TONGANA mbeni zo asala ye ti nzoni na mo, a yeke nzere na mo?— Biani, a yeke nzere ka na azo tongana mbeni zo asala ye ti nzoni na ala. E kue a yeke nzere na e. Kota Wafango ye ahinga ni; ni la, lo yeke sala lani aye lakue ndali ti azo. Lo tene: ‘Mbi ga, ti tene azo asala kua na mbi pëpe, me ti tene mbi sala kua na ala.’​—Matthieu 20:28.

Tongaso, tongana e ye ti duti tongana Kota Wafango ye, a lingbi e sala nyen?— A lingbi e sala kua na azo. A lingbi e sala aye ti nzoni na ala. Ti tâ tënë ni, azo mingi aye ti sala so pëpe. Ala ye lakue ti tene azo si asala kua na ala. Même adisciple ti Jésus aduti mbeni lâ na mara ti bango ndo tongaso. Zo oko oko na popo ti ala aye ti duti kota ahon amba ti lo.

Mbeni lâ, Jésus na adisciple ti lo ayeke tambela ti gue na kodoro ti Capernaüm, ndulu na kota Ngu ti Galilée. Tongana ala lï na yâ kodoro ni awe, ala kue ague na yâ ti mbeni da. Kâ Jésus ahunda ala: “I yeke sala tënë ti nyen na popo ti i na lege?” Ala zi yanga pëpe ngbanga ti so na lege ala papa ti hinga zo wa si ayeke kota na popo ti ala.​—Marc 9:33, 34.

 Jésus ahinga lani so a yeke na lege ni pëpe ti tene mbeni oko ti adisciple ti lo abâ so lo yeke kota ahon atanga ni kue. Tongaso, tongana ti so e manda awe na yâ kozo chapitre ti buku so, lo mû mbeni kete molenge, lo zia lo na popo ti ala, na lo tene na ala so a lingbi ala sala tele ti ala kete tongana kete molenge so. Me so kue gbä, ala manda ye oko pëpe. Tongaso, ngoi kete kozoni si lo kui, Jésus afa na ala mbeni ye so ala yeke girisa ande lâ oko pëpe. Lo sala nyen?—

Biani, tongana ala yeke te kobe, Jésus alondo, lo zi bongo ti lo ti ndo ni. Lo mû mbeni bongo, lo kanga na ngbonda ti lo. Na pekoni, lo mû mbeni kota sembe, lo tö ngu dä. Peut-être adisciple ti lo ni ayeke hunda tele ti ala na ye so lo ye ti sala. Na ngoi so ala yeke bâ ndo, Jésus ague na tele ti ala oko oko kue, lo kuku, na lo sukula gere ti ala. Na pekoni, lo mû bongo ni lo zi na ngu so ayeke na gere ti ala. Bâ ye so kete si! Tongana fade mo yeke kâ, mo yeke tene nyen?—

Adisciple ti lo abâ so a yeke na lege ni pëpe ti tene Kota Wafango ye asala kua na ala tongaso. Kamene ahon ndo ti ala. Ti Pierre, lo ke ti tene Jésus asala mara ti kete kua tongaso na lo. Me Jésus atene so a lingbi lo sala ni teti a yeke kota ye na lê ti lo.

E yeke sukula gere ti amba ti e laso tongaso pëpe. Me a yeke ye so azo ayeke sala ka na ngoi so Jésus ayeke na ndo ti sese. Mo hinga ngbanga ti nyen?— Biani, na kodoro ti Jésus na ti adisciple ti lo, azo ayeke yü apâpä. Tongaso, tongana ala yeke tambela na lege, saleté ayeke mû gere ti ala kue. A yeke lani salango nzoni bê tongana zo asukula gere ti azo so aga na ndo ti lo.

Me ti so, zo oko na popo ti adisciple ti Jésus amû tele ti lo pëpe ti sukula gere ti amba ti lo. Tongaso, Jésus asala ni lo mveni. Na lege so, Jésus afa mbeni kota ye na adisciple ti lo. A lingbi ala manda ni. E nga kue a lingbi e manda ni laso.

