SƆM pipul dɛn se na wetin nɔmɔ dɛn de si na in dɛn go biliv. Bɔt i nɔ mek sɛns. Bɔku tin dɛn de we wi nɔ wan de si bɔt dɛn de. Yu kin kɔl wan?—

Tink bɔt di briz we wi de blo? Yu kin fil am, nɔto so?— Put yu an nia yu mɔt ɛn blo yu an. Yu fil ɛnitin?— Yu fil sɔntin, bɔt yu nɔ de si di briz, nɔto so?—

Wi bin dɔn tɔk bɔt spirit pipul dɛn we wi nɔ de si. Wi bin lan se sɔm gud ɛn sɔm bad. Udat na sɔm gud spirit pipul dɛn we wi nɔ de si?— Yɛs, Jiova Gɔd, Jizɔs, ɛn ɔda gud enjɛl dɛn. Yu tink se bad enjɛl dɛnsɛf de?— Di Baybul se dɛn de. Tɛl mi wetin yu bin dɔn lan bɔt dɛn.—

Wan tin we wi no na dat di gud enjɛl dɛn ɛn di bad enjɛl dɛn gɛt pawa pas wi. Di Gret Ticha sabi bɔku tin bɔt enjɛl dɛn. Dis na bikɔs in na bin enjɛl bifo dɛn bɔn am na dis wɔl. I bin dɔn liv wit ɔda enjɛl dɛn na ɛvin. I no bɔku bɔku enjɛl dɛn. Yu tink se ɔl dɛn enjɛl dɛn ya gɛt nem?—

Wɛl, wi bin dɔn lan se Gɔd gi di sta dɛn ɔl nem. So wi shɔ se di enjɛl dɛnsɛf gɛt nem. Ɛn wi no se dɛn kin tɔk to dɛnsɛf bikɔs di Baybul tɛl wi bɔt di ‘langwej we enjɛl dɛn de tɔk.’ (Fɔs Lɛta Fɔ Kɔrint 13:1) Wetin yu tink se enjɛl dɛn kin tɔk bɔt? Dɛn kin tɔk bɔt wi mɔtalman?—

Wi no se Setan in enjɛl dɛn, we na di dɛbul dɛn, de tray fɔ mek wi nɔ obe Jiova. So dɛn go mɔs de tɔk bɔt aw dɛn go du dis. Dɛn want wi fɔ bi lɛk dɛn so dat Jiova nɔ go lɛk wi. Bɔt wetin  wi go se bɔt di enjɛl dɛn we nɔ kɔmɔt biɛn Gɔd? Yu tink se dɛnsɛf kin tɔk bɔt wi?— Yɛs, dɛn kin tɔk bɔt wi. Dɛn want fɔ ɛp wi. Mek a tɛl yu aw sɔm pan Gɔd in enjɛl dɛn dɔn ɛp pipul dɛn we bin lɛk Jiova ɛn sav am.

Fɔ ɛgzampul, wan man bin de na Babilɔn we nem Daniɛl. Bɔku pipul dɛn na Babilɔn nɔ bin lɛk Jiova. Sɔm pipul dɛn bin ivin put lɔ fɔ pɔnish ɛnibɔdi we go pre to Jiova Gɔd. Bɔt Daniɛl nɔ bin stɔp fɔ pre to Jiova. Yu no wetin dɛn bin du Daniɛl?—

Yɛs, bad pipul dɛn bin mek dɛn trowe am na wan ol usay layɔn dɛn bin de. Na Daniɛl in wangren bin de na di ol wit di layɔn dɛn we bin dɔn angri. Yu no wetin apin nɛks?— Daniɛl se: ‘Gɔd sɛn in enjɛl fɔ kam lɔk di layɔn dɛn mɔt.’ No bad tin nɔ apin to am! Enjɛl dɛn kin du wɔndaful tin dɛn fɔ di wan dɛn we de wɔship Jiova.—Daniɛl 6:18-22.

 Wan tɛm Pita bin de na jel. Mɛmba se Pita ɛn di Gret Ticha, Jizɔs Krays, na bin padi. Sɔm pipul dɛn nɔ bin gladi we Pita tɛl dɛn se Jizɔs na Gɔd in Pikin. So dɛn put Pita na prizin. Sojaman dɛn bin de gayd Pita fɔ lɛ i nɔ rɔnawe. Yu tink se ɛnibɔdi de we go ɛp am?—

Pita bin de slip bitwin tu sojaman dɛn ɛn chen dɛn bin de na in an. Bɔt di Baybul se: ‘Jiova in enjɛl kam ɛn layt bigin shayn ɔlsay na di jel. Di enjɛl tɔch Pita in sayd fɔ wek am. I se, “Pita, grap kwik!”’

