E MATA, e fiafia koe māfai e fai ne se tino se mea ‵lei mō koe?— Ia, e fia‵fia foki eiloa a nisi tino māfai e fai ne se tino se mea ‵lei mō latou. E penā eiloa tatou katoa. Ne iloa ne te Faiakoga Sili te mea tenā, kae ne fai faeloa ne ia a mea mō nisi tino. Ne fai mai tou tagata: ‘Au ne vau, ke se tavini mai, kae ke tavini atu au.’—Mataio 20:28.

Tela la, kafai e ma‵nako tatou ke fai pelā mo te Faiakoga Sili, ne a mea e ‵tau o fai ne tatou?— E ‵tau o tavini atu tatou ki nisi tino. E ‵tau o fai ne tatou a mea ‵lei mō nisi tino. Se mea tonu me e se fai ne tino e tokouke a te mea tenei. A te ‵tonuga loa, e ma‵nako a te tokoukega o tino ke tavini atu a nisi tino ki a latou. I te taimi e tasi, ne mafau‵fau foki penā a soko o Iesu. Ne ma‵nako a latou taki tokotasi ke fai mo fai te ‵toe tino sili io me ko te ‵toe tino tāua.

I te aso e tasi, ne faima‵laga atu a Iesu mo ana soko. Mai tua o te lotou uluatuga ki te fa‵kai o Kapanaumi, i tafa o te Tai o Kalilaia, ne ulu atu latou katoa ki loto i se fale. I konā ne fai atu ei ne Iesu se fesili ki a latou: “Se a te mea ne kinau koutou ki ei i te auala?” Ne ‵nofo filemu latou ona ko te mea ne kinau latou me ko oi te ‵toe tino sili i a latou.—Maleko 9:33, 34.

 Ne iloa ne Iesu me e sē se mea ‵lei ke mafau‵fau ana soko taki tokotasi me i a ia ko te ‵toe tino sili. Tela la, i te taimi ne suke‵suke ei tatou ki te mataupu muamua o te tusi tenei, ne fakatu atu ne ia se tamā tamaliki i va o latou kae fai atu me e ‵tau o loto maulalo latou e pelā mo te tamaliki tenā. Kae ne seki maua eiloa ne latou te akoakoga tāua mai i ei. Tela la, mai mua faeloa o mate a Iesu, ne akoako atu ne Iesu ki a latou se akoakoga telā ne seki toe puli eiloa i a latou. Ne a ana mea ne fai?—

Ia, i te taimi ko ‵kai fakatasi ei a latou katoa, ne tu aka a Iesu mai te taipola kae ne tapale tena gatu tafa ki tua. Ne puke atu a ia ki se tamā solo kae ‵sai ki tena kaokao. Ne puke aka ei ne ia se tīsi kae tuku atu a vai ki loto i ei. Kāti ne mafau‵fau ana soko me ne a ana mea ka fai. I te taimi ne kilo‵kilo atu ei latou, ne fanatu a Iesu ki a latou katoa, punou ifo ki lalo, kae ‵fulu ne ia olotou vae. Oti, fakamalō ei ne ia olotou vae ki te solo. Mafaufau aka la ki te mea tenā! E a moi ne nofo atu koe i konā? E pefea ou lagonaga?—

Ne seki mafau‵fau ana soko me ne ‵tau o tavini atu a te Faiakoga Sili ki a latou i te auala tenei. Ne ‵ma latou. A te ‵tonuga loa, ne seki manako a Petelu ke fai ne Iesu se galuega fatauva penei ki a ia. Kae ne fai atu a Iesu me se mea tāua ke fai ne ia a te mea tenā.

E se ‵fulu sāle ne tatou a vae o nisi tino i aso nei. Kae tenei eiloa te faifaiga masani i te taimi ne nofo ei a Iesu i te lalolagi. E iloa ne koe me kaia?— Ia, i te fenua telā ne ‵nofo i ei a Iesu mo ana soko, e ‵pei sāle a tino ki taka kolā e ufi fua i ei olotou alofivae. Tela la, kafai e sa‵sale latou i auala lai‵lai, e ‵fonu eiloa olotou vae i ‵pefu. Se faifaiga atafai ke ‵fulu sāle a ‵pefu mai i vae o se tino telā e fanatu o āsi atu ki se fale.

Kae ko te taimi tenei, e seai eiloa se soko tokotasi o Iesu ne peti atu ke ‵fulu ne ia a vae o nisi tino. Tela la, ne fai eiloa ne Iesu. Mai i te faiga o te mea tenei, ne akoako ei ne Iesu se akoakoga tāua ki ana soko. Ne ‵tau o tauloto ne latou te akoakoga tenei. Kae se akoakoga foki telā e ‵tau o tauloto ne tatou i aso nei.

