykurqa. Hinaspam allin riqsisqa Jesus kananmanta willaspan nirqa: ‘Ama manchakuychikchu, llapallan runakuna kusikunanpaq sumaq willakuytam willasqaykichik, kunanmi Davidpa llaqtanpi nacerun salvasuqnikichik’, nispa (Lucas 2:10, 11).

Chay angelqa willarqataqmi Belen llaqtapi Jesusta artesapi siriykachisqata tarinankumantapas. Hinaptillanmi hanaq pachapi wakin angelkunapas chay angelwan Diosta hatunchaspa nirqaku: “Diosyá hanaq pachapi hatunchasqa kachun, kay  pachapipas Diospa kuyapayasqan runakunapaqyá hawkayay kachun”, nispanku (Lucas 2:12-14).

Angelkuna chinkaruptinñataqmi michiqkunaqa Belen llaqtaman rispanku chay angelkunapa nisqanman hina Jesusta tarirurqaku. Hinaspam Joseymanwan Mariaman willakurqaku angelkuna rikuriykuspa ima nisqanmanta. Mariaqa maynataya kusikurqa Jesuspa maman kasqanwanqa ¿aw?

Chaymantam Joseywan Mariaqa Nazaret llaqtamanña Jesusta pusaspanku chaypi uywarqaku. Jesusñataqmi wiñaruspan Diospa munaynin ruwayta  qallaykurqa. Jesusqa Jehova Dios taytanta kuyasqanraykum kamachisqankunataqa sunqumanta kasukurqa.

Ichaqa manaraq taytanpa munayninta ruwayta qallarichkaspanmi Jordan mayupi bautizaq Juanwan bautizachikurqa. Hinaptinmi yaku ukumanta sayariykuptillan hanaq pachamanta Jehova Dios nimurqa: “Paymi churiy, paytam kuyani hinaspapas chaskinim”, nispa (Mateo 3:17). Taytayki kuyasuptikiqa kusikunkim ¿aw?... Chaynachá Jesuspas kusikurqa.

Jesusqa allin kaqkunallatam ruwarqa. Payqa manam hatun tukuq runachu karqa, nitaqmi haykallapipas Dios kasqantaqa nirqachu. Angel Gabrielpa nisqanpi hinam payqa Diospa churinwan sutichasqa karqa. Chaymi paymantapas aswan yachayniyuq taytan kasqanta riqsikuspan nirqa: “Taytayqariki ñuqamantaqa aswan atiyniyuqmi”, nispa (Juan 14:28).

Hanaq pachapi kaspanpas taytanta kuyasqanraykum kamachisqanta ruwarqa. Chaymi kay pachapi kaspanpas taytanpa nisqallanta ruwarqa, manam kikinpa munaynintachu. Chayraykuchá Jehova Diosqa churin Jesusmanta anchata kusikurqa.

Ñuqanchikpas munanchikmi Jehova Dios kusichiyta ¿aw?... Chaynaqa Jesus hinam Diospa imapas kamachiwasqanchikkunata sunqumanta kasukunanchik. Chay kamachikuykunaqa bibliapim kachkan. Ichaqa kasukunam, manam yanqallachu kasukuq tukunanchik. Icha ¿ima niwaqtaq?... Amataq qunqaychu sunqumantapuni Jehova Diosta kuyaspanchikqa kusisqa kananchikmanta.