¿UTS wa ta tʼaan ka a beet chéen le baʼax a kʼáat yéetel maʼ u yaʼalaʼaltech baʼax unaj a beetik? Aʼalten u jaajil...

² Baʼaleʼ ¿baʼax maas maʼalob ka a beete? ¿A beetik wa chéen baʼax a kʼáat? ¿Wa maas ku bintech utsil ken a beet baʼax ku yaʼalik a taataʼob?... Dioseʼ ku yaʼalik kʼaʼabéet u yuʼubaʼal u tʼaan le taatatsiloʼoboʼ, le oʼolal wa letiʼ aʼalikeʼ yaan wal baʼax oʼolal unaj u beetaʼaleʼ. Koʼoneʼex ilik bey baʼax oʼolaleʼ.

³ ¿Jaypʼéel jaʼab yaantech?... ¿A wojel wa jaypʼéel jaʼab yaan tiʼ a taataʼob wa tiʼ a abueloʼob?... Letiʼobeʼ maas yaʼab jaʼaboʼob tsʼoʼok u kuxtaloʼob tiʼ teech. Wa maas yaʼab jaʼaboʼob ku kuxtal máakeʼ maas yaʼab baʼaloʼob jeʼel u páajtal u kanikeʼ. Cada jaʼabeʼ ku yuʼubik, ku yilik yéetel maas táan u yaʼabtal baʼaxoʼob ku beetik. Le oʼolal le mejen paalaloʼoboʼ jeʼel u páajtal u kaanbaloʼob tiʼ le nukuch máakoʼoboʼ.

⁴ ¿Yaan wa máax a kʼaj óol maas chichan tiʼ tech?... ¿Maas wa yaʼab baʼaxoʼob a wojel tiʼ letiʼ?... ¿Baʼaxten?... Tumen tsʼoʼok u maas xáantal káajak a kuxtal yéetel yaʼab baʼaxoʼob tsʼoʼok a kanik.

 ⁵ ¿Máax maas úuchben tiʼ tech, wa tiʼ teen, wa tiʼ uláakʼ máak?... Jéeoba Dios. Letiʼeʼ maas yaʼab baʼax u yojel tiʼ toʼon. Ken u yaʼaltoʼon ka k-beet wa baʼaxeʼ, k-ojel letiʼ u maʼalobil, kex ka talamchajak k-beetik. ¿A wojel wa tak Jesús, le Maʼalob j-Kaʼansaj, talamchaj u yilik u beetik le baʼax aʼalaʼabtiʼoʼ?...

⁶ Teʼ kʼiin jeʼeloʼ Dioseʼ tu yaʼalaj tiʼ Jesús ka u beet junpʼéel baʼax talam. Jeʼex k-ilik teʼ dibujooʼ, Jesuseʼ tu kʼáataj tiʼ Dios ich payalchiʼ: ‹In Yuum, wa a kʼáateʼ luʼsten le talamilaʼ›. Yéetel le tʼaanoʼobaʼ Jesuseʼ tu yeʼeseʼ yaan kʼiineʼ maʼ chéen chʼaʼabil u beetaʼal baʼax ku yaʼalik Diosiʼ. Baʼaleʼ ¿a wojel wa baʼax tu yaʼalaj tu tsʼoʼokbal u oración?...

⁷ Jesuseʼ tu yaʼalaj: «Baʼaleʼ maʼ u beetaʼal baʼax in kʼáat, baʼaxeʼ beetaʼak baʼax a kʼáat» (Lucas 22:41, 42). Jesuseʼ u kʼáat ka úuchuk baʼax u kʼáat Dios, maʼ le baʼax u kʼáat letiʼoʼ. Bey túunoʼ tu beetaj le baʼax u kʼáat Diosoʼ, maʼ le baʼax maas maʼalob u yilik letiʼoʼ.

⁸ ¿Baʼax k-kanik tiʼ lelaʼ?... K-kanikeʼ maas maʼalob ka k-beet baʼax ku yaʼalik Dios, kex maʼ chéen chʼaʼabiliʼ. Baʼaleʼ yaan uláakʼ baʼax ku kaʼansiktoʼon. ¿A wojel wa baʼaxiʼ?... Dios yéetel Jesuseʼ maʼ juntúuliliʼob, jeʼex u yaʼalik jujuntúul máakoʼ. Jéeoba Dioseʼ maas nojoch yéetel maas yaʼab baʼax u yojel tiʼ Jesús, u Hijo.

