Mekene 6

Atre Hamë Ini Ka Sisitria Ka Ixatua

AJANE fe kö eö troa hane xatua eö hnene la ketre atr?— Eje hi, aja së asë hi lai. Atre hnyawa hi la ewekë cili hnene la Atre Hamë Ini Ka Sisitria, celë hi kepine matre hnei nyidrëti pala hi hna thele troa xatuane la itre atr. Öni nyidrë ka hape: ‘Tha ini kö a traqa troa hetre hlu, ngo tro pe a nyi hlu.’—Mataio 20:28.

 Haawe, maine easa ajane troa nyitipune la Atre Hamë Ini Ka Sisitria, nemene la nyine tro sa kuca?— Nyipi ewekë tro sa nyi hluene la itre xa atr, me kuca la itre ewekë ka loi koi angatr. Nyipici laka, ala nyimu la ka tha ujë kö tune lai enehila. Angatre a ajane troa nyi hlue i angatre hnene la itre xan. Hna mekune tune fe hi lai hnene lo itretre drei Iesu ekö. Angatre a isa thele jëne troa atre ka hape, drei la ka tru maine ka sisitria thei angatr.

Ame ngöne la ketre drai, kola nango ce tro me Iesu hnene la itretre drei nyidrë. Traqa ju hi angatr e Kaperenauma, ketre nöje ka tha nanyi kö qa ngöne la Hneopegejë ne Galilaia; ame hnei angatre hna lö jë kowe la ketre uma. E cili, hnei Iesu hna hnyinge koi angatr ka hape: “Nemene la hnei nyipunie hna ikelikelëne e kuhu gojeny ?” Pëkö ketre e angatre ka sa, pine laka angatre hi lai a iwesitrë e kuhu gojeny, ke, kola ithepe ka tru.—Mareko 9:33, 34.

Atre hnyawa hi Iesu laka, tha ka loi kö e tro la ketre e angatr a mekune ka hape, ka tru kö angeice hune la itre xan. Haawe, tune lo hne së hna inine  ngöne lo pane mekene la itusi celë, hnei Iesu hna xome la ketre nekönatre me ami nyën e nyipi angatr, me qaja ka hape, loi e tro angatre a hni ka ipië tune la nekönatre cili. Ngo tha trotrohnine pala kö angatre la ini cili. Qa ngöne lai, qëmekene tro Iesu a mec, hnei nyidrëti hna hamëne la ketre ini ka tru tha nyine tro kö angatre a thëthëhmin. Nemene la hnei nyidrëti hna troa kuca?—

Kola lapa xötreithe la laulau hnei Iesu memine la itretre drei nyidrë, qëmekene tro angatre a xen; ene pe mejë jë hi Iesu, me una amë la ixetre i nyidrë. Ame hnei nyidrëti hna ekögölithe la gö i nyidrë hnene la ketre sine mano. Thupene lai, nyidrëti a xome jë la ketre inege, me nyi aliene hnei tim. Kola isa thele hnene la itretre drenge la ewekë hnei Iesu hna troa kuca. Hanawang, angatre a goeë Iesu a kola sa watingöneca qëmekei angatre asë, me hnea la itre lue ca i angatr. Thupene lai, nyidrëti pë hë a köle aweliwelëne jë hnene la ketre sine mano. Pane mekune ju eö la ewekë cili! Maine ce eö ju me angatr, nemene la hnei eö hna troa kuca? Tune kaa fe la aliene hni eö?—

Ame kowe la itretre dreng, tre, tha ka meköti kö e tro la Atre Hamë Ini Ka Sisitria a nyi hlue i angatre tune lai. Celë hi matre angatre a hmahma. Ketre, xele fe kö Peteru ma tro Iesu a hnea la lue ca i angeic. Ngo Iesu a qaja ju koi angeice ka hape, ame la ewekë hnei nyidrëti hna troa kuca, ke, ka sisitria catr.

Ame enehila, tha hne së hmaca kö hna majemine troa hnea la lue ca së maine lue ca i itre xan. Ngo itre ewekë lai hna majemine kuca ekö lo ijine i Iesu. Atre fe hi eö la aliene la hna majemine kuca cili?— Ame ngöne la nöje hna mele ngön hnei Iesu memine la itretre drei nyidrë, tre, ka lailai la lue buutr hna otrëne hnene la itre atr. Celë hi matre ka dro pala hi la itre iwaca i angatre qa ngöne la so ne dro ne la itre gojeny. Haawe, e hetre atr ka traqa troa iwai, thiina ka loi e troa hnea la lue ca i angeice hnene la atre ikep.

Ngo ame ngöne la ijine cili, pëkö ketre atre drei Iesu ka cile troa hnea la itre lue ca ne la itre xan. Celë hi matre cile jë Iesu troa kuca la huliwa cili. Drei la ketre ini ka sisitria hnei Iesu hna hamëne kowe la itretre drei nyidrë. Nyipi ewekë catre koi angatre troa kapa la ini cili. Ketre ini fe lai nyine tro sa xölehuje hnyawa enehila.

