UTIVA njani nangabe umuntfu akwentela intfo lenhle?— Nalabanye bayajabula nangabe umuntfu lotsite abentela tintfo letinhle. Sonkhe siyajabula. UMfundzisi Lomuhle Kakhulu bekakwati loko, futsi bekahlale abentela tintfo letinhle bantfu. Watsi: ‘Angitelanga kutosetjentelwa, kodvwa kutokwentela labanye lokuhle.’​—Matewu 20:28.

Ngako-ke, yini lokufanele siyente nangabe sifuna kufanana neMfundzisi Lomuhle Kakhulu?— Kufanele sentele labanye tintfo letinhle. Kuliciniso kutsi bantfu labanyenti abakwenti loko. Ecinisweni, ngaso sonkhe sikhatsi bafuna kutsi labanye babentele lokutsite. Ngalesinye sikhatsi, ngisho nebalandzeli baJesu bativa ngendlela lefanako. Ngamunye wabo bekafuna kuba ngumuntfu lomkhulu nobe lobaluleke kubendlula bonkhe.

Ngalelinye lilanga, Jesu bekahamba nebafundzi bakhe. Nabefika edolobheni lelikhulu laseKhaphanawume, edvute neLwandle lwaseGalile, bonkhe bangena endlini. Nabefika lapho, Jesu wababuta watsi: “Beniphikisana ngani endleleni?” Abazange  bamphendvule, ngobe endleleni bebaphikisana ngekutsi ngubani lomkhulu emkhatsini wabo.​—Makho 9:33, 34.

Jesu bekati kutsi bekungasiyo intfo lenhle kutsi lomunye kubafundzi bakhe atibone amkhulu kunalabanye. Ngako, njengobe sibonile esehlukweni sekucala, Jesu watsatsa umntfwana lomncane wammisa emkhatsini wabo, wase ubatjela kutsi kufanele batfobeke njengalomntfwana. Kodvwa abazange bafundze nangaleso sikhatsi. Ngako, ngesikhatsi sekatawufa, Jesu wababekela sibonelo lebebangeke baze basikhohlwe. Yini layenta?—

Ngesikhatsi bonkhe basadla ndzawonye, Jesu wasukuma etafuleni, wase ukhumula ingubo yakhe yangetulu. Ngemuva kwaloko watsatsa lithawula, walibopha elukhalo. Wabese utsatsa indishi yekugezela wafaka emanti kuyo. Kungenteka kutsi balandzeli bakhe bebatibuta kutsi yini lena lafuna kuyenta. Njengobe bebabukele, Jesu waya kubo bonkhe, wagobondzela, wabese ubageza tinyawo. Nasacedzile, watesula ngelithawula. Ase ucabange nje ngaloko! Kube nawe bewulapho, bewutativa njani?—

Balandzeli baJesu bebacabanga kutsi bekungakafaneli uMfundzisi Lomuhle Kakhulu abentele loku. Baba nemahloni. Ecinisweni, Phetro bekangafuni kutsi Jesu ente lomsebenti lophansi. Kodvwa Jesu watsi bekubalulekile kutsi awente.

Lamuhla, asikavami kugeza tinyawo talabanye bantfu. Kodvwa loku bekwentiwa ngesikhatsi Jesu asaselapha emhlabeni. Ucabanga kutsi kungani bebakwenta?— Kulelive Jesu nebalandzeli bakhe lebebahlala kulo, bantfu bebagcoka tincabule. Ngako bebatsi nabahamba emigwacweni lenetintfuli, tinyawo tabo tivele tingcole. Bekukukhombisa umusa kugeza tinyawo temuntfu lofike kakho atokuvakashela.

Kute emkhatsini webafundzi baJesu lobekafuna kugeza tinyawo talabanye. Ngako Jesu wase uyabageza. Ngekwenta loku, Jesu bekafundzisa balandzeli bakhe sifundvo lesibalulekile. Bekufanele basifundze lesifundvo. Natsi lamuhla kufanele sisifundze.

