PILLAPIS yanaparisojtin, ¿kusikunkichu?... Tukuy kusikunchej wajkuna yanapariwajtinchejqa. Jesusqa chayta sumajta yacharqa, chayrayku wajkunata yanaparejpuni. Pay nerqa: ‘Mana sirvichikojchu jamuni, astawanqa wajkunata sirvejʼ, nispa (Mateo 20:28).

Sumaj Yachachej Jesús jina kayta munanchej chayqa, ¿imatá ruwananchej tiyan?... Wajkunata yanaparina tiyan, paykunapaj allin imasta ruwaspa. Ashkha runastaj mana chayta ruwankuchu. Astawanpis wajkunawan sirvichikuyta munanku. Jesuspa yachachisqasninpis kurajpaj qhawasqa kayta munarqanku.

Uj kuti, Jesusqa yachachisqasninwan Capernaumman rerqa. Chay llajtaqa, Galilea qocha chaynejpi kasharqa. Chayaytawan uj wasiman yaykorqanku. Jesustaj yachachisqasninta taporqa: “Imamantataj ñampi siminakusharqankichej?”, nispa. Paykunataj chʼinlla karqanku, imaraykuchus mayqenninkuchus kurajpaj qhawasqa kasqankumanta ñanpi siminakusharqanku (Marcos 9:33, 34).

 Jesusqa yachachisqasnin kurajpaj qhawasqa kayta munasqankuta, mana allinpajchu qhawarqa. Chayrayku ñaupaj kaj yachaqanapi yachakorqanchej jina, Jesusqa yachachisqasninpa chaupinkuman uj wawata sayaykucherqa. Nerqataj chay wawa jina llampʼu sonqo kanankuta. Paykunataj nipuni entienderqankuchu. Chayrayku Jesusqa wañupunan qayllata, llampʼu sonqos kanankupaj ujtawan yachacherqa. ¿Imaynatá chayta ruwarqa?...

Mikhushajtinku, Jesusqa sayariytawan uj toallata chumpinman warkhuykukorqa. Chantataj uj bañadorman yakuta jichʼarqorqa. Yachachisqasnenqa ichá sonqonkupi nerqanku: “¿Imatá ruwanqarí?”, nispa. Qhawashajtinkutaj, Jesusqa chakisninkuta mayllayta qallarerqa, toallawantaj chʼakicherqa. Chaypi kaspa, ¿imatá niwaj karqa?...

Yachachisqasnenqa mana allinpajchu qhawarqanku Jesús chakisninkuta mayllasqanta, pʼenqakorqankutaj. Pedroqa mana munarqachu Jesús chakisninta mayllananta, chayta kamachislla ruwasqankurayku. Jesustaj Pedroman nerqa, chakisninta mayllananpuni kasqanta.

Kay tiempopi, manaña chakisninchejta mayllanakunchejchu. Jinapis Jesuspa tiemponpeqa, runas chakisninkuta mayllanakojpuni kanku. ¿Yachankichu imaraykuchus?... Jesuswan yachachisqasninwan tiyakorqanku chay lugarmanta runasqa abarcallata churakoj kanku. Ñanta purisqankupitaj chakisninkoqa chʼichichakoj. Chayrayku kʼacha runasqa, visitankoj chakisninkuta mayllajpuni kanku.

Jinapis chay chʼiseqa, Jesuspa ni mayqen yachachisqanpis ujkunaj chakisninkuta mayllaj churakorqachu. Chayrayku Jesús chakisninkuta mayllarqa. Jinamanta, yachachisqasninman imatachus  ruwanankuta yachacherqa. Noqanchejpis chayta yachakullasunmantaj.

¿Yachankichu imatachus Jesús yachachisqanta?... Payqa ujtawan tiyaykukuspa nerqa: “Reparankichejchu imatachus ruwasqayta, chakisniykichejta mayllaspa? Qankuna niwankichej: Yachachej Señor, nispa; walejta niwankichej, imaraykuchus chaypuni noqa kani. Noqachus Yachachej Señor kashaspa, chakisniykichejta mayllarqaykichej chayqa, kikillantataj qankunapis chakisniykichejta mayllanakuychej”, nispa (Juan 13:2-14).

Jesusqa chayta nispa yachachisqasnin yanapakuyta yachanankuta nisharqa. Manataj munarqachu paykunallapi yuyanankuta, chayri patrones jina wajkunawan atiendechikunankuta. Astawanpis munarqa wajkunata tukuy sonqo yanaparinankuta.

Sumajtapuni yachacherqa, ¿icharí?... Qanrí, ¿Sumaj Yachachej Jesús jinachu wajkunata yanaparinki?... Tukuypis wajkunata yanaparisunman. Chayta ruwaspaqa runasta kusichisun. Astawanqa Jesusta, Tatanta ima kusichisun.

 Allinta qhawarispaqa, imapipis wajkunata yanapariyta atinkipuni. Tʼukuriy: ¿Imapí mamaykita yanapariwaj? Payqa tukuy imata ruwan. ¿Imapipis yanapariwajchu?... Allin kanman tapurinayki.

Ichá waykʼuysikuwaj, chayri platosta mayllaysikuwaj. Wakin wawasqa wasita sapa día pichanku. Ajinata yanapakuspaqa, Jesús jina ruwanki.

¿Sullkʼasniyki kanchu paykunata yanaparinaykipaj? Sumaj Yachachej Jesusqa, yachachisqasnintapis yanaparerqa. Sullkʼasniykita yanaparispaqa, Jesús jina ruwanki. ¿Imaynatá paykunata yanapariwaj?... Ichá pujllanasninkuta kʼuchunchayta yachachiwaj. Manaqa vistikunankupaj, chayri camankuta qhatanankupaj yanapawaj. ¿Imapiwantaj paykunata yanapariwaj?... Chayta ruwajtiykeqa  sullkʼasniyki munakusonqanku, imaynatachus Jesustapis yachachisqasnin munakorqanku, ajinata.

Escuelapipis compañerosniykiwan, profesoresniykiwan kʼacha kawaj. Librosninkuta chayri cuadernosninkuta urmarpachejtinku oqharipuwaj. Profesorniykipaj pizarronta borrapuwaj, manaqa waj jinasmantapis yanapawaj. Pipis “lapizniykita mañariway” chayri “boligrafoykita mañariway” nisojtenqa, mañariwaj.

Wakin kutis, runasqa yanapasqanchejmanta ichá mana “gracias” niwasunchu. ¿Chayraykuchu manaña yanapakusun?... Mana. Wakenqa ni Jesustapis “gracias” nerqankuchu, chaywanpis payqa allin kajta ruwallarqapuni.

Chayrayku wajkunata yanaparinallapuni. Sumaj Yachachej Jesusmanta yuyarikuna, pay jina kanapajtaj kallpachakuna.