KAI fakamalosi atu eiloa se tino ke fai ne koe se mea masei?— E mata, ne faimālō ne ia koe ke fai te mea tenā? Io me ne fai atu a ia me se mea gali kae e sē se mea masei ke fai te mea tenā?— Kafai e fai ne se tino a te mea tenei ki a tatou, ko taumafai eiloa a ia o fakaosooso tatou.

Ne a mea e ‵tau o fai ne tatou māfai ko fakaosoosogina tatou? E mata, e ‵tau o fakavāi‵vai tatou kae fai te mea masei?— Ka se fakafiafia atu eiloa te mea tenā ki a Ieova te Atua. Kae e iloa ne koe me ko oi ka fiafia?— Ao, ko Satani te Tiapolo.

A Satani ko te fili o te Atua, kae ko te ‵tou fili foki. E se mafai o lavea ne tatou a ia me i a ia se agaga. Kae e mafai o lavea ne ia tatou. I te aso e tasi ne faipati atu te Tiapolo ki a Iesu, te Faiakoga Sili, kae taumafai ke fakaosooso atu ki a ia. Ke onoono aka tatou me ne a mea ne fai ne Iesu. Ko mafai ei o iloa ne tatou a te mea ‵lei ke fai māfai ko fakaosoosogina tatou.

Ne manako faeloa a Iesu o fai te loto o te Atua. Ne fakaasi faka‵sau atu ne ia a te mea tenei e auala i tena papatisoga i te Vaitafe o Iolitana. Mai tua faeloa o te papatisoga o Iesu ne taumafai ei a Satani o fakaosooso a Ia. E fai mai te Tusi Tapu me “ne matala te lagi” ki a Iesu. (Mataio 3:16) E mafai o fakauiga a te mea tenei me ne toe kamata o masaua  ne Iesu i te taimi nei a mea katoa e uiga ki tena olaga i te lagi fakatasi mo te Atua.

Mai tua o tena papatisoga, ne fanatu a Iesu ki te koga lavaki ke mafaufau e uiga ki mea ne kamata o masaua ne ia. Ne ‵seke atu a aso e fasefulu. I te taimi kātoa tenei, ne seki kai eiloa a Iesu, tela la, ko ‵tau nei o fiakai malosi a ia. Ko te taimi eiloa tenei ne taumafai ei a Satani o fakaosooso a Iesu.

Ne fai atu te Tiapolo: ‘Kafai koe ko te tama a te Atua, fai ki fatu konei ke liu falaoa.’ Ne mafai eiloa o ‵gali a falaoa konā! Kae e mata, ne mafai o ‵fuli ne Iesu a fatu ke liu falaoa?— Ao, ne mafai eiloa ne ia. Kaia? Me ne maua ne Iesu, te Tama a te Atua, se ‵mana fakapito.

E mata, ka ‵fuli ne koe a fatu ke liu falaoa moi ne fai atu te Tiapolo ke fai ne koe te mea tenā?— Ne fiakai a Iesu. Tela la, e mata, ne mafai eiloa o ‵lei moi ne fai fakatasi fua ne ia te mea tenā?— Ne iloa ne Iesu me se mea ‵se ke fakaaoga tena ‵mana i te auala tenā. Ne tuku atu ne Ieova ki a ia te ‵mana ke fai ei a tino ke fakapilipili atu ki te Atua, kae ke se fakaaoga mō ia eiloa.

Tela la, i lō te fai penā, ne fai atu ne Iesu ki a Satani a mea e tusi i te Tusi Tapu: ‘E se ‵tau fua o ola te tino i meakai kae ko pati katoa kolā e ‵to mai i te gutu o Ieova.’ Ne iloa ne Iesu me i te faiga o te mea telā e fiafia ki ei a Ieova e sili atu te tāua i lō te mauaga o mea‵kai ke kai ki ei.

 Kae ne toe taumafai eiloa a te Tiapolo. Ne ave ne ia a Iesu ki Ielusalema kae ne fakatu atu ne ia i te ‵pui maluga o te faletapu. Muna a Satani: ‘Kafai koe ko te tama a te Atua, eva ifo ki lalo i konei me e tusi i te tusi me ka sapai koe ne agelu a te Atua ke se pakia koe.’

Kaia ne fai atu ei ne Satani a te mea tenei?— Ne fai atu ne ia o fakaosooso a Iesu ke fai ne ia se mea valea. Kae ne seki fakalogo foki a Iesu ki a Satani. Ne fai atu a ia ki a Satani: “Kae e tusi foki i te tusi: ‘E se ‵tau o tofotofo ne koe a Ieova tou Atua.’” Ne iloa ne Iesu me se mea ‵se ke tofotofo ne koe a Ieova mai i te faiga o mea kolā e fakamataku ki tena ola.

