HIHI nĩ ũrĩ werũo nĩ mũndũ wĩke ũndũ ũtarĩ mwega?— Hihi nĩ aakũringĩrĩirie ũwĩke? Kana hihi agĩkwĩra weka ũguo nĩ ũgũkena na atĩ ndũgũkorũo ũgĩka ũũru?— Rĩrĩa mũndũ atwĩra twĩke ũndũ ta ũcio, akoragwo agĩtũgeria.

Twagĩrĩirũo nĩ gwĩka atĩa rĩrĩa twagerio? Hihi nĩ twagĩrĩirũo gwĩtĩkĩra gwĩka ũũru?— Tũngĩka ũguo Jehova Ngai ndangĩkena. No nĩ ũĩ nũũ ũngĩkena?— Shaitani nĩwe ũngĩkenio nĩ ũndũ ũcio.

Shaitani nĩ thũ ya Ngai, na nĩ thũ itũ o na ithuĩ. Tũtingĩhota kũmuona tondũ nĩ kĩũmbe kĩa roho. No we nĩ ahotaga gũtuona. Mũthenya ũmwe Mũcukani nĩ aaririe na Jesu, Mũrutani Ũrĩa Mũnene, akĩenda kũmũgeria. Reke tuone ũrĩa Jesu eekire. Tweka ũguo nĩ tũkũmenya ũrĩa twagĩrĩirũo nĩ gwĩka rĩrĩa twagerio.

Hingo ciothe Jesu eendaga gwĩka wendi wa Ngai. Onanirie ũguo mbere ya andũ rĩrĩa aabatithirio rũũĩ-inĩ rwa Jorodani. Thutha wa Jesu kũbatithio nĩrĩo mũcukani aamũgeririe. Bibilia yugaga atĩ Jesu aarĩkia kuumĩra maĩ-inĩ, “igũrũ rĩkĩhingũka” nĩ ũndũ wake. (Mathayo 3:16) No kũhoteke atĩ hĩndĩ ĩyo, Jesu nĩ aambĩrĩirie kũririkana ũtũũro wake wa hau kabere arĩ igũrũ hamwe na Ngai.

 Thutha wa Jesu kũbatithio, nĩ aathiire werũ-inĩ nĩguo hihi ecirie ũhoro wa maũndũ macio aambĩrĩirie kũririkana. Aaniinire mĩthenya mĩrongo ĩna kũu. Hĩndĩ ĩyo yothe Jesu ndaarĩire kĩndũ, kwoguo aarĩ mũhũtu mũno. Hĩndĩ ĩyo nĩrĩo Shaitani okire kũmũgeria.

Mũcukani aamwĩrire ũũ: “Angĩkorũo ũrĩ mũrũ wa Ngai, garũra mahiga maya matuĩke mĩgate.” Hĩndĩ ĩyo nĩ angĩendire mũno kũrĩa mũgate! No hihi Jesu nĩ angĩahotire kũgarũra mahiga matuĩke mĩgate?— Ĩĩ nĩ angĩahotire. Nĩkĩ? Nĩ tondũ Jesu, Mũrũ wa Ngai, aarĩ na hinya wa mwanya.

Korũo nĩ wee Mũcukani eerire ũgarũre ihiga rĩtuĩke mũgate-rĩ, nĩ ũngĩekire ũguo?— Jesu aarĩ mũhũtu. Kwoguo-rĩ, githĩ ndũngĩonekire ũrĩ ũndũ mwega gwĩka ũguo riita rĩmwe tu?— Jesu nĩ aamenyaga atĩ kũhũthĩra hinya wake na njĩra ĩyo ti wega. Jehova aamũhete hinya ũcio ũrĩ wa kũgucĩrĩria andũ harĩ Ngai, no ti wa kwĩguna we mwene.

Kwoguo Jesu eerire Shaitani ũrĩa kwandĩkĩtwo thĩinĩ wa Bibilia atĩrĩ: “To mũgate wiki ũngĩtũũria mũndũ muoyo, no nĩ kiugo gĩothe kiumaga kanua-inĩ ka Jehova.” Jesu nĩ aamenyaga atĩ gũkenia Jehova nĩguo ũndũ ũrĩa wa bata gũkĩra gũkorũo na irio cia kũrĩa.

 No Mũcukani nĩ aamũgeririe rĩngĩ. Aatwarire Jesu Jerusalemu akĩmũrũgamia igũrũ rĩa hekarũ. Shaitani agĩcoka akĩmwĩra ũũ: ‘Angĩkorũo ũrĩ mũrũ wa Ngai, wĩgũithie thĩ. Tondũ nĩ kwandĩke atĩ araika a Ngai nĩ magakũnyitĩrĩra nĩguo ndũkaringwo.’

Shaitani oigire ũguo nĩkĩ?— Oigire ũguo tondũ eendaga Jesu eke ũndũ ũtarĩ wa ũũgĩ. O rĩngĩ Jesu akĩrega gũthikĩrĩria Shaitani. Eerire Shaitani ũũ: “Maandĩko moigaga atĩrĩ: ‘Ndũkanagerie Jehova Ngai waku.’” Jesu nĩ aamenyaga atĩ nĩ ũũru kũingĩria muoyo wake ũgwati-inĩ nĩguo agerie Jehova.

