KON an kabataan nagbubuhat hin maopay, nalilipay adton nagmamangno ha ira. Kon an usa nga bata nga lalaki o babaye nagbubuhat hin maopay, an iya amay malipayon nga nasiring ha iba: “Anak ko ini.”

Ginbubuhat pirme ni Jesus an nakakapalipay ha iya Amay. Salit an iya Amay nalilipay gud ha iya. Nahinunumdom ka ba han ginbuhat han Amay ni Jesus usa ka adlaw han kaupod ni Jesus an tulo han iya mga sumurunod?— Oo, an Dios nagyakan tikang ha langit basi sumatan hira: “Ini an akon Anak, an hinigugma, nga akon inuuyonan.”​—Mateo 17:​5, NW.

Malipayon pirme hi Jesus ha pagbuhat han mga butang nga nakakapalipay ha iya Amay. Maaram ka ba kon kay ano? Tungod kay nahigugma gud hiya ha iya Amay. Kon ginbubuhat han usa ka tawo an mga butang tungod la kay obligado hiya nga buhaton ito, baga in makuri ini. Kondi kon disidido hiya, mas masayon ito. Maaram ka ba kon ano an kahulogan han pagin disidido?— Nangangahulogan ito hin pagkaruyag gud ha pagbuhat han usa ka butang.

Bisan antes pa kumanhi ha tuna hi Jesus, disidido hiya ha pagbuhat han bisan ano nga ipabuhat ha iya han iya Amay. Tungod ini kay nahigugma hiya ha iya Amay, hi Jehova nga Dios. Hi Jesus may-ada urusahon nga urukyan ha langit upod han iya Amay. Kondi an Dios may-ada espesyal nga buruhaton nga ipapabuhat kan Jesus. Basi matuman ito nga buruhaton, kinahanglan bumaya hi Jesus ha langit. Kinahanglan matawo hiya sugad nga bata dinhi ha tuna. Disidido hi Jesus nga buhaton ini tungod kay karuyag ni Jehova nga buhaton niya ito.

Basi matawo sugad nga bata dinhi ha tuna, hi Jesus kinahanglan magkaada hin iroy. Maaram ka ba kon hin-o hiya?— Hiya hi Maria. Sinugo ni Jehova an iya anghel nga hi Gabriel tikang ha langit basi makiistorya  kan Maria. Hi Gabriel nagsumat ha iya nga manganganak hiya hin usa nga bata nga lalaki. An bata pagngangaranan nga Jesus. Ngan hin-o an magigin amay han bata?— An anghel nagsiring nga an Amay han bata amo hi Jehova nga Dios. Salit tatawagon hi Jesus nga Anak han Dios.

Ha hunahuna mo ano an inabat ni Maria mahitungod hini?— Nagsiring ba hiya, “Diri ko karuyag magin iroy ni Jesus”? Waray, andam hi Maria ha pagbuhat han karuyag han Dios. Kondi paonan-o an Anak han Dios ha langit matatawo sugad nga bata dinhi ha tuna? Paonan-o naiiba an katawo ni Jesus tikang ha katawo han ngatanan nga iba nga mga bata? Maaram ka ba?—

Ginhimo han Dios an aton siyahan nga mga ginikanan, hi Adan ngan Eva, basi magtampo hira ha urusahon nga paagi. Katapos, an usa nga bata magtitikang pagtubo ha tiyan han iya iroy. Nasiring an mga tawo nga milagro ini! Sigurado ako nga mauyon ka.

Yana an Dios nagbuhat hin mas urusahon pa gud nga milagro. Iya kinuha an kinabuhi han iya Anak tikang ha langit ngan iginbutang ito ha tiyan ni Maria. Waray pa gud ito buhata hadto han Dios, ngan waray na gud niya ito buhata tikang hadto. Sugad nga resulta hini nga milagro, nagtikang magtubo hi Jesus ha tiyan ni Maria sugad la nga an iba nga mga bata nagtutubo ha tiyan han ira mga iroy. Katapos hito, napangasawa ni Maria hi Jose.

Han inabot an panahon basi matawo hi Jesus, kinadto hi Maria ngan Jose ha siyudad han Betlehem. Kondi puno ito hin mga tawo. Waray ngani usa nga kuwarto para kan Maria ngan Jose, salit nag-ukoy hira ha lugar  diin ginmangnoan an mga hayop. Didto nanganak hi Maria, ngan iginbutang hi Jesus ha usa nga tubungan, sugad han makikita mo dinhi. An tubungan amo an lugar diin ginpapakaon an mga baka ngan iba nga mga hayop.