E iloa ne koe me se a te akoakoga tenā?— I te otiga ne toe pei ne Iesu  tena gatu ‵loa mai tua kae sagasaga ifo ki tena koga i te taipola, ne fai atu penei tou tagata: “E malamalama koutou i te mea telā ne fai ne au ki a koutou? E taku ne koutou au ki te ‘Faiakoga,’ mo te ‘Aliki’ kae e tonu eiloa koutou, ko au eiloa tenā. Tela la, kafai au ko te Aliki mo te Faiakoga kae ne mulumulu ne au otou vae, e ‵tau foki mo koutou o fakatau mulumulu otou vae.”—Ioane 13:2-14.

Ne fakaasi atu ne te Faiakoga Sili i konei me ne manako a ia ke tavini atu ana soko ki nisi tino. Ne seki manako a ia ke mafau‵fau fua latou ki a latou eiloa. Ne seki manako a ia ke mafau‵fau me i a latou ko tō tāua telā e ‵tau mo nisi tino o tavini atu faeloa ki a latou. Ne manako a ia ke loto fia‵fia latou o tavini atu ki nisi tino.

E a, e se fai eiloa te mea tenā mo fai se akoakoga ‵lei?— E mata, ka fai koe pelā mo te Faiakoga Sili kae tavini atu ki nisi tino?— E mafai o fai ne tatou a mea katoa mō nisi tino. Ka fai ne te mea tenei ke fia‵fia latou. Kae sili atu i tino katoa, ka fai ei a Iesu mo tena Tamana ke fia‵fia.

E sē se mea faigata ke tavini atu ki nisi tino. Kafai e onoono atu koe, ka lavea ne koe a mea e uke kolā e mafai o fai ne koe mō nisi tino. Mafaufau aka nei ki ei: E mata, e isi se mea e mafai ne koe o fai ke fesoasoani atu ki tou mātua? E iloa ne koe me e fai ne ia a mea e uke mō koe  mo nisi tino o te kāiga. E mafai ne koe o fesoasoani atu ki a ia?— Kaia e se fesili atu koe ki a ia?

Kāti e mafai ne koe o fakatoka te taipola a koi tuai o ‵kai te kāiga. Io me e mafai ne koe o ‵teu te taipola māfai ko oti ne ‵kai te kāiga. E ave ne nisi tama‵liki a kaiga ki te auala i aso katoa. Faitalia me se a te mea e mafai ne koe o fai, ka tavini atu eiloa koe ki nisi tino, e pelā mo Iesu.

E mata, e isi ne ou taina mo tuagane fo‵liki kolā e mafai o tavini atu koe ki a latou? Masaua, me i a Iesu, te Faiakoga Sili, ne tavini atu ki ana soko. Mai i te tavini atu ki ou taina mo tuagane fo‵liki, ka fakaakoako eiloa koe ki a Iesu. Ne a mea e mafai o fai ne koe ki a latou?— Kāti e mafai o fesoasoani atu koe ki a latou ke ave keatea a mea ta‵fao māfai ko oti ne ta‵fao latou. Io me e mafai o fesoasoani atu ki te faiga o olotou gatu. Io me kāti ko te fesoasoani atu ki te faiga o olotou moega. E mata, e mafai o mafaufau koe ki se  mea e mafai ne koe o fai mō latou?— Ka a‵lofa atu eiloa latou ki a koe mō te faiga o mea konei, e pelā eiloa mo te a‵lofa o soko o Iesu ki a ia.

E mafai foki ne koe o tavini atu ki nisi tino i te akoga. Kāti ko tama‵liki i tau vasega io me ko tou faiakoga. Kafai e ‵to ifo a tusi a se tino, se faiga alofa ke fesoasoani atu koe o puke aka ki luga ana tusi. E mafai ne koe o ofo atu ke ‵solo te laupapa io me ke fai ne koe se mea mō tou faiakoga. Ke oko foki eiloa ki te taofiga o te mataloa mō se tino se faifaiga atafai foki.

I nisi taimi, ka iloa aka ne tatou me ka se fakafetai mai a tino ki a tatou mō te tavini atu ki a latou. E mata, e mafaufau koe me e ‵tau o fai ne te mea tenei ke taofi aka tatou mai i te faiga o mea ‵lei?— Ikai! Ne seki fakafetai atu a tino e tokouke ki a Iesu mō ana galuega ‵lei. Kae ne seki taofi aka a ia ne te mea tenā mai te faiga o mea ‵lei.

Tela la, ke mo a ma taofi aka ne koe tou tavini atu ki nisi tino. Ke na masaua ne koe te Faiakoga Sili, ko Iesu, kae taumafai faeloa o fakaakoako atu ki a ia.