NSHAPITA WA 9
Tudi ne bua kutantamena mateta
KUKADIKU muntu mukulombe bua kuenza bualu bubi anyi?— Uvuaku mukusake bua kuenza bualu abu anyi? Anyi uvua mukuambile ne: nebikusankishe ne kabiakuikala bibi wewe muenze bualu abu?— Padi muntu utuambila nanku, udi ne meji a kututeta.
Ntshinyi tshitudi mua kuenza padibu batuteta? Tudi mua kuitabakana ne kuenza bualu bubi anyi?— Kabiakusankisha Yehowa Nzambi to. Kadi udi mumanye muntu wasanka anyi?— Satana Diabolo ke wasanka.
Satana mmuluishi wa Nzambi, Satana udi kabidi muluishi wetu. Katuena mua kumumona bualu udi muntu wa mu nyuma. Kadi yeye udi utumona. Dimue dituku Diabolo wakakula ne Yezu, Mulongeshi Munene bua kumuteta. Tumonayi tshivua Yezu muenze. Nanku netumanye bualu buakane bua kuenza padibu batuteta.
Mmalu kayi avua Yezu mua kuikala mutuadije kuvuluka dîba diakatambulaye?
Yezu uvua musue misangu yonso anu kuenza disua dia Nzambi. Wakaleja patoke ne: uvua musue misangu yonso anu kuenza disua dia Nzambi pakatambulaye mu Musulu wa Yadene. Satana wakateta Yezu diakamue panyima pa batismo wende. Bible udi wamba ne: ‘diulu diakabulukila’ Yezu. (Matayo 3:16) Bidi mua kusua kumvuija ne: dîba adi Yezu wakabanga kuvuluka malu onso a tshikondo tshitshivuaye mu diulu ne Nzambi.
Kunyima kua batismo wende Yezu wakaya mu tshipela bua kuela meji pa malu avuaye mutuadije kuvuluka au. Matuku makumi anayi a munya ne butuku akapita. Munkatshi mua matuku onso au Yezu kakadia tshintu, nunku uvua ne nzala mimotole bikole. Ke dîba divua Satana mulue kuteta Yezu adi.
Mmunyi muvua Diabolo muenze mudimu ne mabue bua kuteta Yezu?
Diabolo wakamuambila ne: “Pawikala muana wa Nzambi, tumina mabue aa dîyi andamuke mampa.” Mampa avua mua kuikala mimpe be bua kuadia! Kadi Yezu uvuaku mua kuandamuna mabue alue mampa anyi?— Eyowa, uvua mua kuandamuna. Bua tshinyi? Bualu Yezu Muana wa Nzambi uvua ne bukole bua pa buabu.
Wewe uvua mua kuandamuna mabue alue mampa bu Diabolo muikale mukuambile bua kuenza nanku anyi?— Yezu uvua ne nzala. Nanku kabivuaku mua kuikala bimpe bua kuenzaye bualu ebu nansha musangu umuepele anyi?— Yezu uvua mumanye ne: bivua bibi kuenza mudimu mushindu au ne bukole buvuaye nabu. Yehowa uvua mumupeshe bukole abu bua kukokaye bantu kudi Nzambi, kadi ki mbua kuenza malu avuaye yeye musue to.
Nunku, pamutu pa kuenza nanku, Yezu wakambila Satana malu adibu bafunde mu Bible ne: ‘Muntu kena mua kushala ne muoyo anu bua biakudia nansha; kadi mbua dîyi dionso didi Yehowa wamba.’ Yezu uvua mumanye ne: kuenza malu adi asankisha Yehowa kudi ne mushinga wa bungi kupita kule ne kule mene ne biakudia.
Kadi Diabolo wakateta kabidi. Wakaya ne Yezu ku Yelushalema ne kumubandisha kulu pa mutu pa ntempelo. Pashishe Satana kuambaye ne: ‘Ni udi Muana wa Nzambi, tetabi kudikupa panshi, bualu mbafunde ne: banjelo ba Nzambi nebakukube ku njiwu.’
Bua tshinyi Satana wakamba nanku?— Wakamba nanku bua kuteta Yezu bua enze bualu bua dipanga lungenyi. Kadi apa kabidi Yezu kakateleja Satana to. Wakambila Satana ne: “Mbafunde kabidi ne: Kuteyi Mukalenge Nzambi webe.” Yezu uvua mumanye ne: bivua bibi bua kuteta Yehowa mu ditaba bua kuenza malu avua mua kumushipesha.
Kadi Satana kakapungila to. Pashishe wakaya ne Yezu ku mukuna mule menemene. Ku mukuna aku, kumulejaye makalenge onso ta mbulamatadi ya panu ne butumbi buayi. Satana kuambilaye Yezu ne: ‘Nenkupe bintu ebi bionso, wewe mutue binu biebe panshi munkukuile.’
