TAPUSQAYKI, ¿imatapas munasqallaykiman hinachu ruwayta munanki?...

Ichaqa, ¿imataq allin kanman? ¿Munasqallaykiman hina imatapas ruwaychu icha tayta-mamaykipa kamachisusqaykita kasukuychu?... Jehova Diosqa tayta-mamanchikta kasukunanchikpaqmi kamachiwanchik. Chaymi imanasqa chayna kamachiwasqanchikmanta kaypi rimasunchik.

¿Hayka wataykipitaq kachkanki? ¿Hayka watanpitaq tayta-mamayki hinaspa abuelitoykikuna kachkan?... Paykunaqa qanmanta aswan unay wataña kawsakusqankuraykum imatapas allinta yachanku. Mayya paykunapa sapa wata imapas yachasqankuqa kachkan. Chaymi warmakunaqa yuyayniyuqkunamanta imatapas yachanmanku.

¿Riqsinkichu pipas sullkayki kaqta? ¿Mayqannikichiktaq aswan yachayniyuq kankichik?... ¿Imanasqa?... Qampas paymanta aswan unay wataña kawsakusqaykiraykum imatapas allinta yachanki.

 ¿Pitaq ñuqanchikmantapas aswan puntamantaraq kawsakuqqa?... Jehova Diosmi. Paymi pimantapas aswan yachayniyuqqa. Chaymi paypa imapas kamachiwasqanchikqa sasaña kasukuy kaptinpas allinninchikpaq. Jesuspas huk kutipim taytan kasukuypi sasachakurqa, ¿yacharqanki?...

Chay kutipim Jesusqa sasa kamachikuyta ruwanan karqa. Kay dibujopi qawasqanchikman hinam, Jesusqa taytanta mañakuspan nirqa: “Taytáy, munaspaykiqa kay vasotayá [utaq sasachakuytayá] ñuqamanta asuriykachiy”, nispa. Chayna nisqanwanmi Jesusqa qawachichkarqa Diosta kasukuy wakinpi sasa kasqanta. Ichaqa, ¿imatam ruwarqa?...

Nirqam: “Amayá ñuqapa munasqaychu ruwasqaqa kachun, aswanqa qampa munasqaykiyá”, nispa (Lucas 22:41, 42). Imaña kaptinpas Jesusqa Diospa munaynin ruwasqa kananta munaspam kasukurqa, manam kikinpa munasqantachu ruwarqa.

¿Imatam kayqa yachachiwanchik?... Wakinpi sasa kaptinpas Diosta kasukuy imamantapas aswan allin kasqantam. Chaymantapas yachachiwanchikmi Jehova Dioswan Jesusqa mana chaynalla kasqankutapas, ¿yacharqanki?...

Jehova Diosta kasukuspaqa kuyasqanchiktam qawachisun. Bibliam nin: “Diosta kuyayqa kamachikuyninkunata kasukuymi, kamachikuyninkunaqa manam llumpay sasachu”, nispa (1 Juan 5:3). Chaynaqa Jehova Diostam kasukunanchik. ¿Qamqa pay kasukuytachu munanki?...

 Bibliapim qawasunchik warmakunaman Diospa imam nisqanta. Efesios 6:1-3 versiculokamam nin: “Wawa-churikuna, señorninchikpa munayninman hinayá tayta-mamaykichikta kasukuychik, chayqa allinpunim. Promesayuq punta kaq kamachikuymi nin: ‘Tayta-mamaykita respetay’, nispa. Chay promesaqa nintaqmi: ‘Chaynapi allin kanaykipaq hinaspa kay pachapi unayta kawsanaykipaq’”, nispa.

Kaypi nisqanman hinam kikin Jehova Dios nisuchkanki tayta-mamaykita kasukunaykipaq. Chaynata ruwaspam respetasqaykita qawachichkanki. Kasukuspaykiqa Diospa nisqanman hinam imamantapas hawka kanki.

Willasqayki Jerusalen llaqtapi yachaq wakin runakunamanta. Paykunam kasukuq kasqankurayku wañuymanta lluptirqaku. Ichaqa, Jerusalen llaqtapi yachaq yaqa lliw runakunam Diostaqa mana kasukuqkuchu. Chaymi Jesusqa willakurqa chay llaqta purmachisqa kananmanta. Willakurqataqmi Diosta kasukuqkuna mana wañunankupaq ima ruwanankumantapas. Kaynatam nirqa: ‘Jerusalen llaqtata tropakuna muyurirusqanta rikuspaykichikqa, yachaychikyá purmachisqa kananmantaña. Hinaspa Jerusalen llaqtamanta lluqsikuychik’, nispa (Lucas 21:20-22).

Jesuspa nisqanman hinam Roma nacionpi tropakunaqa Jerusalen llaqtata muyurirurqaku. Ichaqa manapas unaymantam chay tropakunaqa pasakurqaku. Chaymi Jerusalenpi yaqa llapallan runakunaqa hawkaña kanankuta piensaspanku mana ayqikurqakuchu. Ichaqa, ¿ima ruwanankupaqmi Jesusqa nirqa?... ¿Imatam qamqa ruwawaq karqa?... Jesuspa nisqanta kasukuqkunaqa wasinkuta saqispankum Jerusalenmanta urqukunaman ayqikurqaku.

Huk wataña... iskay wataña... kimsa watañam karurqa, ichaqa manam imapas karqaraqchu. Chayraykuchá runakunaqa ayqikuqkunata  paqway upakuna kasqankupaq hapirqaku. Ichaqa qatiqnin watamanmi Roma nacionpi tropakuna kaqmanta Jerusalenta muyurirurqaku. Hinaptinmi pipas ayqikuytaqa manaña atirqakuñachu. Roma nacionpi tropakunaqa Jerusalen llaqtatam puchukachiyta qallaykurqaku. Llaqtantin runata wañuchispam puchuqnintaqa presochaspa apakurqaku.

Ichaqa, ¿imaynataq kachkarqaku Jesusta kasukuqkunaqa?... Paykunaqa kasukuq kasqankuraykum Jerusalenmanta karupi kachkarqaku, chayraykum mana wañurqakuchu.

¿Kasukuq kaynikiqa allinchu kanman?... Ichapas tayta-mamayki carropa purinanpi ama pukllanaykipaq nisunki. ¿Imanasqa? Mana sarurusunaykita munaspam. Ichapas huk punchaw niwaq: “Ñuqataqa manam saruwanqachu. Wakin warmakunatapas manataq sarunchu”, nispa.

 Yaqa chaynata nispankum Jerusalen llaqtapi runakunapas Diosta mana kasukurqakuchu. ¿Yuyachkankichu qallariypiqa Roma nacionniyuq tropakuna Jerusalenmanta kutikusqankuta? Chayta qawaspankum wakinqa nirqaku hawkayaypiña kasqankuta. Ichaqa Jerusalenmanta lluqsinankupaq willasqa kaspankupas, mana uyarisqankuraykum wañurqaku.

¿Haykallapipas fosforowan pukllarqankichu?... Ichapas nina ratasqanrayku sumaqcha rikchakapusunkiman. Ichaqa manam allinchu kanman chaywan pukllayqa, wasiki ruparuptinmi qampas ruparuspa wañuruwaq.

Ama qunqaychu. Manam waki-wakillanpichu kasukuna, aswanqa sapa kutim kasukunanchik. ¿Pitaq nin: “Wawa-churikuna, [...] tayta-mamaykichikta kasukuychik”, nispa?... Arí, Jehova Diosmi. Payqa kuyasusqaykiraykum chayta kamachisunki.