Ibuot 11

Un̄wam Otode Mme Angel Abasi

NDUSỤK owo ẹdọhọ ẹte ke mmimọ inịm se mmimọ ikemede ndikụt kpọt. Oro iwụtke ifiọk. Ekese ata idem n̄kpọ ẹdu oro akanam nnyịn mîkwe ke enyịn. Nte afo emekeme ndisiak kiet?—

Nso kaban̄a ofụm oro nnyịn in̄wekde? Nte nnyịn imekeme nditụk enye?— Menede ubọk fo, nyụn̄ fri. Nte afo ama okop n̄kpọ ndomokiet?— Afo ama okop, edi afo ukemeke ndikụt ofụm oro, ndi emekeme?—

Nnyịn ima ibebem iso itịn̄ iban̄a mme owo eke spirit, emi nnyịn mîkemeke ndikụt. Nnyịn ima ikpep nte ke ndusụk mmọ ẹfọn edi mbon eken ẹdiọk. Siak ndusụk owo eke spirit oro ẹfọnde emi nnyịn mîkemeke ndikụt.— Jehovah Abasi, Jesus, ye nti angel. Nte ndiọi angel ẹdu n̄ko?— Bible ọdọhọ ke mmọ ẹdu. Tịn̄ nọ mi ban̄a se afo ekpepde aban̄a mmọ.—

N̄kpọ kiet oro nnyịn idiọn̄ọde edi nte ke nti ye ndiọi angel ẹnyene odudu ẹkan nnyịn. Akwa Andikpep ama ọfiọk ekese n̄kpọ aban̄a mme angel. Enye ama ọfiọk sia enye ekedide angel mbemiso enye akamanade nte nsekeyen ke isọn̄. Enye ama odụn̄ ye mme angel eken ke heaven. Enye ama ọfiọk ediwak miliọn mmọ. Nte kpukpru angel emi ẹnyene enyịn̄?—

Nte ededi, nnyịn ima ikpep ite ke Abasi ama osio mme ntantaọfiọn̄ enyịn̄. Ntre nnyịn imekeme ndinịm ke akpanikọ nte ke kpukpru angel ẹnyene enyịn̄ n̄ko. Ndien nnyịn imọfiọk ite ke mmọ ẹkeme ndineme nneme ye kiet eken koro Bible etịn̄ aban̄a ‘usem mme angel.’ (1 Corinth 13:1) Afo ekere ke mme angel ẹsineme ẹban̄a nso? Nte mmọ ẹsineme ẹban̄a nnyịn ke isọn̄?—

Nnyịn imọfiọk ite ke mme angel Satan, kpa mme demon, ke ẹdomo  ndinam nnyịn isọn̄ ibuot ye Jehovah. Ntre ana mmọ ẹneme nte mmọ ẹkemede ndinam emi. Mmọ ẹyom nnyịn itie nte mmimọ man Jehovah okûma nnyịn n̄ko. Edi nso kaban̄a mme anam-akpanikọ angel Abasi? Nte afo emekere ke mmọ n̄ko ẹsineme nneme ẹban̄a nnyịn?— Ih, mmọ ẹsineme. Mmọ ẹyom ndin̄wam nnyịn. Yak ntịn̄ nnọ fi nte ndusụk angel Abasi ẹken̄wamde mme owo oro ẹkemade Jehovah ẹnyụn̄ ẹnamde n̄kpọ esie.

Ke uwụtn̄kpọ, owo kiet ama odu oro ekekerede Daniel emi okodụn̄de ke Babylon. Ediwak owo do ikamaha Jehovah. Mme owo ẹma ẹkam ẹnịm ibet oro edinamde ẹnọ owo ekededi oro ọbọn̄de akam ọnọ Jehovah Abasi ufen. Edi Daniel iketreke ndibọn̄ akam nnọ Jehovah. Ndi afo ọmọfiọk se mmọ ẹkenamde Daniel?—

Kamse, ndiọi owo ẹma ẹnam ẹtop Daniel ẹsịn ke obube mme lion. Daniel okodu ikpọn̄ do ye ndusụk lion oro biọn̄ ọkọdọn̄de. Nte afo ọmọfiọk se iketịbede do?— Daniel ọkọdọhọ  ete: ‘Abasi ọmọdọn̄ angel esie edikịbi mme lion inua.’ Lion ikọnọhọ enye unan ndomokiet! Mme angel ẹkeme ndinam mme utịben̄kpọ nnọ mbon oro ẹnamde n̄kpọ Jehovah.—Daniel 6:18-22.

Ini ama odu oro Peter okodude ke ufọk-n̄kpọkọbi. Afo eyeti nte ke Peter ekedi ufan Akwa Andikpep, kpa Jesus Christ. Ndusụk owo ikenemke esịt ke ini Peter ọkọdọhọde mmọ ete ke Jesus ekedi Eyen Abasi. Ntre mmọ ẹma ẹsịn Peter ke ufọk-n̄kpọkọbi. Mbonekọn̄ ẹma ẹkpeme Peter mbak enye idifehe. Nte ama odu owo ekededi oro akpakan̄wamde enye?—

Peter akana ke ufọt mbon-ukpeme iba ede idap, ndien ẹma ẹsịn enye n̄kpọkọbi ke ubọk. Edi Bible ọdọhọ ete: ‘Sese! Angel Jehovah  ama edi, ndien un̄wana ọtọn̄ọ ndiyama ke ubet ufọk-n̄kpọkọbi oro. Angel oro ama atuak Peter ke n̄kan̄, anam enye edemede, ọdọhọde ete, “Daha ke enyọn̄ iwiwa!”’