 Hapeu, atre fe kö eö la ini cili?— Thupene la Iesu a xome hmaca la ixetre i nyidrë me bëeke hmaca kowe la göhne i nyidrë, tre, öni nyidrëti jë hi koi angatre ka hape: “Hape u, trotrohnine kö nyipunie la hnenge hna kuca koi nyipunie ? Nyipunieti a hë ni, ka hape, Ate ini, me Joxu, nge loi la hnei nyipunie hna qaja, ke, eje hi. Maine Joxu ni me Ate ini, nge ase hë ni hnea la ite lue ca i nyipunie ; loi e tro nyipunie a itö ihne lue ca kö nyipunie.”—Ioane 13:2-14.

Kola mama e celë, laka, ame la aja ne la Atre Hamë Ini Ka Sisitria, tre, ene la troa inyihluekeu hnene la itretre dreng. Tha ajane kö nyidrë tro angatre a mele koi angatre hmekuj. Ketre, tha ajane kö nyidrë tro angatre a mekune ka hape, ka sisitria angatre hui itre xan nge angatre la nyine troa nyi hluen. Ame la hnei Iesu hna thele thei angatr, tre, ene la tro angatre a ajane troa inyihluekeu.

Ketre ini ka lolo lai, tune kaa la mekuna i eö?— Ajane fe kö eö troa nyitipune la Atre Hamë Ini Ka Sisitria, me hane nyi hluene la itre xan?— Ijiji së asë hi troa xatuane la itre xan. Aqane ujë lai ka troa amadrinë angatr. Ngo ame la ewekë ka sisitria catr, tre, ene laka easa amadrinë Iesu memine la Tretretro i nyidrë.

Pëkö ejolene e troa nyi hluene la itre xa atr. Öhne fe hi eö, nyimutre la itre ewekë nyine tro eö a kuca thatraqane la itre xan. Hanawange la ketre  ceitun, nemene la aqane tro eö a xatuane la thine i eö? Atre hnyawa hi eö laka, tru catre hnei jole i eahlo ngöne la hnepe lapa i epun. Nemene la nyine tro eö a kuca matre xatua eahlo?— Hnauëne laka tha hnyingë eahlo kö?

Maine ijij, ati peleitre jë qëmekene troa xen. Nge e ase hë xen, nyihnyawane pi la laulau. Xome jë koi hnasaanyi la itre ewekë nyine trij. Ame la nöjei huliwa nyine troa kuca, nyipi ewekë troa ixatuanekeune la itre huliwa, tui Iesu.

Hapeu, hetre trejine me eö, trahmanyi me föe, nyine tro eö a xatuan? Mekune i eö lo laka, hnei Iesu lo Atre Hamë Ini Ka Sisitria, hna hane nyi hluene lo itretre drei nyidrë. Haawe, maine tro eö a xatuane la itre trejine me eö, trahmanyi me föe, tre, eö hi lai a nyitipu Iesu. Nemene la aqane tro eö a xatua angatr?— Maine jë tro eö a ini angatre la aqane troa amë hnyawa la itre nyimo i angatre thupene la hna elone itre ej. Maine pena troa xatua angatre troa hetre hnyawa. Ketre, ijije fe tro eö a xatua angatre troa sa hnyawa  la hnei angatre hna meköl. Hapeu, hetrenyi kö la itre xa aqane tro eö a xatua angatr?— Nyipici, tro hë angatre a hnimi eö pine la itre ewekë hnei eö hna kuca koi angatr, tune la aqane hnimi Iesu hnene lo itretre drei nyidrë.

Ijije mina fe tro eö a hane nyi hluene la itre xa atr ngöne la hna ini. Maine jë troa xatuane la itre sine ce ini me eö, maine pena la atre hamë ini koi eö. Maine kola mala la itusi ne la ketre atr, hleme jë itre ej. Ketre, ijije mina fe tro eö a xatuane la atre hamë ini koi eö, e tro eö a köle la itabolo, maine nyihnyawane la ketre ewekë pena. Ixatua mina fe kowe la ketre atr, e cilaxome ju eö la qëhnelö.

Ame e itre xa ijin, easa ixelë memine la itre atr ka tha hane kö olene la ixatua hne së hna hamën. Hapeue la mekuna i ’ö, tro kö la aqane ujë cili a sewe së troa kuca pala hi la ewekë ka loi?— Ohea! Ngacama pëkö hni ne ole ne la itre atr kowe la itre ewekë ka loi hna kuca hnei Iesu, ngo ame pe, tre, tha hnei nyidrëti kö hna xele ma wai angatr.

Qa ngöne lai, tha tro pi kö sa sixele troa xatuane la itre atr. The thëthëhmine kö eö lo tulu ne lo Atre Hamë Ini Ka Sisitria ene Iesu, nge catre pi troa nyitipu nyidrë.

Hanawange la itre xa xötre ka amamane la aqane tro sa xatuane la itre xa atr, e jë la Ite Edomë 3:27, 28; Roma 15:1, 2; me Galatia 6:2.

[Iatr ne la götran 37]

Nemene la hna ikelikelëne hnene la itretre drei Iesu?

[Iatr ne la götran 39]

Nemene la ini hnei Iesu hna hamëne kowe la itretre drei nyidrë?

[Iatr ne la götran 40]

Nemene la aqane tro eö a xatuane la itre xa atr?