Kae ne seki ‵fiu vave a Satani. Ne toe ave ne ia a Iesu ki se mauga tafasili i te maluga. I konā ne fakaasi atu ne ia a malo katoa, io me ko pulega, o te lalolagi mo olotou ‵malu. Ne fai atu a Satani ki a Iesu: “Ka avatu ne au a mea katoa konei ki a koe māfai e ifo mai koe o tapuaki fakatasi mai fua ki a au.”

Mafaufau la ki te mea ne fakaasi atu ne te Tiapolo. E mata, i a Satani a malo, io me ko pulega katoa konei a tino?— Ia, e seki ‵teke atu a Iesu ki te manatu me i a Satani a mea konā. Ne mafai eiloa o fai atu a ia penā moi se pule atu a Satani ki ei. Ao, a Satani ko te pule tonu o atufenua katoa o te lalolagi. E taku foki ne te Tusi Tapu a ia ki te “pule o te lalolagi tenei.”—Ioane 12:31.

Ne a au mea ka fai moi ne tauto atu te Tiapolo ke tuku atu se mea ki a koe māfai e tapuaki atu koe ki a ia?— Ne iloa ne Iesu me se mea ‵se ke tapuaki atu ki te Tiapolo faitalia me se a te mea e mafai o maua ne Ia mai i ei. Tela la, ne fai atu a Iesu: ‘Fano keatea, e Satani! Me e fai mai te Tusi Tapu me ko Ieova fua tou Atua e ‵tau o tapuaki kae tavini koe ki ei.’—Mataio 4:1-10; Luka 4:1-13.

E fe‵paki foki tatou mo fakaosoosoga. E iloa ne koe a nisi fakaosoosoga?— Tenei te fakaakoakoga e tasi. Kāti e fai ne tou mātua se pai io me se keke gali mō ‵kai i te afiafi. Kae fai atu tou fafine ki a koe ke mo a ma kai ki ei ke oko ki te taimi ‵kai. Kae ko oko eiloa i tou fiakai.  E mata, ka fakalogo koe ki tou mātua?— E manako Satani ke se fakalogo koe ki tou fafine.

Masaua la a Iesu. Ne fiakai malosi foki tou tagata. Kae ne iloa ne ia me e sili atu ke fakafiafia ne ia te Atua i lō te kai. Kafai e fai ne koe a mea kolā e fai atu ne tou mātua, e fakaasi atu ne koe me ko fai eiloa koe pelā mo Iesu.

Kāti e fai atu a nisi tama‵liki ke folo ne koe a nisi fuaga. E mafai o fai atu latou me ka ‵gali eiloa  ou lagonaga i fuaga konā. Kae ko fuaga konei ne vailakau tapu. E mafai o fai ne latou koe ke masaki kae tamate foki koe. Io me e mafai o tuku atu ne se tino se sikaleti, kolā e aofia foki i ei a vailakau tapu, kae faimālō atu ke ‵pusi koe ki ei. Ne a au mea ka fai?—

Masaua la a Iesu. Ne taumafai a Satani o fai a Iesu ke tafao ki tena ola mai i te fai atu ke eva ifo ki lalo mai te faletapu. Kae ne seki fai ne Iesu. Ne a au mea ka fai māfai e faimālō koe ne se tino ke fai se mea fakamataku?— Ne seki fia fakalogo a Iesu ki a Satani. E se ‵tau foki o fakalogo koe ki so se tino telā e taumafai o faimālō koe ke fai a mea ma‵sei.

Kāti e mafai o fai atu se tino i se aso ke ifo atu koe ki se tupua, se mea telā e fai mai te Tusi Tapu me e se ‵tau o fai ne koe. (Esoto 20:4, 5) Kāti se vaega o se faigā mea i te akoga. Kāti ne fai atu foki me ka se talia lele eiloa ke fanatu koe ki te akoga māfai e ita fitifiti koe ma fai te mea tenei. Ne a au mea ka fai?—

E faigofie ke fai te mea ‵lei māfai e fai ne tino katoa. Kae e mafai eiloa o faigata māfai e taumafai a nisi tino o faimālō tatou ke fai a mea ma‵sei. E mafai o fai mai latou me e se ma‵sei a mea e fai ne latou. Kae ko te fesili tāua, Ne a muna a te Atua e uiga ki ei? E iloa ne ia te ‵toe mea ‵lei.

Tela la, faitalia me ne a muna a nisi tino, e se ‵tau lele eiloa o fai ne tatou a mea kolā e fai mai te Atua me e ma‵sei. I te auala tenā, ka fai faeloa ne tatou a te Atua ke fiafia, kae ka fakanoanoa ne tatou a te Tiapolo.