¿MAYKʼAJLLAPIS mana allin kajta ruwanaykita nisorqankuchu?... Chayta ruwanaykipaj, ¿tanqasorqankuchu? Chayri “pujllarillasun, mana imapis kanqachu”, ¿nispachu nisorqanku?... Chayta nisojkunaqa, juchaman urmachiyta munasunku.

Juchaman urmachiyta munawajtinchej, ¿imatá ruwasun? ¿Juchata ruwallasunchu?... Juchapi urmaspaqa Jehovata mana kusichisunchu. Chantá, ¿pitaj kusikonqa?... Satanás kusikonqa.

Satanasqa Diospa enemigon. Noqanchejpatapis enemigollanchejtaj. Payqa mana aycha cuerpoyojchu, chayrayku mana rikuyta atinchejchu. Chaywanpis payqa rikuwanchej. Uj kuti, Jesusta juchaman urmachiyta munarqa. Qhawarina imatachus Jesús ruwasqanta. Ajinamanta juchaman tanqasqa kaspa, imatachus ruwanata yachasun.

Jesusqa Diospa munaynintapuni ruwayta munarqa. Chaytataj Jordán mayupi bautizakuspa rikucherqa. Pisi tiemponmantaj, Satanás Jesusta juchaman urmachiyta munarqa. Biblia nin jina, Jesús yakumanta llojsishajtin paypajqa “cielo kicharikorqa” (Mateo 3:16). Ichá chayqa ninayan, cielopi Dioswan kausasqanmanta yuyarikusqanta.

Jesusqa bautizakuytawan chʼinnejman rerqa, ichapis chay yuyarisqanpi tʼukurej. Payqa chaypi  40 diasta, 40 tutastawan mana mikhusqa kaspa yarqhachikorqa. Satanastaj chay kutipi Jesusta juchaman urmachiyta munarqa.

Supayqa Jesusman nerqa: “Diospa Churinchus kanki chayqa, niy kay rumista tʼantaman tukunankuta”, nispa. Jesusqa wañuytachá tʼantata mikhuykunman karqa. Chantá, ¿rumista tʼantaman tukuchiyta atinmanchu karqa?... Arí, Diospa Wawan kasqanrayku atiyniyoj karqa.

Rumista tʼantaman tukuchinaykita Satanás nisojtin, ¿kasuwajchu karqa?... Jesusqa yarqhasqa kasharqa. ¿Manachu chayta ruwanan allillan kanman karqa?... Jesusqa mana allinchu kasqanta yacharqa. Imajtinchus atiyta japʼisqanqa runasta Jehovaman qayllaykuchinanpaj karqa, nitaj allinninta maskʼananpajchu.

Supayta kasunanmantaqa, Jesús nerqa: “Diosmanta Qhelqasqapi nin: Mana tʼantallawanchu runaqa kawsanqa; astawanqa, Diospa siminmanta tukuy llojsimoj palabraswan”, nispa. Jesusqa, mikhunamanta nisqa Jehovata kasukuy aswan allin kasqanta yacharqa.

Supayqa Jesusta ujtawan juchaman urmachiyta munaspa, Jerusalenmanñataj pusarqa. Chantá temploj aswan alto lugarninman pusaspa, nerqa: ‘Diospa Wawanchus kanki chayqa, uraman wijchʼuykukuy,  imaraykuchus qhelqasqa kashan: “Diosqa angelesninta kachamusonqa mana imanakunaykipaj”, nispa’.

¿Imaraykutaj Satanás chayta nerqa?... Payqa munarqa Jesús kausayninta wañuy pataman churananta. Jesustajrí manallataj kasorqachu. Nerqataj: “Qhelqasqallataj kashan: [Jehová] Diosniykita ama pruebaman churankichu”, nispa. Jesusqa yacharqa, kausayninta wañuy pataman churaspa Jehovata pruebaman churayqa, mana allinchu kasqanta.

Supayqa, Jesusta juchaman urmachiytapuni munarqa. Chayrayku jatun orqo patamanñataj pusarqa. Chaymantataj rikucherqa tukuy Jallpʼantinpi kaj reinosta chayri gobiernosta, qhapaj kapuyninkutawan. Nerqataj: “Noqa kay tukuy imata qosqayki, qonqorikuspachus yupaychawanki chayqa”, nispa.

Supaypa nisqanpi tʼukuriy. ¿Paypatachu karqa tukuy chay gobiernos?... Llullakushanman karqa chayqa, Jesusqa “mana qanpatachu” ninman karqa. Jesustaj ni chaytachu nerqa. Imajtinchus Satanaspuni kay pachata kamachishan. Bibliapis “kay pachata kamachejqa” Supay kasqanta nin (Juan 12:31).

Satanás payta yupaychanaykipaj imallatapis qosunanta nisojtin, ¿imatá ruwawaj?... Satanás imata qoyta munawajtinchejpis payta yupaychayqa mana allinchu. Chaytataj Jesús sumajta yacharqa. Chayrayku nerqa: ‘Riy kaymanta, Satanás. Qhelqasqa kashan: “Jehová Diosniykita yupaychanki, payllatataj sirvinki”, nispa’ (Mateo 4:1-10; Lucas 4:1-13).

Noqanchejpis mana allin kajta ruwanapaj tanqasqa kanchej. ¿Yachankichu imaynasmantachus?... Ichá mamayki tortata chayri imallatapis rantispa nisunkiman: “Ama mikhunkichu, chanta mikhusunchej”, nispa. Qantaj yarqhaymanta mikhuykuyta munawaj.  ¿Mamaykita kasunkichu?... Satanasqa mana kasunaykita munanchu.

Jesusmanta yuyarikuy, paypis yarqhasqa kasharqa. Yacharqataj Diosta kusichiy, aswan allin kasqanta mikhunamanta nisqaqa. Mamaykita kasuspaqa Jesús jina ruwanki.

Ichá wawa masisniyki ima pildoratapis jaywasunkiman, “kayta chʼonqarikuy sumaj arí”, nispalla. Chay pildoraqa ichá droga kanman,  chaytaj onqochisunkiman chayri wañuchisunkiman. Manaqa ichá cigarrota jaywasunkuman, pitanaykipajtaj tanqasunkuman. Cigarropis drogayojllataj. ¿Imatá ruwawaj?...

Jesusmanta yuyarikuy. Satanasqa Jesusta templomanta wijchʼuykukunanta nerqa, kausayninta wañuy pataman churananpaj. Jesustaj mana kasorqachu. Pillapis imanarpakunaykipaj jina imatapis ruwanaykita nisojtin, ¿kasuwajchu?... Jesusqa Satanasta mana kasorqachu. Qanpis nillataj kasunaykichu tiyan sajra ruwayman tanqasojtinku.

Ichá maykʼajllapis santosta yupaychanaykita nisunkuman, manaqa desfileman rinaykita. Mana munajtiykitaj, escuelamanta wijchʼusunankuta nisunkuman. ¿Imatá ruwawaj?... Bibliaqa Jehovallata yupaychanata nin (Éxodo 20:4, 5).

Wajkuna allin kajta ruwajtinku, allin kajta ruwayta atillanchej. Sajra kajta ruwanapaj tanqasqa kasparí, mana ruwayta atillanchejchu. Ichá nisunkuman: “Ruwallay, ima juchapunitaj kasqari”, nispa. Jina kajtin, imatachus Dios yuyasqanpi tʼukuriy. Payqa noqanchejmanta astawan yachan.

Runas imata nejtinkupis, Dios juchachan chay imastaqa ni jaykʼaj ruwanachu. Ajinamanta Diosta kusichisun, nitaj Supaytachu.