O na kũrĩ ũguo, Shaitani ndaatiganire nake. Aacokire agĩtwara Jesu kĩrĩma-inĩ kĩraihu mũno. Akĩmuonia mothamaki kana thirikari cia thĩ ciothe na riri wacio. Shaitani agĩcoka akĩra Jesu ũũ: “Maũndũ maya mothe nĩ ngũkũhe ũngĩndurĩria maru ũthathaiye.”

Ta wĩcirie ũndũ ũcio Shaitani oigire. Hihi mothamaki kana thirikari ciothe cia andũ nĩ cia Shaitani?— Jesu ndoigire atĩ ti cia Shaitani. No korũo itiarĩ ciake, Jesu nĩ angĩoigire ũguo. Shaitani nĩwe wathaga mabũrũri mothe ma thĩ. Bibilia o na nĩ ĩmwĩtaga “mũnene wa thĩ ĩno.”—Johana 12:31.

Wee ũngĩka atĩa Mũcukani angĩkwĩra nĩ egũkũhe kĩndũ wamũthathaiya?— Jesu nĩ aamenyaga atĩ nĩ ũũru gũthathaiya Mũcukani o na angĩkorũo nĩ ekũheo kĩheo. Kwoguo Jesu akĩmwĩra ũũ: ‘Thiĩ, Shaitani! Tondũ Bibilia yugaga atĩ nĩ Jehova Ngai waku wagĩrĩirũo gũthathaiya, na nowe wiki wagĩrĩirũo gũtungatĩra.’—Mathayo 4:1-10; Luka 4:1-13.

O na ithuĩ nĩ tũcemanagia na magerio. Hihi nĩ ũĩ magerio macio nĩ ta marĩkũ?— Reke ngũhe ngerekano. Mami wanyu ahota kũruga cabaci irĩ na cama mũno. No akwĩre ndũkarĩe o na ĩmwe nginya hĩndĩ ya kũrĩa ĩkinye. No tondũ wĩ mũhũtu mũno, no ũigue ũkĩenda  kũrĩa. Hihi no wathĩkĩre mami wanyu?— Shaitani no ende wage gwathĩkĩra mami wanyu.

Ririkana Jesu o nake aarĩ mũhũtu mũno. No nĩ aamenyaga atĩ gũkenia Ngai warĩ ũndũ wa bata gũkĩra kũrĩa. Rĩrĩa wathĩkĩra mami wanyu, wonanagia atĩ nĩ ũregerekania na Jesu.

Ciana imwe no ikwĩre ũgucie bangi. Ciahota gũkwĩra atĩ nĩ ĩgũtũma ũigue wega mũno. No  bangi ti njega o na hanini. No ĩtũme ũrware o na kana ũkue. Ningĩ mũndũ no akwĩre ũgucie thigara, na o nayo ti njega. Ũngĩka atĩa?—

Ririkana atĩ Shaitani eendaga Jesu aingĩrie muoyo wake ũgwati-inĩ rĩrĩa aamwĩrire egũithie thĩ kuuma hekarũ igũrũ. No Jesu ndekire ũguo. Wee ũngĩka atĩa mũndũ angĩkwĩra wĩke ũndũ ũngĩkũingĩria ũgwati-inĩ?— Jesu ndaathikĩrĩirie Shaitani. O nawe ndwagĩrĩirũo gũthikĩrĩria mũndũ ũrakwĩra wĩke maũndũ moru.

Mũthenya ũmwe no wĩrũo ũthathaiye mũhianano, kana ũine rwĩmbo rwa bendera, na Bibilia nĩ ĩtwĩraga tũtikaneke ũguo. (Thama 20:4, 5) Ũndũ ũcio no wĩkĩke rĩrĩa mũrĩ cukuru. O na no wĩrũo nĩ ũkũingatwo cukuru warega gwĩka ũguo. Ũngĩka atĩa?—

Nĩ ũndũ mũhũthũ gwĩka ũndũ ũrĩa wagĩrĩire angĩkorũo ũguo nĩguo andũ arĩa angĩ mareka. No ti ũndũ mũhũthũ gwĩka ũrĩa kwagĩrĩire rĩrĩa andũ arĩa angĩ maratwĩra twĩke ũrĩa gũtagĩrĩire. Mahota kuuga atĩ ũndũ ũrĩa mareka ti mũru mũno. No kĩũria kĩa bata kĩrĩa wagĩrĩirũo kwĩyũria nĩ gĩkĩ, Ngai onaga atĩa ũndũ ũcio? Ngai nĩwe ũĩ ũndũ ũrĩa mwega biũ.

Kwoguo, o na andũ arĩa angĩ mangiuga atĩa, tũtiagĩrĩirũo gwĩka maũndũ marĩa Ngai oigaga nĩ moru. Na njĩra ĩyo, nĩ tũrĩkenagia Ngai hingo ciothe, na gũtirĩ hĩndĩ tũgaakenia Mũcukani.