Uzou Avọ 7

Ẹmeoyo Ọ Rẹ Thọ Owhẹ

KỌ O rẹ were owhẹ otẹrọnọ whọ rẹ sai ru oware kpobi nọ u je owhẹ? Kọ okejọ o riẹ nọ whọ rẹ gwọlọ nnọ ohwo ọvo ọ rẹ ta oware nọ who re ru kẹ owhẹ hẹ? Ghinẹ ta uzẹme kẹ omẹ.—

Rekọ ovẹ o mai woma kẹ owhẹ? Kọ o ghinẹ rrọ oware areghẹ re who ru oware kpobi nọ u je owhẹ? Manikọ eware i re woma kẹ owhẹ vi ere who te yo ẹme kẹ ọsẹ gbe oni ra?— Ọghẹnẹ ọ ta nọ who re yo ẹme kẹ ọsẹgboni ra, fikiere o wọhọ nọ ewoma jọ ọ riẹ. Joma rri sọ ma sae ruẹ ewoma na.

Bro ikpe whọ rrọ na?— Kọ whọ riẹ epanọ ọsẹ ra ọ kpako te no?— Ẹvẹ oni ra hayo oni-ologbo hayo ọsẹ-ologbo ra a kpako te no?— A vi owhẹ gaga. Yọ epanọ ohwo ọ kpako te, ere o re wo oke nọ o re ro wuhrẹ eware te re. O re yo eware buobu jẹ ruẹ eware buobu je ru eware buobu kukpe kukpe. Fikiere emaha e sai wuhrẹ eware mi ahwo nọ a vi rai.

Kọ whọ riẹ ohwo jọ nọ who vi?— Kọ whọ riẹ eware vi ei?— Fikieme whọ jẹ riẹ eware vi ei?— Fikinọ who vi rie i. Who wo oke nọ who re ro wuhrẹ eware vi ohwo nọ who vi.

 Ono o vi owhẹ gbe omẹ gbe amọfa kpobi?— Jihova Ọghẹnẹ. Ọ riẹ vi owhẹ, yọ ọ riẹ vi omẹ re. Ọ tẹ ta kẹ omai nọ ma ru oware, ma riẹ nọ oware ezi ọ be ta nọ ma ru na, o tẹ make rọnọ oware na o rrọ bẹbẹ eruo. Kọ whọ riẹ nọ okejọ o jariẹ nọ o jọ bẹbẹ kẹ Owuhrẹ Ologbo na re o yo ẹme?—

Ẹdẹjọ Ọghẹnẹ ọ ta kẹ Jesu nọ o ru oware nọ o bẹ gaga. Jesu ọ lẹ kpahe iẹe, wọhọ epanọ ma rẹ ruẹ evaọ uwoho na. Ọ lẹ nọ: “U te je owhẹ, si egho ọnana no omẹ.” Jesu ọ rọ olẹ nana dhesẹ nọ orọnikọ ẹsikpobi o jọ lọlọhọ kẹe re o ru oreva Ọghẹnẹ hẹ. Rekọ ẹvẹ Jesu o ro ku olẹ riẹ họ? Kọ whọ riẹ?—

Enẹ Jesu ọ ta ro ku olẹ na họ: “Orọnọ, orọ eva mẹ hẹ, rekọ orọ eva ra, a re ruẹ.” (Luk 22:41, 42) Ẹhẹ, ọ gwọlọ re a ru oreva Ọghẹnẹ, orọnikọ oriẹ hẹ. O te ru oware nọ Ọghẹnẹ ọ gwọlọ viukpọ oware nọ ọye omariẹ o roro nọ o mai woma.

Eme ma rẹ sai wuhrẹ no onana ze?— Ma wuhrẹ nọ o rẹ mai woma ẹsikpobi re ma ru oware nọ Ọghẹnẹ ọ ta, dede nọ ẹsejọ o sae lọhọ eruo ho. Rekọ ma wuhrẹ oware ofa. Kọ whọ riẹ oware na?— Ma wuhrẹ nnọ Ọghẹnẹ avọ Jesu yọ omọvo na ha, wọhọ epanọ ahwo jọ a rẹ ta na. Jihova Ọghẹnẹ ọ mae kpako yọ ọ riẹ vi Ọmọ riẹ, Jesu, gaga.

Ma te yo ẹme kẹ Ọghẹnẹ, yọ ma bi dhesẹ nọ ma you rie. Ebaibol na e ta nọ: “Uyoyou Ọghẹnẹ ona, nnọ ma re koko ijaje riẹ.” (1 Jọn 5:3) Fikiere, whọ ruẹ nọ u fo re ma yo ẹme kẹ Ọghẹnẹ. Kọ whọ gbẹ gwọlọ nọ who re yo ẹme kẹe?—

 Joma rovie Ebaibol mai re ma ruẹ oware nọ Ọghẹnẹ ọ ta kẹ emọ nọ a ru. Ma bi ti se ẹme nọ Ebaibol na e ta eva Ahwo Ẹfẹsọs uzou avọ 6, owọ 1, 2, gbe 3. O ta nọ: “Whai emaha na, wha yo ẹme enọ i yẹ owhai eva Ọnowo na, keme onana họ onọ u kiehọ. ‘Dhẹ ọsẹ ra avọ oni ra’ (onana họ uzi ọsosuọ avọ eya), ‘re uwoma kẹ owhai, wha ruẹse ria akpọ na kri.’ ”

Whọ ruẹ, Jihova Ọghẹnẹ omariẹ họ ọnọ ọ be ta kẹ owhẹ nnọ who yo ẹme kẹ ọsẹgboni ra na. Eme u dhesẹ re a “dhẹ” ae? U dhesẹ nọ whọ rẹ kẹ ae adhẹẹ. Yọ Ọghẹnẹ ọ yeyaa nọ who te yo ẹme kẹ ọsẹgboni ra, u ti ‘woma kẹ owhẹ.’

