BO NO ta gusta ora un hende hasi un kos bon pa bo?— Wèl, otro hende tambe ta gusta ora un hende hasi kos bon pa nan. Nos tur ta gusta esei. E Gran Maestro tabata sa esei, i tur ora e tabata hasi kos pa hende. El a bisa: ‘Mi a bini, no pa hende sirbi mi, ma pa ami sirbi hende.’—Mateo 20:28.

P’esei, si nos ke ta manera e Gran Maestro, kiko nos mester hasi?— Nos mester sirbi hende. Nos tin ku hasi kos bon pa nan. Ta bèrdat ku hopi hende no ta hasié. Mayoria hende asta ke pa otro hende sirbi nan tur ora bai. Un tempu, asta e siguidónan di Hesus tabata pensa asina. Nan tur tabata ke ta esun mas importante.

Un dia Hesus tabata kana ku su disipelnan, esta, su siguidónan. Ora nan a yega den e stat di Kapernaum, banda di Laman di Galilea, nan tur a drenta un kas. Ora nan tabata paden Hesus a puntra nan: “Ta kiko boso tabata diskutí na kaminda?” Nan a keda ketu, pasobra loke nan tabata pleita ariba ta tokante kua di nan ta esun di mas importante.—Marko 9:33, 34.

 Hesus tabata sa ku no ta bon pa niun di su disipelnan sinti su mes mas importante ku e otronan. P’esei, manera nos a siña den e promé kapítulo di e buki aki, el a pone un mucha chikitu para meimei di nan, i a bisa ku nan mester ta humilde manera e chikitin ei. Pero asina mes nan no a siña. P’esei, poko promé ku Hesus a muri el a siña nan un lès ku nan lo no a lubidá nunka mas. Ta kiko el a hasi?—

Wèl, ora nan tabata kome huntu, Hesus a lanta for di mesa i a kita su paña djariba, esta, un kos manera un mantel. El a kohe un sèrbètè anto lor’é rònt di su kustia. Despues el a kohe un ponchera i yen’é ku awa. Su siguidónan lo mester a puntra nan mes ta kiko e ta bai hasi. Hesus a pasa serka nan un pa un, sak abou, laba nan pia, anto kaba, seka nan pia ku e sèrbètè tanten ku nan a sinta wak. Imaginá bo! Kon abo lo a sinti bo si bo tabat’ei huntu ku nan?—

Su siguidónan no a haña ku ta bon pa e Gran Maestro sirbi nan asina. Nan a sinti bèrgwensa. Pedro no tabata ke mes pa Hesus hasi e kos humilde aki p’e. Pero Hesus a bisa ku ta importante p’e laba Pedro su pia.

Awendia no ta normal pa nos laba pia di otro. Pero tempu Hesus tabata riba tera sí hende tabata hasié. Bo sa dikon?— Wèl, n’e tera kaminda Hesus ku su siguidónan tabata biba, hende tabata bisti sandalia, i nan no tabata bisti mea. Ora nan tabata kana riba kaminda di tera, nan pia tabata yena ku stòf. P’esei, tabata lif di bo parti si bo a laba pia di hende pa kita stòf ora nan bin bo kas.

Pero e biaha aki niun di Hesus su disipelnan no a ofresé pa laba pia di e otronan. P’esei Hesus mes a hasié. Dor di hasi esei, Hesus a siña su siguidónan un lès importante. E tabata un lès ku nan mester a siña. I nos ku ta biba awendia tambe mester siñ’é.

 Bo sa kiko e lès ta?— Despues ku Hesus a bisti su paña djariba bèk i a bai sinta bèk na mesa, el a splika nan: “Boso sa kiko mi a hasi ku boso? Boso ta yama mi Maestro i Señor; i boso tin rason, pasobra esei mi ta. Si ami anto, e Señor i Maestro, a laba boso pia, boso tambe mester laba pia di otro.”—Juan 13:2-14.

E Gran Maestro a mustra aki ku e tabata ke pa su siguidónan sirbi otro. E no tabata ke pa nan pensa riba nan mes so. E no tabata ke pa nan kere ku nan ta asina importante ku semper ta otro hende mester sirbi nan. E tabata ke pa nan ta dispuesto pa sirbi hende.

Bo no ta haña ku e kos ei ta un bon lès?— Abo ta bai hasi meskos ku e Gran Maestro? Bo ta bai sirbi hende?— Nos tur por hasi kos pa hende. Si nos hasi asina, nan lo keda kontentu. Pero e kos di mas importante ta ku Hesus i su Tata lo keda kontentu.

Sirbi hende no ta un kos difísil. Si bo paga tinu lo bo ripará ku tin hopi kos ku bo por hasi pa hende. Awor, pensa un ratu:  Kiko bo por hasi pa yuda bo mama? Manera bo sa, e ta hasi hopi kos pa bo i bo famia. Bo ta kere ku bo por yud’é?— Kisas bo por puntr’é si bo tin mag di yud’é.

Kisas bo por drecha mesa promé ku boso bai kome. Òf kisas bo por kita e tayónan sushi for di mesa ora boso kaba di kome. Tin mucha ta hiba saku di sushi pafó tur dia. Djis hasi loke bo por, i lo bo ta sirbiendo hende meskos ku Hesus a hasi.

Bo tin ruman chikitu ku bo por hasi kos p’e? Kòrda ku Hesus e Gran Maestro a sirbi asta su siguidónan. Si bo sirbi bo rumannan chikitu, lo bo ta hasiendo meskos ku Hesus. Kiko bo por hasi pa nan?— Por ta bo por yuda nan warda nan ko’i hunganan ora nan kaba di hunga. Òf bo por yuda nan bisti paña. Òf bo por  yuda nan drecha nan kama. Bo por pensa mas kos ku bo por hasi pa nan?— Nan lo stima bo si bo hasi e kosnan aki, meskos ku Hesus su siguidónan a stima Hesus.

Na skol tambe bo por hasi kos pa hende. Bo por hasi kos pa e muchanan den bo klas òf pa bo maestro. Si un hende laga su bukinan kai, lo ta lif di bo parti si bo yud’é hisa nan. Lo bo por ofresé bo maestro pa bo limpia bòrchi p’e òf pa bo hasi otro kos. Djis tene porta habrí pa hende pasa tambe ta un bon manera pa sirbi hende.

Tin bes nos lo nota ku hende no ta bisa nos danki ora nos sirbi nan. Bo ta kere ku e kos ei mester pone nos stòp di hasi kos bon?— Nò! Hopi hende no a bisa Hesus danki pa e kosnan bon ku el a hasi. Pero esei no a stòp e di hasi bon.

P’esei, nunka nos no mester stòp di sirbi hende. Laga nos kòrda riba Hesus, e Gran Maestro, i purba sigui su ehèmpel semper.