Kauhanyo 6

Muluti Yo Mutuna N’a Sebelezanga Batu Ba Bañwi

KANA wa tabelanga muta mutu yo muñwi a ku ezeza nto ye ñwi ye nde?— Batu ba bañwi ni bona ba tabelanga yo muñwi h’a ba ezeza nto ye ñwi ye nde. Kaufel’a luna lwa tabelanga. Muluti yo Mutuna n’a ziba cwalo, mi kamita n’a ezezanga batu ze nde. N’a ize: ‘Ni tile, isi ku t’o sebelezwa, kono kuli ni sebeleze.’—Mateu 20:28.

Kacwalo, haiba lu bata ku ba sina Muluti yo Mutuna, lu lukela ku ezañi?— Lu lukela ku sebeleza ba bañwi. Lu lukela ku ba ezeza lika ze nde. Ki niti kuli batu ba bañata ha ba ezi cwalo. Mane, buñata bwa batu kamita ba batanga kuli ba bañwi ba ba sebeleze. Nako ye ñwi, niheba balateleli ba Jesu ne ba ikutwile cwalo. Yo muñwi ni yo muñwi wa bona n’a bata ku ba yo mutuna ka ku fitisisa kamba wa butokwa ka ku fitisisa.

Zazi le liñwi, Jesu n’a li mwa musipili ni balutiwa ba hae. Ha se ba keni mwa munzi wa Kapernauma, bukaufi ni Liwate la Galilea, kaufel’a bona ba kena mwa ndu cwana. Teñi, Jesu a ba buza a li: ‘Ki lifi ze ne mu kanana mwa nzila?’ Ne ba kuzize bakeñisa kuli mwa nzila ne ba sweli ku kananisana za kuli yo mutuna ku bona ki mañi.—Mareka 9:33, 34.

 Jesu n’a ziba kuli ne ku si ka luka kuli ufi kamba ufi wa balutiwa ba hae a ikutwe kuli ki yo mutuna ka ku fitisisa. Kacwalo, sina ha ne lu itutile mwa kauhanyo ya pili ya buka ye, n’a yemisize mwanana yo munyinyani fahal’a bona mi a ba bulelela kuli ne ba lukela ku ikokobeza sina mwanana y’o. Kono ne ba si ka ituta. Kacwalo, nakonyana pili a si ka shwa, Jesu a ba luta tuto ye ne ba si ke ba libala ni kamuta. N’a ezizeñi?—

Ha ne ba sweli ku lalela hamoho, Jesu a nanuha kwa tafule mi a tubula liapalo za fahalimu. A nopa taulo, mi a itama yona mwa teka. Mi cwale a’ nga mukeke wa ku tapela teñi mi a beya mwateñi mezi. Balateleli ba hae ba lukela ku ba be ne ba komokile ka za n’a ka eza. Ha ne ba nze ba talimezi, Jesu a ya ku bona kaufela, a inama, mi a ba tapisa kwa mahutu. Ku tuha f’o, a omisa mahutu a bona ka yona taulo yeo. Nahana fela za teñi! Ku cwañi kambe n’o li teñi mwa ndu yeo? N’o ka be u ikutwile cwañi?—

Balateleli ba hae ne ba ikutwile kuli ne ku si ko ku lukile kuli Muluti yo Mutuna a ba sebeleze cwalo. Ne ba ikutwile maswabi. Mane, Pitrosi n’a bata ku hanela Jesu ku mu sebeleza ka nzila ye cwalo ya buikokobezo. Kono Jesu n’a ize ne ku li kwa butokwa kuli a eze cwalo.

Haki hañata kacenu lu tapisananga kwa mahutu. Kono ne ku eziwanga cwalo Jesu ha n’a li fa lifasi. Kana wa ziba libaka?— Libaka kikuli, mwa naha mwa n’a pila Jesu ni balateleli ba hae, batu ne ba tinanga masanda kwa mahutu. Kacwalo, ha ne ba zamayanga mwa mikwakwa ya liluli, mahutu a bona n’a talanga liluli. Ku tapisa mahutu a tezi liluli a mutu ya n’a taha mwa ndu ku t’o pota n’e li kezo ye sishemo.

Kono cwale, ha ku na ni yo mukana kwa balutiwa ba Jesu ya n’a bata ku tapisa mahutu a ba bañwi. Kacwalo, yena Jesu ka sibili a ba tapisa kwa mahutu. Ka ku eza cwalo, Jesu n’a luta balateleli ba hae tuto  ya butokwa. Ne ba tokwa ku ituta tuto yeo. Mi ni luna kacenu lu tokwa ku ituta yona tuto yeo.

