NANI umubomfi wa kwa Lesa uwawamisha uwabalile abako?— Ca cine, ni Yesu Kristu. Bushe uletontonkanya ukuti kuti twaba nga wene?— Baibolo ilanda ati atubikiile ica kumwenako ca kukonka. Kabili atweba ukuba abasambi bakwe.

Bushe walishiba ifyo cipilibula ukuba umusambi wa kwa Yesu?— Cipilibula ifintu ifingi. Ica kubalilapo, tufwile ukusambilila kuli wene. Lelo te ico ceka. Tufwile no kusumina ifyo alanda. Nga twacite fyo, twakulacita ifyo atweba.

Abantu abengi balanda ati balisumina muli Yesu. Bushe uletontonkanya ukuti bonse basambi bakwe icine cine?— Iyo, abengi te basambi bakwe. Pambi balaya na ku calici. Lelo abengi tabasambilila ifyo Yesu asambilishe. Abakonka ica kumwenako ca kwa Yesu e basambi bakwe aba cine.

Natulandepo pali bamo abali abasambi ba kwa Yesu lintu ali pe sonde. Umo uuli pa basambi ba kubalilapo ni Filipi. Filipi aya mu kufwaya umunankwe Natanaele (uwitwa na kabili ati Bartolomeo), uyo ulemona naikala mwi samba lya cimuti. Lintu Natanaele aisa kuli Yesu, Yesu alanda ati: “Moneni, umwina Israele wa cine cine, muli wene tamwaba bucenjeshi!” Natanaele apapa no kwipusha ati: “Mwanjishiba shani?”

 Yesu ayasuka ati: “Ilyo Filipi acili talakwita, uli mwi samba lya mukunyu, nali ninkumona.” Natanaele apapa ukuti Yesu naishiba bwino bwino na po aciba, e co Natanaele atila: “Ni mwe Mwana wa kwa Lesa, ni mwe Mfumu ya kwa Israele.”—Yohane 1:49.

Bambi babele abasambi ba kwa Yesu ilyo Filipi na Natanaele tabalaba. Baali ni Andrea na munyina Petro pamo na Yohane napamo na munyina kwa Yohane, Yakobo. (Yohane 1:35-51) Lelo, ilyo papite nshita, aba baume 4 babwelela ku bukwebo bwabo ubwe sabi. Lyene bushiku bumo ilyo Yesu aleenda mu mbali ya Mumana wa Galili, amona Petro na Andrea baleteya isumbu muli bemba. Yesu abeta ati: “Iseni, munkonke.”

Ilyo aendako panono, Yesu amona Yakobo na Yohane. Bali mu  bwato na shibo, balewamya amasumbu. Na bo Yesu abeta ukuti bamukonke. Cinshi wali no kucita nga Yesu alikwitile? Bushe nga walimukonka ilyo line?— Aba baume nabamwishiba Yesu. Nabeshiba ukuti atumwa kuli Lesa. E co ilyo line basha ubukwebo bwabo ubwe sabi no kukonka Yesu.—Mateo 4:18-22.

Ilyo aba baume baishileba abakonshi ba kwa Yesu, bushe capilibwile ukuti lyonse balecita fye ifisuma?— Iyo. Napamo uleibukisha ukuti aba baume baalepaashanya pa wali umukalamba pali bene. Lelo baleumfwila Yesu, kabili balealuka. Nga ca kuti tulealuka, na ifwe kuti twaba abasambi ba kwa Yesu.

Yesu aitile abantu ba misango yonse ukuba abasambi bakwe. Inshita imo, kateka wacaice umukankaala aishile kuli Yesu no kwipusha ifyo engakwata umweo wa muyayaya. Lintu uyu kateka umukankaala alandile ati atendeke ukumfwila amafunde ya kwa Lesa ukufuma ku bwaice, Yesu alimwitile ati: “Unkonke.” Bushe walishiba icacitike?—

Lintu uyu mwaume aishibe ukuti ukuba umusambi wa kwa Yesu kulingile ukuba ukwacindama ukucila pa kuba ne fyuma, tatemenwe. Tabele umusambi wa kwa Yesu pantu atemenwe indalama shakwe ukucila Lesa.—Luka 18:18-25.

Pa numa Yesu ashimikila mupepi no mwaka umo na hafu, asalile abasambi bakwe 12 ukuba abatumwa. Abatumwa bali baume abo atumine ukubomba umulimo waibela. Bushe walibeshiba amashina?— Natumone nga kuti twayeshiba. Lolesha pa fikope fyabo pano, kabili mona nga kuti walumbula amashina yabo. Lyene esha ukulumbula amashina yabo ku mutwe.

Umutumwa umo pali aba 12 aishileba uwabipa. Ali ni Yuda Iskariote. Pa numa, umusambi na umbi alisalilwe ukuba umutumwa. Bushe walimwishiba ishina?— Ali ni Matia. Pa numa,  Paulo na Barnaba na bo baishileba abatumwa, lelo tabali pali balya abatumwa 12.—Imilimo 1:23-26; 14:14.

Nga fintu twasambilile mu Cipandwa 1 ica muli cino citabo, Yesu alitemenwe abaice. Mulandu nshi?— Pantu alishibe ukuti na bo kuti baisaba abasambi bakwe. Na kuba, abana kuti balanda ifintu ifingalenga abakalamba ukumfwa no kufwaya ukusambilila na fimbi pali Kasambilisha Mukalamba.

Abanakashi abengi na bo baishileba abasambi ba kwa Yesu. Bambi balemukonka lintu aleya ku misumba imbi ku kushimikila. Maria Magadala,  Yoana, na Susana balemukonka. Napamo balemwipikila ne fya kulya no kumucapila ifya kufwala.—Luke 8:1-3.

Bushe ulefwaya ukuba umusambi wa kwa Yesu?— Ibukisha, ukulanda fye ati ndi musambi wakwe takutulenga ukuba umusambi wakwe. Tufwile ukulacita ngo musambi wakwe konse uko tuli, te lintu fye twaya ku kulongana kwa Bwina Kristu. Bushe kuti watontonkanyapo incende shimo uko cacindama ukubomba ngo musambi wa kwa Yesu?—

Ca cine, tufwile ukucite co pa ng’anda. Lelo incende imbi uko tufwile ukucite co ni pa sukulu. Ico iwe na ine tushifwile ukulaba ca kuti pa kuba umusambi wa cine uwa kwa Yesu, tufwile ukucita nge fyo alecita inshita yonse, cila bushiku, konse uko tuli.