Elabi meji bua tshivua Diabolo umulaya etshi. Makalenge onso au ta mbulamatadi ya bantu, nya Satana anyi?— Yezu kakelesha mpata ne: kayivua ya Satana to. Uvua mua kuamba ne: ki nyende to bu yoyi kayiyi mikale ya Satana. Eyowa, Satana ke udi mulombodi wa bisamba bionso bia panu. Bible udi mene umubikila ne: “mukokeshi wa buloba ebu.”—Yone 12:31.
Bua tshinyi Satana uvua bua kupesha Yezu makalenge onso aa?
Ntshinyi tshiuvua mua kuenza bu Diabolo mukulaye tshintu kampanda wewe mumukukuile?— Yezu uvua mumanye ne: bivua mua kuikala bibi bua kukukuila Diabolo nansha bikale bua difutu kayi dionso divuaye mua kupeta. Nanku Yezu wakamba ne: ‘Umbuka, Satana! Bible udi wamba ne: anu Yehowa Nzambi webe ke uudi ne bua kutendelela ne kumukuatshila mudimu anu yeye nkayende.’—Matayo 4:1-10; Luka 4:1-13.
Ntshinyi tshiudi mua kuenza wewe mu ditetshibua?
Tutu petu tupeta mateta. Udiku mumanye amue mateta anyi?— Mona tshilejilu etshi. Mamuebe udi mua kuosha mampa anyi kulamba bitumbula bimpe. Udi mua kukuambila ne: kudi bintu abi to, windile too ne pakumbana dîba dia kudia. Kadi bu mudi nzala mikusume bikole, nanku au udi mua kumvua anu muoyo ukusaka bua kubidia. Neutumikile mamuebe anyi?— Satana ki mmusue bua wewe kumutumikila to.
Vuluka bualu bua Yezu. Uvua pende ne nzala mikole. Kadi uvua mumanye ne: kusankisha Nzambi kuvua ne mushinga wa bungi kupita kudia. Udi uleja ne: udi bu Yezu paudi wenza tshidi mamuebe wamba.
Bidi mua kuenzeka ne: bana bakuabu bakuambile bua kunua tumue tumuma tua buanga. Badi mua kukuambila ne: wewe mutunue neudiumvue bimpe. Kadi tumuma atu patu tudi mua kuikala tua diamba. Tudi mua kukusamisha bikole ne nansha mene kukushipesha. Anyi muntu mukuabu udi mua kukupesha mutshi wa makanya, atu pawu ne bintu bifuanangane ne bitu mu diamba, nunku udi mua kukusaka bua wewe kunua makanya au. Newenze tshinyi?—
Vuluka bualu bua Yezu. Satana wakateta kusaka Yezu bua apete mpukampuka ya lufu, kumuambila bua kudikupa panshi kumbukila kulu kua ntempelo. Kadi Yezu kavua mua kuenza nanku to. Udi mua kuenza tshinyi bikala muntu kampanda ukusaka bua kuenza bualu budi mua kukupetesha mpukampuka ya lufu?— Yezu kakateleja Satana to. Nansha wewe kuena ne bua kuteleja muntu nansha umue udi ukusaka bua kuenza malu mabi to.
Bua tshinyi mbibi bua kutendelela ne bimfuanyi?
Dimue dituku badi mua kukulomba bua kukukuila tshimfuanyi kampanda, pabi kuenza nunku mbualu budi Bible wamba ne: katuena ne bua kubuenza to. (Ekesode 20:4, 5) Bidi mua kuenzeka nanku mu bibilu anyi fete itubu benza mu tulasa. Badi mua kukuambila ne: nebakuipate mu kalasa wewe mudidinge mubenge bua kuenza tshidibu bakuambila bua kuenza atshi. Dîba adi newenze tshinyi?—
Bitu bipepele bua kuenza bualu buimpe padi bantu bonso babuenza. Kadi bidi mua kukola menemene bua kuenza bualu buimpe padi bakuabu bakeba bua kutuenzeja malu mabi. Badi mua kuamba ne: bualu budibu benza ki mbubi menemene to. Kadi lukonko lunene lua kudiela ndua se: Ntshinyi tshidi Nzambi wamba bua bualu abu? Yeye mmumanye tshidi tshimpe tshitambe.
Nunku nansha bakuabu bamba tshinyi, katuena ne bua kuenza malu adi Nzambi wamba ne: mmabi nansha. Tuetu tuenza nanku, netuikale dîba dionso tuenza anu malu adi asankisha Nzambi ne katuakuenza adi asankisha Diabolo nansha.
Tudi mua kupeta kabidi malu makuabu a mushindu wa kutantamena mateta a kuenza malu mabi mu Musambu 1:1, 2; mu Nsumuinu 1:10, 11; mu Matayo 26:41 ne mu 2 Timote 2:22.