 Ye ti manda ni ayeke nyen, mo hinga ni?— Na peko ti so Jésus ayü bongo ti lo ti ndo ni, na lo kiri lo duti awe, lo tene: “I hinga ye so Mbi sala na i? I hiri Mbi [Wafango ye] na Seigneur, na i tene nzoni, teti Mbi yeke tongaso. Tongana Mbi, [Wafango ye] na Seigneur, Mbi sukula gere ti i, a lingbi i sukula gere ti i na popo ti i nga.”​—Jean 13:2-14.

Na yâ tënë so, Kota Wafango ye afa so lo ye si adisciple ti lo asala kua na popo ti mba. Lo ye si ala bâ gi tele ti ala mveni pëpe. Lo ye nga pëpe ti tene ala bâ so ala yeke kota mingi, si a lingbi azo asala lakue kua na ala. Me lo ye si ala duti ndulu ti sala kua na azo.

So tâ pendere ye ti manda la ape?— Mo yeke sala ande ye tongana Kota Wafango ye, na mo sala kua na azo?— E kue e lingbi ti sala aye teti azo. A yeke zia ande ngia na bê ti ala. Me mingi ahon so, a yeke zia ande ngia na bê ti Jésus nga na Babâ ti lo ti yayu.

Ti sala kua na azo ayeke ngangu pëpe. Tongana mo bâ ndo na tele ti mo, mo yeke bâ aye mingi so mo lingbi ti sala na azo. Gbu li kete mo bâ: Mbeni ye ayeke dä so mo lingbi ti sala ti mû maboko na mama ti mo? Mo hinga so lo yeke sala gbâ ti aye ndali ti mo nga  ndali ti tanga ti azo ti da ni. Mo lingbi ti mû maboko na lo?— Hunda lo.

Peut-être mo lingbi ti tö ngu ti maboko. Wala peut-être mo lingbi ti zi asembe na ti bale ndo na peko ti tengo kobe. Ambeni molenge ayeke gue ti tuku asaleté lâ oko oko. Atâa ye wa mo lingbi ti sala ni, mo yeke sala kua na azo, tongana ti so Jésus asala ândö.

Mo yeke na angambe so mo lingbi ti sala kua na ala? Dabe mo so Jésus, atâa so lo yeke Kota Wafango ye, asala même kua na adisciple ti lo. Na salango kua na angambe ti mo, mo yeke sala ande ye tongana Jésus. Mo lingbi ti sala nyen ndali ti ala?— Peut-être mo lingbi ti fa na ala ti sukula ngu nzoni na peko ti so ala hunzi ti sala ngia. Mo lingbi ti mû maboko na ala ti yü bongo, wala ti leke gbogbo ti ala. Mo hinga mbeni ye nde so  mo lingbi ti sala ndali ti ala?— Tongana mo sala ye tongaso na ala, ala yeke ye ande tënë ti mo mingi, legeoko tongana ti so adisciple ti Jésus aye lani tënë ti lo mingi.

Na ekole nga kue mo lingbi ti sala kua na azo. A lingbi ti duti akamarade ti klase ti mo wala zo so ayeke fa mbeti na mo. Tongana ambeti ti mbeni zo atï, a yeke duti ande nzoni na mbage ti mo ti mû maboko na lo ti ro ni. Mo lingbi ti mû tele ti mo ti leke lê ti tableau nzoni, wala ti sala mbeni ye nde na zo so ayeke fa mbeti na mo. Même ti gbu yanga-da si mbeni zo alï ayeke tâ nzoni mingi.

Ngoi na ngoi, mo lingbi ti bâ so azo akiri singila pëpe na e ndali ti aye so e sala na ala. Ti mo, a lingbi e zia ti sala ye ti nzoni ni?— Oko pëpe! Azo mingi akiri lani singila na Jésus pëpe ndali ti anzoni ye so lo sala. Me ye so akanga lege na lo pëpe ti sala ye so ayeke nzoni.

Tongaso, a yeke nzoni e gbanzi tele ti e lâ oko pëpe ti sala kua na azo. Dabe na salango ye ti Kota Wafango ye, Jésus, na gi lege lakue ti sala ye tongana lo.