⁹ Le ken k-beet baʼax ku yaʼalik Dioseʼ, k-eʼesik k-yaabiltmaj. Le Bibliaoʼ ku yaʼalik: «Lelaʼ letiʼe baʼax u kʼáat u yaʼal u yaabiltaʼal Diosaʼ: ka k-tsʼoʼokbes le baʼaxoʼob ku yaʼalikoʼ» (1 Juan 5:3). Bey túunoʼ tuláakloʼon unaj k-uʼuyik u tʼaan Dios. ¿Máasaʼ techeʼ a kʼáat a beet baʼax ku yaʼalik?...

 ¹⁰ Koʼox ilik teʼ Biblia le baʼax ku yaʼalik Dios tiʼ le mejen paalal ka u beetoʼoboʼ. Koʼox xokik Efesoiloʼob, capítulo 6, versículo 1, 2 yéetel 3. Ku yaʼalik: «Paalaleʼex, uʼuyeʼex u tʼaan a taataʼex jeʼex u yaʼalik Yuumtsileʼ, tumen lelaʼ toj tu táan Dios. Jeʼex tsʼíibtaʼanileʼ: ‹Eʼes tsiikil tiʼ a taata yéetel tiʼ a maama›, lelaʼ letiʼe yáax mandamiento ku taasik le promesa jeʼelaʼ: ‹Utiaʼal ka xiʼiktech utsil yéetel utiaʼal ka kuxlakech yaʼabkach kʼiinoʼob way Luʼumeʼ›».

¹¹ Jeʼex a wilkoʼ, Jéeoba Dios aʼaliktech unaj a wuʼuyik u tʼaan a taataʼob. ¿Baʼax u kʼáat u yaʼal u yeʼesaʼal «tsiikil» tiʼob? U kʼáat u yaʼal u yuʼubaʼal u tʼaanoʼob. Dioseʼ ku yaʼalikeʼ wa ka wuʼuyik tʼaaneʼ yaan u bintech utsil.

¹² Nikaʼaj in tsikbalttech bix úuchik u salvartikuba junjaats máakoʼob úuchik u yuʼubikoʼob tʼaan. Tiʼ kajaʼanoʼob kaʼach tu úuchben kaajil Jerusaleneʼ. U maas yaʼabil tiʼ le máaxoʼob kajaʼanoʼob kaʼachoʼ maʼatech u beetkoʼob baʼax ku yaʼalik Dios. Le oʼolal Jesuseʼ tu yaʼalajtiʼob yaan u xuʼulsaʼal le noj kaaj tumen Diosoʼ. Tsʼoʼoleʼ tu tsolaj xan bix jeʼel u salvartikuba le máaxoʼob beetik baʼax maʼaloboʼ. Tu yaʼalajtiʼob: ‹Ken a wileʼex jelekbal le soldadoʼob tu baʼpach Jerusalenoʼ, ojéelteʼex tsʼoʼok u náatsʼal u kʼiinil u xuʼulsaʼaltiʼ. Le máaxoʼob túun yanoʼob Jerusaleneʼ, púutsʼkoʼob utiaʼal ka xiʼikoʼob teʼ puʼukoʼoboʼ› (Lucas 21:20-22).

¹³ Jeʼex aʼalaʼabik tumen Jesusoʼ, u soldadoiloʼob Romaeʼ tu baʼpachtoʼob u kaajil Jerusalén. Baʼaleʼ maʼ xáanchajeʼ ka lukʼoʼobiʼ, lelaʼ maʼ ojéelaʼan baʼaxten tu beetoʼobiʼ. U maas yaʼabil le máakoʼoboʼ tu tukloʼobeʼ maʼ kun xuʼulsbil tiʼ le kaajoʼ, ka pʼáatoʼobiʼ. Baʼaleʼ ¿baʼax tu yaʼalaj Jesús ka u beetoʼob kaʼachi?... ¿Baʼax jeʼel a beetik wa tiʼ kajaʼanech kaʼach Jerusaleneʼ?... Le máaxoʼob tu creertoʼob le baʼaxoʼob tu yaʼalaj Jesusoʼ tu pʼataj u yotochoʼob ka binoʼob teʼ puʼukoʼob yanoʼob náach tiʼ Jerusalenoʼ.