 Ucabanga kutsi ngusiphi lesifundvo?— Ngesikhatsi Jesu sekayigcokile ingubo yakhe yangetulu futsi sekahleli phansi, wabachazela: “Niyakucondza yini loku lengikwente kini? Naningibita nitsi: ‘Mfundzisi,’ nobe nitsi: ‘Nkhosi,’ nisuke nicinisile ngobe nginguloko. Ngako nangabe mine nanobe ngiyiNkhosi neMfundzisi, nginigeze tinyawo, nani kufanele nigezane tinyawo.”​—Johane 13:2-14.

Ngalesibonelo, uMfundzisi Lomuhle Kakhulu bekabonisa kutsi ufuna balandzeli bakhe bentelane tintfo letinhle. Bekangafuni kutsi baticabangele bona kuphela. Bekangafuni bacabange kutsi babaluleke kakhulu kunalabanye bantfu kangangekutsi labo bantfu bekufanele bentele bona tintfo letinhle. Bekafuna kutsi bakufune kwentela labanye tintfo.

Lesi akusiso yini sifundvo lesihle?— Utawufanana yini neMfundzisi Lomuhle Kakhulu ngekutsi wentele labanye bantfu tintfo letinhle?— Sonkhe singabentela tintfo letinhle labanye. Loko kutawubajabulisa. Kodvwa ngetulu kwako konkhe, kutawujabulisa Jesu naBabe wakhe.

Akusilukhuni kwentela labanye bantfu tintfo letinhle. Nangabe ubukisisa, ungabona tintfo letinyenti longatentela labanye. Ase  ucabange nganaku: Kukhona yini longakwenta kute usite make wakho? Angitsi uyati kutsi make wakho wentela wena kanye nemndeni wakini tintfo letinyenti? Ungamsita njani-ke?— Kungani ungambuti?

Mhlawumbe ungalungisa litafula ngaphambi kwekutsi nidle. Nobe ungasusa titja letingcolile etafuleni nasenicedzile kudla. Labanye bantfwana bakhipha umgcoma wetibi onkhe malanga. Nanobe ngukuphi lotakwenta, utawube wentela labanye tintfo letinhle njengobe naJesu enta.

Bakhona yini bantfwabakini labancane longabentela tintfo letinhle? Khumbula kutsi Jesu, uMfundzisi Lomuhle Kakhulu wentela ngisho nebalandzeli bakhe tintfo letinhle. Nawentela bantfwabakini labancane tintfo letinhle, usuke ulingisa Jesu. Yini longabentela yona?— Mhlawumbe ungabasita bafundze kubutsa emathoyizi abo nasebacedzile kudlala. Ungabasita  nalapho bagcoka. Nobe ubasite bagcebe imibhedze yabo. Kukhona yini lokunye lokucabangako longabentela kona?— Batakutsandza nawubentela letintfo, njengobe naJesu balandzeli bakhe bebamtsandza.

Nasesikolweni ungabentela labanye tintfo letinhle. Ungentela bantfwana lofundza nabo nobe wentele thishela wakho. Nangabe lomunye kubo awelwa yincwadzi yakhe, utawube ubonisa umusa nangabe umbutsela yona. Ungasula libhodi lekubhala nobe wentele thishela wakho lenye intfo. Ngisho nekubambela umuntfu lotsite umnyango kukhombisa kutsi unemusa.

Ngaletinye tikhatsi bantfu ngeke basibonge ngekubentela tintfo letinhle. Ucabanga kutsi loko kufanele kusente siyekele yini kwenta tintfo letinhle?— Cha! Bantfu labanyenti abazange bambonge Jesu ngesikhatsi enta imisebenti lemihle. Kodvwa loko akuzange kumente kutsi ayekele kwenta lokuhle.

Ngako-ke, asingakuyekeli kwentela labanye bantfu tintfo letinhle. Asikhumbule uMfundzisi Lomuhle Kakhulu, futsi setame kulingisa sibonelo sakhe.