Makalilipay an nahitabo ha gab-i han natawo hi Jesus. Hirani ha Betlehem, usa nga anghel an nagpakita ha pipira nga mga magbarantay han mga karnero. Iya ginsumatan hira nga hi Jesus usa ka importante nga persona. An anghel nagsiring: ‘Kitaa! Akon iginpapasabot ha iyo an maopay nga sumat nga magpapalipay ha katawohan. Yana nga adlaw natawo an usa nga magluluwas han katawohan.’​—Lukas 2:​10, 11.

An anghel nagsumat ha mga magbarantay han mga karnero nga hiaagian nira hi Jesus ha Betlehem, nga nahigda ha usa nga tubungan. Katapos, tigda nga inupod an iba nga mga anghel ha langit ha siyahan nga anghel  ha pagdayaw ha Dios. ‘Himaya ha Dios,’ nagkanta an mga anghel, ‘ngan ha tuna kamurayawan ha mga tawo nga may maopay nga kaburut-on.’​—Lukas 2:12-14.

Han pagbaya han mga anghel, an mga magbarantay han mga karnero nagpakadto ha Betlehem ngan hin-agian hi Jesus. Didto ira ginsumatan hi Jose ngan Maria han ngatanan nga mag-opay nga mga butang nga ira hinbatian. Mahuhunahuna mo ba nga malipayon gud hi Maria nga disidido hiya nga magin iroy ni Jesus?

Ha urhi, gindara ni Jose ngan Maria hi Jesus ngadto ha siyudad han Nasaret. Didto nagtubo hi Jesus sugad nga bata. Han adulto na hiya, nagtikang hiya ha iya daku nga buruhaton nga pagtutdo. Bahin ini han buruhaton nga karuyag ni Jehova nga Dios nga  buhaton han iya Anak dinhi ha tuna. Disidido hi Jesus nga buhaton ito nga buruhaton tungod kay hi Jesus nahigugma gud ha iya langitnon nga Amay.

Antes tikangan ni Jesus an iya buruhaton sugad nga Bantogan nga Magturutdo, ginbawtismohan hiya ha Salog Jordan ni Juan Bawtista. Katapos, may-ada urusahon nga nahitabo! Samtang nahaw-as hi Jesus ha tubig, hi Jehova nagyakan tikang ha langit, nasiring: “Ini an akon Anak, an hinigugma, nga akon inuuyonan.” (Mateo 3:​17, NW) Diri ka ba nalilipay kon an imo mga ginikanan nagsusumat ha imo nga nahigugma hira ha imo?— Sigurado kita nga nalipay liwat hi Jesus.

Pirme ginbuhat ni Jesus an husto. Waray hiya magpakahiruhin-o nga diri man amo hiya. Waray hiya magsumat ha mga tawo nga hiya an Dios. An anghel nga hi Gabriel nagsumat kan Maria nga hi Jesus tatawagon nga Anak han Dios. Hi Jesus mismo nagsiring nga hiya an Anak han Dios. Ngan waray hiya magsiring ha mga tawo nga mas maaram hiya kay ha iya Amay. Hiya nagsiring: “An Amay darodaku ha akon.”​—Juan 14:28.

Bisan ha langit, han an Amay ni Jesus naghatag ha iya hin buruhaton, ginbuhat ito ni Jesus. Waray hiya magsiring nga bubuhaton niya ito kondi iba lugod an ginbuhat. Nahigugma hiya ha iya Amay. Salit namati hiya ha ginsiring han iya Amay. Katapos, han kinanhi hi Jesus ha tuna, iya ginbuhat an iginsugo han iya langitnon nga Amay nga pagbuhaton. Waray niya gamita an iya panahon ha pagbuhat hin iba. Diri urusahon nga hi Jehova nalilipay ha iya Anak!

Karuyag naton lipayon liwat hi Jehova, diri ba?— Niyan kinahanglan ipakita naton nga namamati gud kita ha Dios, sugad han ginbuhat ni Jesus. An Dios nakikiistorya ha aton pinaagi han Biblia. Diri magigin angayan an pagpakita nga namamati kuno ha Dios kondi katapos hito tumoo ngan magbuhat han mga butang nga nakontra ha Biblia, diri ba?— Ngan hinumdumi, magigin malipayon kita ha pagpalipay kan Jehova kon tinuod nga nahigugma kita ha iya.