ANGA ma tye lanen maber loyo ma otiyo pi Lubanga dok ngene adada?— Igamo kakare, Yecu Kricito. Itamo ni wan bene watwero bedo calo en?— Baibul waco ni en oweko lanen piwa me aluba. En bene lwongowa me bedo lupwonnyene.

Mono ingeyo tyen lok me bedo lapwonnye pa Yecu?— Tyen lokke pol. Mukwongo, omyero kong wanong pwony ki bote. Ento pe meno keken. Omyero waye jami ma en waco bene. Ka waye, ci wabitimo jami ma en wacciwa ni watim.

Pol pa dano giwaco ni gitye ki niye i kom Yecu. Itamo ni gin ducu ada gubedo lupwonnyene?— Pe kumeno, polgi pe gubedo lupwonnyene. Twero bedo ni giwoto i kanica bene. Ento polgi peya gumiyo karegi me pwonyo jami ma Yecu opwonyo. Ada, jo ma gilubo lanen pa Yecu keken aye gubedo lupwonnyene.

Kong dong walok i kom jo mukene ma gubedo lupwonnye pa Yecu i kare ma en tye i lobo calo dano. Ngat acel i kin jo ma gukwongo doko lupwonnye pa Yecu obedo Pilipo. Pilipo ocito oyenyo lareme Natanael (ma bene kilwongo ni Bartolomayo), ma itye ka nenone obedo ite yat i cal kany-nyi. I kare ma Natanael obino bot Yecu, Yecu owacci: ‘Nen, laco ma pe lagoba, Laicrael me ada.’ Natanael obedo ki ur matek ci openyo ni: ‘Ingeyo an nining?’

 Yecu owacci, “Ma peya Pilipo olwongi, kun ibedo i te olam, an aneni.” Natanael ouro tutwal ni Yecu ongeyo ka ma etye iye kikome, ci Natanael owacci: “Lapwony in giri i Wod pa Lubanga. In i Kabaka me Icrael!”—Jon 1:49.

Jo mukene gudoko lupwonnye pa Yecu ma peya Pilipo ki Natanael gudoko lupwonnyene. Jo magi aye Anderiya ki ominne madit Petero kacel ki Jon ki gwok nyo omin Jon madit Yakobo, ma obedo i kin jo mukwongo doko lupwonnyene (Jon 1:35-51) I nge kare manok, jo angwen magi gudok cen i ticgi me mako rec. I nino mo acel, Yecu onongo tye ka wot i dog Nam me Galilaya, ci en oneno Petero ki Anderiya gitye ka bolo obwo recgi i nam. Yecu olwongogi ni: “Wubin wulub kora, ci an abimiyo wudoko lumak dano.”

 Ka dok owoto anyim manok, ci Yecu oneno Yakobo ki Jon. Gin onongo gitye i yeya kacel ki wongi, ka kwoyo obwo recgi. Yecu olwongogi bene ni gulub kore. Ngo ma onongo ibitimo ka Yecu olwongo in? Onongo ibilubu kore cutcut?— Co magi onongo gingeyo anga ma Yecu obedo. Gin onongo gingeyo ni Lubanga aye ocwale. Cutcut guweko ticgi me mako rec ci gulubu kor Yecu.—Matayo 4:18-22.

I kare ma co magi gudoko lulub kor Yecu, man mono te lokke ni kare ducu dong gin gubedo ka timo jami matir?— Pe kumeno. Wi bene twero po ni co magi onongo gilaro lok i kingi pi nga ma rwomme dit loyo. Ento gin onongo giwinyo lok pa Yecu, dok bene guyero me loko kit me kwogi. Ka wayero me loko kit me kwowa, wan bene watwero doko lupwonnye pa Yecu.

Yecu lwongo dano ducu me doko lupwonnyene. I nino mo acel, laloc mo ma mwakane pud tidi mulony obino bot Yecu ci openye kit ma etwero nongo kwede kwo ma pe tum. I kare ma laloc man mulony-nyi otito bot Yecu ni ebedo ka lubu cik pa Lubanga nicakke wa i kare me tinone, Yecu olwonge ni: ‘Bin icak lubu kora.’ Ingeyo ngo mutimme?—

I kare ma laco-ni owinyo ni bedo lapwonnye pa Yecu pire tek loyo lonyo, cwinye ocwer matek. En pe odoko lapwonnye pa Yecu pien en onongo maro lonyone makato Lubanga.—Luka 18:18-25.

I ngeye ma Yecu obedo ka tito kwena pi mwaka ma romo acel ki nucu, en oyero lupwonnyene gin 12 me bedo lukwena. Lukwena-ni gubedo co ma en ocwalogi me tiyo tic ma kite dok pat. Tika ingeyo nyinggi?— Kong wanen ka watwero pwonyo nyinggi. Nen cal pa lukwena magi kany ci nen kong ka itwero waco nyinggi. Ci item waco nyinggi ki wi.

Lacen ngat acel ki i kin lukwena 12 magi kite odoko rac. En aye Juda Iskariot. I ngeye kiyero lapwonnye mukene me doko lakwena.  Tika i ngeyo nyinge?— Nyinge Matiya. Lacen, Paulo ki Barnaba bene gudoko lukwena ento gin pe gubedo i kin jo 12 magi.—Tic pa Lukwena 1:23-26; 14:14.

Kit ma wapwonyo kwede i dul me acel me buk man, Yecu onyutu miti i kom lutino matino. Pingo en otimo meno?— Pien en ongeyo ni gin bene gitwero doko lupwonnyene. Ka i kom lok, lutino bene kine mukene twero loko lok i yo ma weko jo madito gimito ni giwiny dok gipwony jami mapol madok i kom Lapwony Madit.

Mon mapol bene gudoko lupwonnye pa Yecu. Mogo guwoto kacel kwede ka en cito igangi mukene ka tito kwena. Maliam Madalena, Joana, ki Cucana gutimo  meno. Twero bedo bene ni gukonye ki yubo cam ki lwoko bongine.—Luka 8:1-3.

In mono imito bedo lapwonnye pa Yecu?— Wi myero opo ni wacone awaca ki dogwa keken pe miyo wadoko lapwonnyene. Jami ma watimo ka mo keken ma watye iye myero onyut ni wan lupwonnyene ento pe ka wacito i cokke keken. Mono itwero tamo ka mo mapat ma pire tek ma myero ticwa onyut ni wan lupwonnye pa Yecu?—

Omyero watim meno ki gang. Ento ka mukene aye obedo i cukul. Gin ma in ki an myero wiwa pe owil iye wek wabed lupwonnye pa Yecu me ada aye ni, omyero watim jami kit ma en otimo kwede dyeceng lung, jwi ki ka mo keken ma watye iye.