 ¹⁴ Máan junpʼéel jaʼabeʼ, mix baʼal úuch Jerusalén. Teʼ tu kaʼapʼéel jaʼab yéetel teʼ tu yóoxpʼéeloʼ mix baʼal xan úuchiʼ. Yanoʼobeʼ joʼopʼ u tuklikoʼobeʼ le máaxoʼob lukʼoʼoboʼ maʼ tu yóol yanoʼobiʼ. Baʼaleʼ teʼ tu kanpʼéel jaʼaboʼ, u soldadoiloʼob Romaeʼ suunajoʼobeʼ ka tu baʼpachtoʼob Jerusalén tu kaʼatéen. Teʼ kʼiin jeʼeloʼ mix máak páajchaj u púutsʼul. Le soldadoʼoboʼ tu xuʼulsoʼob tiʼ le noj kaajoʼ. U maas yaʼabil u kajnáaliloʼobeʼ kíimoʼob yéetel le maʼ kíimoʼoboʼ bisaʼaboʼob palitsiltbil.

¹⁵ Baʼaleʼ ¿baʼax úuch tiʼ le máaxoʼob tu creertoʼob le baʼax tu yaʼalaj Jesusoʼ?... Mix baʼal, letiʼobeʼ náach yaniloʼob tiʼ Jerusalén, le oʼolal tu salvartubaʼob. Úuchik u yuʼubikoʼob tʼaaneʼ kanáantaʼaboʼob.

¹⁶ ¿Jeʼel wa a kanáantaʼal xan wa ka wuʼuyik tʼaaneʼ?... Maʼ xaaneʼ a taataʼobeʼ tsʼoʼok u yaʼalikoʼobtech maʼ a jóokʼol báaxal yóoʼ bej. ¿Baʼaxten?... Tumen jeʼel u beetaʼaltech loob tumen junpʼéel cocheeʼ. Baʼaleʼ maʼ xaaneʼ yaan kʼiineʼ jeʼel a tuklikeʼ: «Beoraaʼ minaʼan mix junpʼéel  coche ku máan. Maʼ kun úuchulten mix baʼal. Yaan uláakʼ paaloʼob ku báaxaloʼob teʼ yóoʼ bejoʼ, mix juntéen úuchuk tiʼob mix baʼal».

¹⁷ Leloʼ letiʼe baʼax tu tuklaj u maas yaʼabil le máaxoʼob kajaʼanoʼob kaʼach Jerusalenoʼ. Le ka bin le soldadoʼoboʼ, ilaʼab bey mix baʼal kun úuchul kaʼacheʼ. Le ka ilaʼab tumen u maasil yaan máaxoʼob ku pʼáatloʼobeʼ ka pʼáatoʼob xaniʼ. Kex aʼalaʼan baʼax unaj u beetkoʼobeʼ, maʼ tu yuʼuboʼob tʼaaniʼ, yoʼolal leloʼ kíimoʼob.

¹⁸ Tuukulnakoʼon xan tiʼ uláakʼ baʼal. ¿Yaan wa kʼiin tsʼoʼok a báaxtik fósforo?... Maʼ xaaneʼ jatsʼuts a wilik le kʼáakʼ ken a tʼab junpʼéeloʼ. Baʼaleʼ sajbeʼentsil u báaxtik máak fósforo. Tumen jeʼel a tóokik a wotocheʼ, yéetel jeʼel tak a peʼertik a kuxtaleʼ.

¹⁹ Kʼaʼajaktecheʼ, maʼ chéen wa baʼax kʼiin unaj u yuʼubik tʼaan máakiʼ. Le baʼax jeʼel u kanáantkechoʼ letiʼe ka wuʼuy tʼaan mantatsʼoʼ. Yéetel ¿máax aʼalik: «Paalaleʼex, uʼuyeʼex u tʼaan a taataʼex»?... Dios. Maʼ u tuʼubultecheʼ letiʼeʼ ku yaʼalik tumen u yaabiltmech.