 Na de di chen dɛn na Pita in an fɔdɔm! Ɛn di enjɛl tɛl am se: ‘Wɛr yu klos, wɛr yu sandal, ɛn fala mi.’ Di sojaman dɛn we bin de gayd Pita nɔ bin ebul fɔ stɔp dɛn bikɔs di enjɛl bin de ɛp Pita. We dɛn rich bifo wan ayɛn get, wan wɔndaful tin apin. Di get opin fɔ insɛf! Da enjɛl de bin fri Pita so dat i go kɔntinyu fɔ prich di gud nyus.—Di Apɔsul Dɛn Wok [Akt] 12:3-11.

Yu tink se Gɔd in enjɛl dɛn ebul fɔ ɛp wisɛf?— Yɛs, dɛn ebul. Fɔ se dɛn nɔ go ɛva alaw bad tin fɔ apin to wi?— Nɔ, enjɛl nɔ go stɔp bad tin fɔ apin to wi if wi du sɔntin we nɔ mek sɛns. Bɔt ivin if wi nɔ du tin we nɔ mek sɛns, bad tin kin stil apin to wi. Gɔd nɔ tɛl di enjɛl dɛn fɔ de stɔp bad tin we fɔ apin to wi. Bifo dat, Gɔd dɔn gi dɛn spɛshal wok fɔ du.

Di Baybul tɔk bɔt wan enjɛl we de tɛl pipul dɛn ɔlsay na di wɔl fɔ wɔship Gɔd. (Rɛvɛleshɔn 14:6, 7) Aw di enjɛl de tɛl pipul dɛn dat? Fɔ se i de ala frɔm ɛvin so dat ɔlman go yɛri?— Nɔ, bifo dat, na Jizɔs in disaypul dɛn na di wɔl de tɔk to ɔda pipul dɛn bɔt Gɔd, ɛn di enjɛl dɛn de gayd dɛn we dɛn de du dis wok. Di enjɛl dɛn de mek shɔ se di wan dɛn we rili want fɔ no bɔt Gɔd gɛt di chans fɔ yɛri. Wisɛf kin ɛp fɔ du di prichin wok, ɛn di enjɛl dɛn go ɛp wi.

Bɔt wetin go apin if pipul dɛn we nɔ lɛk Gɔd tray fɔ du wi bad ɔ if dɛn put wi na jel? Di enjɛl dɛn ebul fɔ fri wi?— Yɛs, dɛn ebul fɔ fri wi. Bɔt nɔto dat dɛn kin du ɔltɛm.

Wan tɛm, Jizɔs in disaypul we na Pɔl bin de na jel. We i bin stil de na jel, dɛn bin tek am, put am insay wan bot fɔ kɛr am go to di kiŋ we bin de rul di wɔl, we na Siza. We i bin de travul go de, na de big big briz bigin blo. Bɔt di enjɛl dɛn nɔ bin fri am wantɛm wantɛm. Dis na bikɔs ɔda pipul dɛn bin de we bin nid  fɔ yɛri bɔt Gɔd. Wan enjɛl bin tɛl am se: “Pɔl, nɔ fred! Yu go tinap bifo Siza.” So Pɔl bin fɔ prich to Siza. Di enjɛl dɛn bin no usay Pɔl de ɔltɛm, ɛn dɛn bin de ɛp am. Dɛn go ɛp wisɛf if wi de rili wɔship Gɔd.—Di Apɔsul Dɛn Wok [Akt] 27:23-25.

Wan ɔda big wok de we di enjɛl dɛn go du, ɛn dɛn go du am jisnɔ. Gɔd in tɛm fɔ kil ɔl dɛn wikɛd pipul dɛn dɔn de nia. Ɔl di wan dɛn we nɔ de wɔship di tru Gɔd go day. We da tɛm de rich, di wan dɛn we se dɛn nɔ biliv se enjɛl dɛn de bikɔs dɛn nɔ de si dɛn, go no se na mistek dɛn bin de mek.—Sɛkɛn Lɛta Fɔ Tɛsalonayka 1:6-8, NW.

Wetin dat min fɔ wi?— If wi de sɔpɔt Gɔd in enjɛl dɛn, dɛn go ɛp wi. Bɔt di kwɛstyɔn we wi fɔ aks wisɛf naw na, Wi de sɔpɔt dɛn?— Wi de sɔpɔt dɛn, if wi wɔship Jiova. Ɛn if wi de wɔship Jiova, wi go tɛl ɔda pipul dɛn fɔ wɔship am bak.