Kana wa ziba yona tuto yeo?— Jesu ha s’a apezi liapalo za hae za fahalimu mi a kutela ku y’o ina kwa tafule, a talusa kuli: “Kikuli mu utwisisa se ni mi ezize? Mu ni biza Muluti ni Mulena; mi mu bulela hande, kakuli ki na. Mi cwale ha ni mi tapisize kwa mahutu, na, ni li Muluti ni Mulena, ni mina mu swanezi ku tapisana kwa mahutu.”—Joani 13:2-14.

Muluti yo Mutuna f’o n’a bonisa kuli n’a bata kuli balateleli ba hae ba n’o sebelezananga. N’a sa bati kuli ba n’o nahananga fela za bona ba nosi. N’a sa bati kuli ba ikutwe kuli ki ba butokwa hahulu kuli ba bañwi kamita ba lukela ku ba sebeleza. N’a bata kuli ba tabele ku sebeleza ba bañwi.

Kana yeo haki tuto ye nde?— Kana u ka ba sina Muluti yo Mutuna ni ku sebeleza batu ba bañwi?— Kaufel’a luna lwa kona ku ezeza ba bañwi lika. Ku eza cwalo ku ka ba tabisa. Kono sa butokwa ka ku fitisisa kikuli, lu ka tabisa Jesu ni Ndat’ahe.

Ku sebeleza ba bañwi ha ku katazi. Ha u talimisisa, u ka bona kuli  ku na ni lika ze ñata z’o kona ku ezeza ba bañwi. Cwale ki ze lipuzo: Kana ku na ni nto ye ñwi y’o kona ku ezeza bom’aho? Wa ziba kuli ba ezezanga wena ni ba mwa lubasi lika ze ñata. Kana wa kona ku ba tusa?— Ku cwañi ku ba buza?

Mwendi wa kona ku isa lico fa tafule lubasi lu si ka kalisa kale ku ca. Kamba mwendi wa kona ku zwisa mikeke fa tafule lubasi ha se lu felize ku ca. Banana ba bañwi ka zazi ba y’o yumbanga manyalala. Z’o kona ku eza kaufela, u kana u sebeleza ba bañwi, mane sina Jesu ha n’a ezize cwalo.

Kana u na ni banyani ba hao b’o kona ku sebeleza? U si libali kuli Jesu, yena Muluti yo Mutuna, mane n’a sebelelize balateleli ba hae. Ka ku sebeleza banyani ba hao, u ka likanyisa Jesu. U kona ku ba ezezañi?— Mwendi wa kona ku ba tusa ku ituta ku n’o bulukanga tubapaliso twa bona ha se ba felize  ku bapala. Kamba mwendi wa kona ku ba tusa ku tina. Kamba mwendi wa kona ku ba tusa ku yala likubo fa mumbeta wa bona. Kana ku na ni ze ñwi z’o hupula z’o kona ku ba ezeza?— Ba ka ku tabela ha u ka ba ezeza lika zeo, sina balateleli ba Jesu ha ne ba mu tabezi.

Ni kwa sikolo, wa kona ku sebeleza batu ba bañwi. Ikana ya ba b’o kena ni bona sikolo kamba bo muluti ba hao. Haiba yo muñwi a wisa libuka za hae, n’o ka eza hande ku mu tusa ku li nopa. Wa kona ku itakaleza ku takula fa bodi kamba ku ezeza bo muluti ba hao nto ye ñwi. Mane ni ku kwalulela yo muñwi munyako kuli a kene ki sebelezo ye sishemo.

Fokuñwi, lu ka fumana kuli batu ha ba na ku itumela ku luna ha lu ba sebeleza. Kana u ikutwa kuli ku sa itumela k’o ku swanela ku ku tuhelisa ku eza hande?— Kutokwa! Batu ba bañata ne ba si ka itumela Jesu ha n’a ba ezelize ze nde. Kono ku sa itebuhiwa k’o ne ku si ka mu tuhelisa ku eza hande.

Kacwalo, ni kamuta lu si ke lwa tuhela ku sebeleza batu ba bañwi. Lu hupule Muluti yo Mutuna, yena Jesu, mi kamita lu like ku latelela mutala wa hae.

U bale mañolo a mañwi a a’ bulela za ku tusa ba bañwi, Liproverbia 3:27, 28; Maroma 15:1, 2 ni Magalata 6:2.

[Siswaniso se si fa likepe 37]

Ki lika mañi ze ne ba sweli ku kanana balateleli ba Jesu?

[Siswaniso se si fa likepe 39]

Jesu n’a luta balateleli ba hae tuto mañi?

[Maswaniso a fa likepe 40]

U kona ku ezañi kuli u tuse ba bañwi?