Jome gbiku jọ kẹ owhẹ kpahe ahwo jọ nọ a siwi fikinọ a yo ẹme. Ahwo nana a jẹ rria okpẹwho ulogbo ọ Jerusalẹm evaọ oke anwae. Ahwo buobu evaọ okpẹwho oyena a gaviezọ kẹ Ọghẹnẹ hẹ, fikiere Jesu ọ tẹ vẹvẹ ai unu inọ Ọghẹnẹ ọ te raha okpẹwho rai no. Jesu o dhesẹ epanọ a rẹ rọ dhẹ vabọ kẹ ae a te wo areghẹ. Ọ ta nọ: ‘Wha tẹ ruẹ isoja nọ e wariẹ Jerusalẹm họ, wha vẹ riẹ nọ ọraha riẹ ọ kẹlino. Oke oyena wha vẹ dhẹ no Jerusalẹm kpohọ obọ igbehru na.’—Luk 21:20-22.

Wọhọ epanọ Jesu ọ ta na, isoja e wọ ohọre ziọ Jerusalẹm. Isoja Rom a ko okpẹwho na họ. Oware jọ o tẹ lẹliẹ isoja na zihe kpo. Ahwo buobu a roro nnọ uvumọ oware o gbẹ te via ha. A tẹ daji okpẹwho na. Rekọ eme Jesu ọ ta nọ a re ru?— Eme whọ hai ru otẹrọnọ whọ jẹ rria Jerusalẹm?— Enọ e ghinẹ rọwo ẹme Jesu a dhẹ siọ iwou rai ba a tẹ dhẹ no Jerusalẹm thethabọ kpohọ obọ igbehru na.

Ẹgbukpe soso, uvumọ oware o via kẹ Jerusalẹm ho. Ukpe avivẹ,  uvumọ oware o via ha. Ukpe avesa oware ovo o via ha. Ẹsejọhọ ahwo jọ a roro nnọ enọ e dhẹ no okpẹwho na a rrọ gheghẹ. Rekọ ukpe avene, isoja Rom i te zihe ze. A tẹ wariẹ ko Jerusalẹm họ. Oke o va ahwo na abọ no. Isoja na e tẹ raha okpẹwho na. Ibuobu ahwo nọ a jọ okpẹwho na a whu, a te mu enọ i kiọkọ kpo wọhọ erigbo.

Rekọ eme ọ via kẹ ahwo nọ a yo ẹme kẹ Jesu?— A zọ. A thabọ no Jerusalẹm gaga. Uvumọ oware u te rai oma ha. Ẹmeoyo ọ thọ rai no.

Who te bi yo ẹme, kọ oyena o te tha owhẹ re?— Ọsẹgboni ra a sae ta kẹ owhẹ nọ whọ jọ iyẹrẹ zaro ho. Fikieme a jẹ ta ere?— Fikinọ omoto ọ sae tehe owhẹ. Rekọ ẹdẹjọ whọ sai roro nnọ: ‘Rekọ obọnana imoto e rrọ edhere na ha. Mẹ te nwoma ha.  Emaha efa e rẹ jọ iyẹrẹ na zaro, yọ mẹ re ruẹ ọvuọvo nọ ọ nwoma ha.’

Ere ahwo buobu evaọ Jerusalẹm a roro. Nọ isoja Rom a kpo no, oria kpobi o jọ rirẹ. Amọfa a jẹ rria okpẹwho na. Fikiere a tẹ daji re. A vẹvẹ e rai unu no, rekọ a gaviezọ họ. Fikiere, a te whu.

Joma rehọ oriruo ọfa. Kọ whọ rehọ erako zaro no ẹdẹjọ?— Whọ tẹ sa erako, erae nọ i bi no i ze na e sae were owhẹ oma. Rekọ re a rọ erako zaro o sae wha enwoma ze. Whọ sae mahe uwou soso no, yọ whọ sai tube whu dede!

Kareghẹhọ, u te he re ma hai yo ẹme ẹsejọ ọvo. Rekọ otẹrọnọ who re yo ẹme ẹsikpobi, o te ghinẹ tha owhẹ. Kọ ono ọ ta kẹ owhẹ nọ, “Whai emaha na, wha yo ẹme enọ i yẹ owhai” na?— Ọghẹnẹ. Yọ, kareghẹhọ, ọ ta ere fikinọ o you owhẹ.

Se ikereakere enana nọ i dhesẹ epanọ u wuzou te re a yo ẹme na: Itẹ 23:22; Ọtausiwoma Na 12:13; Aizaya 48:17, 18; gbe Ahwo Kọlọsi 3:20.

[Uwoho nọ o rrọ ẹwẹ-obe avọ 42]

Fikieme whọ jẹ gaviezọ kẹ ahwo nọ a kpako vi owhẹ?

[Uwoho nọ o rrọ ẹwẹ-obe avọ 43]

Eme ma rẹ sai wuhrẹ no olẹ Jesu na ze?

[Uwoho nọ o rrọ ẹwẹ-obe avọ 45]

Oghẹrẹ vẹ ẹmeoyo kẹ uzi Jesu o ro siwi ahwo nana?

[Uwoho nọ o rrọ ẹwẹ-obe avọ 46]

Fikieme who je yo ẹme whọ gbẹ make ruẹ enwoma evuovo ho?