TAYTA-MAMAKUNAQA anchatan kusikunku wawanku allinta portakuqtin. Wawanku imatapas allinta ruwaqtinmi kusikuywan jujkunaman willanku: “¡Kaymi wawayqa!”, nispa.

Jesuspas papanta kusichinanpaq jinan imatapas ruwan, chaymi papanqa Jesusmanta orgulloso sientekun. ¿Yuyashankichu Jesús kinsa amigonkunawan orqopi kashaqtinku Diospa nimusqanta?... Yuyarisun. Diosmi niran: “Kaymi munakusqay Churiyqa, payqa sonqoypaq jinan”, nispa (Mateo 17:5).

¿Imaraykun Jesús Jehová Diosta kusichinanpaq jina imatapas ruwan? Anchata munakusqanrayku. Obligasqa jinalla imatapas ruwanchis chayqa, manan kusisqachu ruwanchis. Ichaqa munakuywan imatapas ruwanchis chayqa kusisqan ruwanchis ¿riki?

Jesusqa janaq pachapi kashasparaqmi Jehová Diospa tukuy kamachisqanta ruwaran. Ichaqa, ¿obligasqa jinachu ruwaran?... Manan. Jesusqa anchatan Diosta munakuran, chaymi kusisqa sonqowan tukuy nisqanta ruwaran. Jesús janaq pachapi kashaqtinqa ancha importante angelmi karan. Ichaqa Diosmi juj importante ruwayta kamachiran. Niranmi kay allpaman jamuspa runa jina nacenanta. ¿Kasukuranchu Jesús? Arí, kasukuranmi.

Jesusqa llapa wawakuna jinan naceran. ¿Yachankichu mamanpa sutinta?... Arí, sutinqa Marian. Diosmi Gabriel sutiyoq angelta kachamuran. Chay angelmi Mariata niran: ‘Onqoqmi  rijurinki, jinan juj qhari wawata onqokunki, paytan sutichanki “Jesús”’, nispa. Ichaqa, ¿pin karan Jesuspa papan?... Arí, angelmi willaran Jehová Dios kasqanta. Chaymi Jesusqa “Diospa wawan” nisqa karan.

Ichaqa, ¿ima niranmi María angelta?... ¿“Manan munanichu Jesuspa maman kaytaqa” nispachu niran? Manan, payqa Jehová Diostan kasukuran chaymi Jesuspa maman kapuran. Ichaqa, ¿imaynapin Jesús janaq pachapi tiyashaspa kay allpapi naceran? ¿Imaraykun Jesuspa nacesqan jujniray karan? ¿Yachankichu?...

Diosmi Adantapas Evatapas kamaran cuerponkuta munayta tupachispa wawayoq kanankupaq. Chay wawan mamanpa wijsanpi wiñan nacenankama. Chaytan runakuna ninku “milagro” nispa. Qanri, ¿juj milagrota jinachu chayta qhawarinki?

Chaymanta aswan jatun milagrotan Dios ruwaran. Wawantan janaq pachamanta Mariaq wijsanman astamuran. Diosqa manan jayk’aqpas chaytaqa ruwaranchu. Chay milagrota ruwasqanraykun Jesusqa Mariaq wijsanpi wiñaran. Chay qhepamanñan Mariaqa Josewan casarakuran.

Jesuspa nacenan p’unchay qayllaykamushaqtinmi, Mariawan Josewan Belén llaqtata viajaranku. Chay p’unchaykunapi askha runakuna chay llaqtaman viajasqankuraykun mana campo  karanchu alojakunankupaq. Chaymi Mariapas Josepas uywakunaq puñunan wasipi alojakuranku. Chaypin Jesús naceran. Chaymi uywakunaman qarananku pataman Jesusta churaykuranku, kay dibujopi rikusqayki jina.

Chay tutan admirakunapaq pasaran. Juj angelmi Belén llaqtaq camponpi oveja michiqkunaman rijuriran. Paymi willaran juj importante wawa nacesqanta. Niranmi: ‘Allin willakuykunata willasaykichis, chaywanmi llapa runakuna anchata kusikunqaku. Kunanmi juj salvaq nacepusunkichis’, nispa (Lucas 2:10, 11).

Chay angelmi nillarantaq: ‘Belén llaqtapin kashan, chaypin juj wawata tarinkichis uywa qaranapi puñushaqta’, nispa. Chayllamanmi juj angelkuna rijurimuranku, jinan llapallanku Diosta  jatuncharanku: ‘Dios jatunchasqa kachun, Diospa sumaq qhawarisqan runakunapaqtaq kay pachapi thaj kay kachun’, nispa (Lucas 2:12-14).

Angelkuna pasapuqtinmi michiqkunaqa Belén llaqtata riranku, chaypin Jesusta tariranku. Jinan Joseman Mariaman willaranku angelpa willasqanta. ¡Maytachá Mariaqa kusikuran Jesuspa maman kasqanmanta!

Qhepamanmi Josewan Mariawan Nazaret llaqtaman Jesusta aparanku, chaypin Jesusqa wiñaran. Kuraq kapuspan Jesusqa runakunaman Jehová Diosmanta yachachiran. Chayta ruwananpaqmi Diosqa  kachamuran. Jesusqa anchatan Diosta munakuran, chaymi kamachisqanta kasukuran.

Ichaqa manaraq predicayta qallarishaspan Jesusqa Jordán mayuta riran, chaypin Bautizaq Juan bautizaran. Mayumanta Jesús lloqsimushaqtinmi ancha admiranapaq sucederan. Jehová Diosmi janaq pachamanta nimuran: “Kaymi Churiyqa, paytan munakuni, payqa sonqoypaq jinan”, nispa (Mateo 3:17). ¿Imaynatan sientekunchis papanchis otaq mamanchis “munakuykin waway” niwaqtinchis?... Arí, anchatan kusikunchis. Jesuspas anchatachá kusikuran papanpa nisqanta uyarispa.

Jesusqa allin kaqllatapunin ruwaran. Payqa manan jatunchakuranchu nitaq “Diosmi kani” niranchu. Ángel Gabrielmi Mariaman willaran: ‘“Diospa churin” nisqan kanqa’, nispa. Jesuspunin willaran Diospa wawan kasqanta. Payqa manan jayk’aqpas papanmanta aswan yachaqmanchu tukuran, aswanmi niran: “Yayaqa noqamanta aswan atiyniyoqmi”, nispa (Juan 14:28).

Jesusqa janaq pachapi kashasparaqmi papanpa tukuy kamachisqanta kasukuran. Munakuranmi papanta chaymi tukuy nisqanta uyarikuran. Kay allpaman jamuspapas kamachisqantan kasukuran, manataqmi juj ruwaykunapichu tiemponta usuchiran. Chaymi Jehová Diosqa Jesuspa tukuy ruwasqanwan kusikuran.

Noqanchisri, ¿munanchischu Jehová Dios kusisqa kananta?... Chhaynaqa Jesús jinan Diospa tukuy niwasqanchista uyarinanchis. ¿Imaynatan Diosta uyarisunman? Bibliata leespan. Ichaqa, ¿allinchu kanman Bibliaq nisqanta yachashaspa mana allinkunata ruway?... Manan ¿riki? Jinaspapas kayta yuyariy: Jehová Diosta munakusun chayqa, paypa nisqantan kusisqa ruwasun.