MBELA ope na efiku limwe wa li wa pulwa kuumwe u ninge sha sha puka? —  Mbela okwa li e ku fininika u shi ninge? Ile okwa li e ku lombwela kutya otashi ka kala shihafifa oku shi ninga noitashi ka kala lela sha puka oku shi ninga? —  Ngeenge umwe te tu lombwele ngaho, ote tu yeleke.

Ndele mbela otu na okuninga po shike ngeenge hatu yelekwa? Mbela otu na okuliefela meyeleko ndele hatu ningi osho sha puka? —  Ngeenge otwa ningi ngaho, itatu ka hafifa Jehova Kalunga. Ndele mbela ou shi shii kutya olyelye ta ka kala a hafa ngeenge otwe liefele meyeleko? —  OSatana Ondiaboli.

Satana omutondi waKalunga noku li yo omutondi wetu. Itatu dulu oku mu mona, molwaashi oku li oshishitwa shopamhepo, ndele ye ota dulu oku tu mona. Efiku limwe Ondiaboli oya li ya popya naJesus, Omuhongi Munene, noya li ya kendabala oku mu yeleka. Natu ka tale kutya Jesus okwa li a ninga po shike. Nokungaho, ohatu dulu okulihonga osho hatu dulu okuninga po ngeenge hatu yelekwa.

Jesus okwa li ha kala alushe a hala okulonga ehalo laKalunga, naasho okwa li e shi ulika moipafi eshi a li a ninginifwa momulonga waJordan. Satana okwa li a kendabala okuyeleka Jesus, diva konima ashike eshi opo a ninginifwa. Ombibeli oya ti: ‘Eulu ola li la yeulukila’ Jesus. (Mateus 3:16) Osho otashi dulika sha hala okutya Jesus okwa li a hovela okudimbuluka okukalamwenyo kwaye akushe kwomeulu eshi a li pamwe naKalunga.

 Konima yokuninginifwa kwaye, Jesus okwa li a ya mombuwa opo a ka dilonge kombinga yoinima oyo a li a dimbuluka. Okwa li a kala mombuwa omafiku omilongo nhe. Efimbo alishe olo Jesus ka li a lya sha nokwa li a fya ondjala neenghono. Pomhito opo, Satana okwa li a kendabala oku mu yeleka.

Ondiaboli oya li ye mu lombwela ya ti: ‘Ove ngeenge Omona waKalunga, lombwela hano omamanya aa a shituke omingome.’ Molwaashi Jesus okwa li a fya ondjala neenghono, osha yela kutya okwa li ta ka kala a hala okulya. Mbela Jesus okwa li ta dulu okushitukifa omamanya omingome? — Heeno, okwa li ta dulu. Omolwashike taku dulu okutiwa ngaho? Omolwaashi Jesus, Omona waKalunga, okwa li e na eenghono de likalekelwa.

Ngeno okwa li oove, mbela ngeno owa shitukifa omamanya omingome eshi wa lombwelwa kOndiaboli u shi ninge? —  Jesus okwa li a fya ondjala. Mbela ngeno osha ka kala sha puka okuninga osho Ondiaboli ya li ye mu lombwela? —  Jesus okwa li e shi shii kutya osha puka okulongifa eenghono daye monghedi ya tya ngaho. Jehova okwa li e mu pa eenghono odo opo a nanene ovanhu kuKalunga, ndele haku di longifa omolwouwa waye mwene.

Ponhele yokuninga osho a li a lombwelwa kuSatana, Jesus okwa li e mu lombwela osho sha shangwa mOmbibeli a ti: “Hakomungome auke omunhu ta kala e nomwenyo, ndelenee okondjovo keshe tai di mokanya kaKalunga.” Jesus okwa li e shii kutya okulonga osho tashi hafifa Jehova osha fimana neenghono shi dulife oikulya.

 Ondiaboli oya li ya kendabala natango okuyeleka Jesus. Pomhito oyo, oya li ya twala Jesus kuJerusalem noya li ye mu londeka kombada yotembeli. Oya ti: ‘Ove ngeenge Omona waKalunga, nukila poshi, osheshi okwa shangwa kutya ovaengeli vaKalunga otave ke ku amena uha yahamekwe.’

Omolwashike Satana a li a popya eendjovo odo? —  Okwa li a popya eendjovo odo opo a yeleke Jesus a ninge oshinima shihe li pandunge. Ndele nande ongaho, Jesus ka li a pwilikina kuSatana. Okwa li e mu lombwela a ti: ‘Okwa shangwa: Ino shinda Omwene Kalunga koye.’ Jesus okwa li e shii kutya osha puka okuyeleka Jehova mokutula omwenyo waye moshiponga.

