WASWE, bae iu hapi sapos iu savve duim eni samting wea iu laekem? Waswe, samfala taem iu laek for no eniwan talem iu wanem for iu duim? Hao sapos iu talem mi tingting bilong iu abaotem diswan?—

Bat wanem nao hem gud for iu? Waswe, hem barava wise for duim eni samting wea iu laekem? Or waswe, iu kasem samting wea moabeta taem iu obeyim dadi and mami bilong iu?— God sei iu shud obeyim dadi and mami bilong iu, so masbi wanfala gud reason stap for duim datwan. Iumi laek for faendaot wanem nao datfala reason.

Wanem nao age bilong iu?— Waswe, iu savve age bilong dadi bilong iu?— Wanem nao age bilong mami, granmami, or grandadi bilong iu?— Olketa laef for longfala taem winim iu. And taem man laef for longfala taem, hem garem staka moa taem for lanem olketa samting. Hem herem plande moa samting and lukim plande moa samting and duim plande moa samting evri year. So young pipol savve lane from olketa bigman.

Waswe, iu savve long samwan wea young winim iu?— Waswe, iu savve long moa samting winim hem?— Why nao iu savve long moa  samting?— Hem bikos iu laef longfala taem winim hem. Iu garem moa taem for lanem olketa samting winim samwan wea young.

Hu nao laef for longfala taem winim iu or mi or eni nara man?— Jehovah God. Hem savve long staka samting winim iu, and hem savve long staka samting winim mi. Taem hem talem iumi for duim eni samting, iumi savve sure hem stret samting for duim, nomata maet hem hard for iumi duim datwan. Waswe, iu savve hao wanfala taem, datfala Nambawan Teacher tu faendem hem hard for obey?—

Wantaem God askem Jesus for duim wanfala barava hard samting. Jesus prea abaotem diswan, olsem iumi lukim long piksa. Hem prea olsem: ‘Sapos iu wantem, aotem disfala hard samting from mi.’ Taem hem prea olsem, Jesus showim hem no evritaem isi for duim wanem God laekem. Bat long wanem wei nao Jesus finisim prea bilong hem? Waswe, iu savve?—

Jesus finisim datfala prea taem hem sei: “No followim will bilong mi, bat followim will bilong iu.” (Luke 22:41, 42) Hem laek duim wanem God laekem, no wanem hemseleva laekem. And hem gohed duim wanem God laekem winim wei for duim samting wea hem tingse hem best samting for duim.

Wanem nao iumi savve lanem from diswan?— Iumi lanem hem evritaem stret for duim wanem God talem, nomata maet hem no isi for duim datwan. Bat iumi lanem nara samting tu. Waswe, iu savve wanem nao datwan?— Iumi lanem hao God and Jesus no semsem, olsem samfala pipol talem. Jehovah God laef for longfala taem and hem savve long staka samting winim Son bilong hem, Jesus.

Taem iumi obeyim God, iumi showimaot iumi lovem hem. Bible hem sei: “Diswan nao wanem hem minim for lovem God, for iumi  obeyim olketa komandment bilong hem.” (1 John 5:3) So point hem klia, iumi evriwan need for obeyim God. Iu laek for obeyim hem, iaman?—

Iumi openem Bible bilong iumi and lukim wanem God talem olketa pikinini for duim. Iumi readim wanem Bible talem long Ephesians chapter 6, verse 1, 2, and 3. Hem sei: “Olketa pikinini, obeyim dadi and mami bilong iufala insaed long Lord, from diswan hem raeteous fasin: ‘Honorim dadi and mami bilong iu’; hem nao firstfala komand wea talem promis: ‘For mekem iufala kasem gud samting and savve stap longfala taem long disfala earth.’”

So iu lukim hao Jehovah God nao talem iu for obeyim dadi and mami bilong iu. Wanem nao hem minim for “honorim” olketa? Hem minim iu showimaot respect long olketa. And God promisim hao sapos iu obeyim dadi and mami bilong iu, hem bae mekem ‘iu kasem gud samting.’

Mi laek talem iu wanfala story abaotem samfala pipol wea sev bikos olketa obey. Pipol hia stap longfala taem bifor long datfala big taon, Jerusalem. Klosap evri pipol long datfala taon no lisin long God, so Jesus warnim olketa hao God bae distroem taon bilong olketa. Jesus talem tu hao olketa savve ranawe sapos olketa lovem stret samting. Hem sei: ‘Taem iufala lukim olketa army stap raonem Jerusalem, iufala savve olketa klosap nao for distroem taon hia. Datwan hem taem nao for lusim Jerusalem and ranawe go long olketa maunten.’—Luke 21:20-22.

Olsem Jesus talem, olketa army kam for attakim Jerusalem. Olketa army bilong Rome stap raonem hem. Then, no eniwan savve why, bat, olketa soldia lusim datfala ples. Klosap evri pipol ting hem sef nao. So olketa gohed stap nomoa long datfala taon. Bat wanem nao Jesus sei olketa shud duim?— Wanem nao bae iu duim sapos iu stap long Jerusalem?— Pipol wea barava bilivim Jesus lusim haos bilong olketa and ranawe go long olketa maunten wea stap farawe from Jerusalem.

 For wanfala full year, no eni samting happen long Jerusalem. Long mek-tu year, no eni samting happen. And long mek-thri year, no eni samting happen. Maet samfala pipol ting olketa wea lusim taon olketa krangge. Bat then long mek-foa year, olketa army bilong Rome kam bak and raonem moa Jerusalem. Hem barava leit nao. Hard for olketa ranawe. Olketa army distroem datfala taon. Klosap evri pipol wea stap insaed dae, and olketa tekem olketa narawan for prisoner.

Bat waswe long olketa wea obeyim Jesus?— Olketa sef. Olketa stap farawe from Jerusalem. Dastawe no eni samting spoelem olketa. Wei for obey protectim olketa.

Waswe, bae iu kasem protection tu, sapos iu obey?— Dadi and mami maet talem iu for no plei long road, river, or sea. Why nao olketa talem datwan?— Hem bikos nogud eni car bangam iu or iu draon  and dae. Bat maet wanday iu ting: ‘Distaem no eni car long road. Car bae no bangam mi. Olketa nara pikinini plei long road, river, or sea and mi nating lukim car bangam eniwan or eniwan draon and dae.’

Datwan nao tingting bilong klosap evri pipol long Jerusalem. Bihaen olketa army bilong Rome lusim datfala ples, hem luk olsem hem sef. Olketa narawan gohed stap long datfala taon. So olketa stap tu. Olketa kasem warning finis, bat olketa no lisin. From diswan olketa dae.

Iumi storyim nara example moa. Waswe, enitaem iu plei witim masis?— Maet hem luk naes for lukim fire taem iu laetem masis. Bat for plei witim masis hem danger tumas. Full haos savve bone, and iu savve dae!

Remember, for obey samfala taem nomoa hem no inaf. Bat sapos iu evritaem obey, datwan bae barava protectim iu. And hu nao talem iu, “Olketa pikinini obeyim dadi and mami bilong iufala”?— God nao ia. And, remember, hem talem datwan bikos hem lovem iu.