WAKIN runakunan ninku: “Imapipas creenaypaqqa rikunayraqmi”, nispa. Ichaqa Diospa wakin kamasqantaqa manan rikuyta atisunmanchu. ¿Imakunatan mana rikunchischu?...

¿Rikunchischu wayrata?... A ver, makiykita phukuy, ¿imatan sienteshanki?... Arí, wayratan. Ichaqa, ¿rikushankichu wayrata?...

Yacharanchisñan espiritukunamanta ¿riki? Paykunataqa manan rikusunmanchu. Wakinqa millaymi kanku, wakintaq allin kanku. ¿Pikunan allin kanku?... Arí, Jehová Dios, Jesús, wakin angelkuna ima. Wakin angelkunari, ¿imaynan kanku?... Arí, millay angelkunan kanku. ¿Imatan paykunamanta yacharanchis?...

Allin angelkunapas mana allin angelkunapas runakunamanta aswan atiyniyoqmi kanku. Jesusqa reqsinmi llapa angelkunata. ¿Imaynapi reqsin? Manaraq allpaman jamushaqtinmi paykuna jina karan. Jesusqa angelkunawanmi janaq pachapi tiyaran. ¿Sutiyoqchu kanku chay angelkuna?...

Diosmi llapa ch’askakunaman sutita churaran. Chhaynatan llapa angelkunamanpas sutita churaran. Angelkunaqa paykunapuran rimanku. Biblian willan ‘angelkunaq rimayninmanta’ (1 Corintios 13:1). ¿Imamantataq angelkunari rimanku? ¿Yaqachu runakunamanta rimanku?...

 Millay angelkunaqa manan munankuchu Dios kasukunanchista. Paykunaqa mana allinkuna ruwananchistan munanku. Chhaynaqa yaqapaschá rimanku imayna urmachiwananchismanta. Allin angelkunari, ¿rimankuchu noqanchismanta?... Arí. Ichaqa imayna yanapawananchismantan rimanku. Kunan willasayki imaynatan ñaupaq tiempopi Dios munakuqkunata yanaparanku chayta.

Danielmanta yachasun. Payqa Babilonia llaqtapin tiyaran, ichaqa pisillan chaypi Diosta munakuranku. Chay llaqtapi millay runakunan mana munarankuchu pipas Jehová Diosmanta mañakunanta. Danielmi ichaqa mañakushallaran. ¿Imatan Danielta ruwaranku?...

Juj millay runakunan Danielta leonkunaq t’oqonman wijch’uykachiranku. Chay leonkunaqa sinchi yarqasqan kasharanku. ¿Imanarankun  Danielta?... ¡Arí, manan imanarankupaschu! Danielmi nin: ‘Diosniymi angelninta kachamuwan, paymi leonkunaq siminta wisq’aykun’, nispa. Angelkunaqa admiranakunatan ruwanku Dios kasukuqkunata yanapanankupaq (Daniel 6:18-22).

Kunanqa Pedromanta yachasun. Pedron runakunaman willaran Jesús Diospa wawan kasqanta. Chayta uyarispan runakuna sinchita phiñakuranku. Jinaspan carcelpi wisq’aranku iskay soldadokunaq ladonpi. ¿Pillapas yanaparanchu?...

Pedroqa cadenawan watasqan puñusharan iskay soldadokunaq chaupinpi. Biblia willan: ‘Chayllamanmi Jehová Diospa  angelnin rijuriran, juj k’anchaytaq Pedrota wisq’asqanku ukhupi k’anchariran. Jinan angelqa Pedrota rijch’achiran, jinaspa niran: “Usqhaylla jatariy”’, nispa.

Chayllamanmi makinpi cadenakuna urmapuran. Jinan ángel niran: ‘P’achakuy, usut’aykita churakuspataq qhepayta jamuy’, nispa. Chaypi soldadokunaqa puñushankumanpas jinan tarikuranku, manan imatapas repararankuchu. Fierromanta punkuman Pedro chayaqtinmi, punku kikillan kicharikuran. Chay qhepamanmi Pedroqa Diosmanta willashallaran (Hechos 12:3-11).

Kunanri, ¿yanapawasunmanchu angelkuna?... Arí, yanapawasunmanmi. Chhaynaqa, ¿salvawasunchu ima peligromantapas?... Noqallanchismanta ima peligromanpas churakusun chayqa, manan yanapawasunchu. Allillantapuni ruwasun chaypas, mayninqa manan yanapawasunchu. Jinaspapas Diosmi juj llank’ayta paykunaman qon.

Bibliaq willasqan jina, juj angelmi allpantinpi willashan: ‘Diosta adoraychis’, nispa (Apocalipsis 14:6, 7). ¿Imaynatan willan? ¿Janaq pachamantachu qaparimun llapa runakuna uyarinanpaq?... Manan, angelkunaqa Diosta serviq runakunatan yanapashanku predicasqankupi. Chay predicaqkunatan Diosmanta yachay munaq runakunaman pusashanku. Sichus noqanchispas Diosmanta willasun chayqa, angelkunan yanapawasun.

Millay runakuna millayta tratawasun otaq carcelman apawasun chayri, ¿Pedrota jinachu angelkuna yanapawasun?... Yanapawasunmanmi, ichaqa manan sapa kutichu chaytaqa ruwanqaku.

Juj kutinmi Pablota soldadokuna barcopi presota apasharanku. Chay kutipiqa manan angelkuna salvaranchu. Pabloqa juj runakunamanmi Diosmanta yachachinan kasharan. Chaymi juj  ángel niran: “Pablo, ama manchakuychu, Roma reypa ñaupanmanqa chayankipunin”, nispa. Roma llaqtaman chayaqtinmi Pabloqa reyman Diosmanta willaran. Angelkunaqa yanaparankun Pablota. Noqanchispas Diosmanta willasun chayqa angelkunan yanapawasun (Hechos 27:23-25).

Diosmi angelkunaman juj ruwayta kamachillantaq. Chaytan pisi tiempollamanta ruwanqaku. ¿Imatan ruwanqaku? Llapa millay runakunatan wañuchinqaku. “Manan angelkunaqa kanchu” niqkunan chay tiempopi chayraq reparanqaku pantasqankuta (2 Tesalonicenses 1:6-8).

¿Iman noqanchiswan pasanqa chay tiempopi?... Diospa angelninkunata kunan yanapasun chayqa, paykunan yanapawasun. Ichaqa, ¿imaynatan angelkunata yanapasunman?... Diosta servispan. Chayta rikuspan jujkunapas Diosta servinqaku.