Natango Satana ka li a sholola. Okwa li a twala Jesus komhunda yonhumba ile neenghono, ndele te mu ulikile omauhamba aeshe, ile omapangelo ounyuni aeshe nosho yo efimano lao. Ndele Satana ta lombwele Jesus a ti: “Aishe ei ohandi i ku pe, ngenge to twile nge eengolo ndee to linyongamene nge.”

Diladila kwaasho Ondiaboli ya li tai yandje kuJesus. Mbela omauhamba ile omapangelo opanhu aeshe oo okwa li ngoo aSatana shili? —  Jesus ka li a anya kutya kae fi aSatana. Ngeno omauhamba oo kaa li aSatana, ngeno Jesus okwe a tambula ko. Heeno, Satana oye shili omupangeli woiwana aishe younyuni. Ombibeli otai mu ifana “omupangeli wounyuni ou.” — Johannes 12:31.

Mbela oto ka ninga po shike ngeenge Ondiaboli oye ku udanekele oku ku pa sha ngeenge owe i longele? —  Jesus okwa li e shii kutya osha puka okulongela Ondiaboli, kashi na nee mbudi kutya okwa li ta ka pewa shike. Onghee hano, Jesus okwa ti: ‘Dja po, Satana, osheshi Ombibeli oya ti kutya Omwene Kalunga koye oye aeke u na oku mu twila eengolo, noye aeke u na okulongela.’ — Mateus 4:1-10; Lukas 4:1-13.

Nafye ohatu shakeneke omayeleko ngaashi Jesus. Mbela ou shii kutya amwe omomayeleko oo oelipi? —  Natu ka tale koshihopaenenwa shimwe. Natu tye nee ngeno meme woye okwa teleka ombelela, ndele te ku lombwele kutya ino i lya mo mombiya teelela ashike efimbo lokulya li fike. Otashi dulika u kale wa fya ondjala neenghono, noto ka kala wa hala oku i lya mo. Mbela oto ka dulika kumeme woye? —  Satana ina hala u dulike kumeme woye.

 Dimbuluka kutya Jesus naye okwa li a fya ondjala neenghono. Ndele Jesus okwa li e shii kutya okuhafifa Kalunga okwa fimana neenghono shi dulife okulya. Ngeenge owa ningi ngaashi meme woye te ku lombwele, oto ulike kutya oto hopaenene Jesus.

Ounona vamwe otashi dulika ve ku pe oingangamwifi. Otashi dulika ve ku lombwele kutya ngeenge owe i longifa oto ka kala u udite nawa. Ndele oingangamwifi oyo otai dulu oku ku ehameka ile i ku dipae nokuli. Ile otashi dulika umwe e ku pe  okashekeleta oko ka longwa moingangamwifi, ndele te ku fininike u shile okashekeleta oko. Mbela oto ka ninga po shike? — 

Dimbuluka kutya Satana okwa li a kendabala okuningifa Jesus a tule omwenyo waye moshiponga eshi a li e mu lombwela a nuke ko kotembeli. Ndele Jesus ka li e shi ninga. Mbela oto ka ninga po shike ngeenge omunhu ote ku fininike u ninge oshinima shonhumba sha nyika oshiponga? — Jesus ka li a pwilikina kuSatana. Naave ku na okupwilikina kukeshe oo ta kendabala oku ku ningifa oinima oyo inai yuka.

Efiku limwe otashi dulika u pulwe u ilikane oshihongwafano shonhumba, oshinima osho Ombibeli tai ti kutya inatu shi ninga. (Exodus 20:4, 5) Otashi dulika u pulwe u shi ninge nande okofikola omolwoshiningwanima she likalekelwa. Otashi dulika u lombwelwe nokuli kutya ino ya ko vali kofikola ngeenge owa anye oku shi ninga. Mbela oto ka ninga po shike? — 

Oshipu okuninga osho sha yuka ngeenge keshe umwe osho ta ningi. Ndele ohashi kala shidjuu okuninga osho sha yuka ngeenge vamwe otava kendabala oku ku heka u ninge osho inashi yuka. Otashi dulika va tye kutya osho tava ningi inashi puka lela. Ndele epulo la fimanenena oleli kutya: Mbela Kalunga ota ti ngahelipi shi na sha naasho? Kalunga oku shii osho tashi tu wapalele.

Onghee hano, katu na okuninga oinima oyo Kalunga ta ti oya puka, kashi na nee mbudi kutya vamwe otava ti ngahelipi. Kungaho, ohatu ka hafifa alushe Kalunga, nonande Ondiaboli itai ka kala ya hafa.