Mmọdo, n̄kpọkọbi ẹfọrọde ke ubọk Peter ẹduọn̄ọ! Ndien angel oro ama ọdọhọ enye ete: ‘Sịne ọfọn̄, sịne ikpa-ukot fo, nyụn̄ tiene mi.’ Mbon-ukpeme oro ikekemeke ndikpan mmọ koro edi angel akan̄wam Peter. Idahaemi mmọ ẹma ẹdisịm usụn̄ ukwak, ndien esen esen n̄kpọ ama etịbe. Usụn̄ oro ama eberede ke idemesie! Angel oro ama anyan̄a Peter man enye ekeme ndika iso n̄kwọrọ ikọ.—Utom 12:3-11.

Nte mme angel Abasi ẹkeme ndin̄wam nnyịn n̄ko?— Ih, mmọ ẹkeme. Nte emi ọwọrọ ete ke mmọ idiyakke nnyịn ida unan ndomokiet?— Baba, mme angel ikpanke nnyịn ndida unan edieke nnyịn inamde ndisịme. Edi idem ọkpọkọm nnyịn ikam inamke ndisịme n̄kpọ, nnyịn imekeme ndisụk nda unan. Owo idọhọke mme angel ẹkpan emi nditịbe. Utu ke oro, Abasi ọnọ mmọ akpan utom ndinam.

Bible etịn̄ aban̄a angel kiet oro ọdọhọde mme owo ke kpukpru ebiet ete ẹtuak ibuot ẹnọ Abasi. (Ediyarade 14:6, 7) Didie ke angel etịn̄ oro ọnọ mmọ? Nte enye etie ke heaven ofiori man kpukpru owo ẹkeme ndikop uyo esie?— Baba, utu ke oro, mme anditiene Jesus ke isọn̄ ẹtịn̄ ẹnọ mme owo ẹban̄a Abasi, ndien mme angel ẹkpeme mmọ ke utom oro. Mme angel ẹkụt ẹte ke mbon oro ẹnen̄erede ẹyom ndifiọk n̄kpọ mban̄a Abasi ẹnyene ifet ndikop. Nnyịn imekeme ndibuana ke utom ukwọrọikọ oro, ndien mme angel ẹyen̄wam nnyịn.

Edi nso edieke mme owo oro mîmaha Abasi ẹfịnade nnyịn? Nso edieke mmọ ẹsịnde nnyịn ke ufọk-n̄kpọkọbi? Nte mme angel ẹyenyan̄a nnyịn?— Mmọ ẹkeme ndinyan̄a nnyịn. Edi mmọ idinamke oro kpukpru ini.

Ini kiet, Paul anditiene Jesus ekedi owo n̄kpọkọbi. Enye ekesịne ke ubom aka isan̄ ke ini ọkpọsọn̄ oyobio ekefịmede. Edi mme angel oro ikanyan̄ake enye ke ndondo oro. Emi ekedi koro mbon en̄wen ẹma ẹdu  oro ẹkeyomde ndikop n̄kpọ mban̄a Abasi. Angel kiet ọkọdọhọ ete: “Paul, kûfehe ndịk; afo enyene ndika ke iso Caesar.” Ih, ẹkenyene ndimen Paul n̄ka iso Caesar andikara ererimbot man Paul ekeme ndikwọrọ ikọ nnọ enye. Kpukpru ini, mme angel ẹma ẹsifiọk ebiet emi Paul okodude, mmọ ẹma ẹnyụn̄ ẹn̄wam enye. Mmọ ẹyen̄wam nnyịn n̄ko edieke nnyịn inen̄erede inam n̄kpọ Abasi.—Utom 27:23-25.

Akpan utom efen odu oro mme angel ẹdinamde, ndien mmọ ẹyenam emi ke mîbịghike. Ini oro Abasi edisobode ndiọi owo enen̄ede ekpere. Ẹyesobo kpukpru owo oro mîtuakke ibuot inọ Abasi akpanikọ. Mbon oro ẹdọhọde ke mmimọ ikereke ke mme angel ẹdu koro mmimọ mîkemeke ndikụt mmọ ẹyekụt ke mmimọ imanam ndudue.—2 Thessalonica 1:6-8.

Nso ke oro ediwọrọ ọnọ nnyịn?— Edieke nnyịn idade ye mme angel Abasi, mmọ ẹyen̄wam nnyịn. Edi nte nnyịn ida ye mmọ?— Nnyịn ida ye mmọ edieke nnyịn inamde n̄kpọ Jehovah. Ndien edieke nnyịn inamde n̄kpọ Jehovah, nnyịn iyọdọhọ mme owo en̄wen ite ẹnam n̄kpọ esie n̄ko.

Man ekpep ekese aban̄a nte mme angel ẹtụkde uwem mme owo, kot Psalm 34:7; Matthew 4:11; 18:10; Luke 22:43; ye Utom 8:26-31.

[Ndise ke page 63]

Nso ke Abasi akanam man anyan̄a Daniel?

[Ndise ke page 64]

Didie ke angel akan̄wam Peter ọwọrọ ke ufọk-n̄kpọkọbi?

[Ndise ke page 66]

Nso ke angel etịn̄ ye Paul?