O CEI na dauveiqaravi ni Kalou uasivi duadua?— Io, o Jisu Karisito. E rawa beka meda vakataki koya?— E kaya na iVolatabu ni a laiva vei keda e dua na ivakaraitaki meda muria. E sureti keda tale ga meda nona tisaipeli.

O kila se cava e okati ena nona yaco e dua me tisaipeli i Jisu?— E okati kina e vica na ka. E vinakati taumada meda vuli vua. Ia e sega ni o koya ga oya. Meda vakabauta dina tale ga na veika e kaya. Nida vakayacora oya, eda na cakava na ka e vakarota.

E levu era kaya nira vakabauti Jisu. Era tisaipeli dina beka i Jisu?— Sega, e levu vei ira era sega ni tisaipeli. De era lotu tiko. Ia e levu vei ira era sega ni kauaitaka na ka e vakavuvulitaka o Jisu. O ira ga na muria na ivakaraitaki i Jisu era tisaipeli.

Daru vakasamataki ira mada na tisaipeli i Jisu ena gauna e tamata voli kina e vuravura. O Filipi e dua vei ira na imatai ni tisaipeli. O Filipi e qai sureta mai na nona itokani o Nacanieli (yacana tale ga o Pacolomiu) o raica ni dabe toka oqo e ruku ni vunikau. Ni lako mai vei Jisu o Nacanieli, e kaya o Jisu: “Raica e dua na luve i Isireli dina.” E kurabui o Nacanieli qai taroga: ‘Ni kilai au vakacava?’

‘Ni bera ni kacivi iko o Filipi, au sa raici iko ni o  dabe toka ena ruku ni vu ni lolo,’ e kaya o Jisu. E kurabuitaka o Nacanieli ni kila vinaka o Jisu na vanua a tiko kina, e mani kaya kina o Nacanieli: ‘O kemuni na Luve ni Kalou, oni nodra Tui na Isireli.’​—Joni 1:49.

So era sa tisaipeli tu ena siga ni bera nodrau qai digitaki o Filipi kei Nacanieli. Oqo o Adriu kei na tuakana o Pita, o Joni qai rairai vaka tale ga kina na tuakana o Jemesa. (Joni 1:35-51) Oti e dua na gauna lekaleka eratou suka tale ina nodratou cakacaka vagonedau na lewe va oqo. Dua na siga ni taubale tiko ena bati ni Wasawasa o Kalili o Jisu, e raici rau sara o Pita kei Adriu ni rau talaca tiko e wai na nodrau lawa. E kacivi rau o Jisu: “Drau muri au mai.”

Ni toso vakalailai e liu, e raici rau o Jemesa kei Joni. Rau tiko e  waqa kei tamadrau, ni ratou oneva se cula tiko na nodratou lawa. E kacivi rau o Jisu me rau muri koya tale ga. Na cava o na cakava ke kacivi iko o Jisu? O na muri koya tale ga ena gauna oya?​— Eratou kilai Jisu vinaka na va na gonedau. Eratou kila ni a talai koya mai na Kalou. Ratou biuta sara ga ena gauna oya na nodratou cakacaka vagonedau me ratou muri Jisu.​—Maciu 4:18-22.

Ni ratou sa imuri i Jisu na tagane oya, e kena ibalebale beka oqo ni ratou sa na cakava tu ga na veika e dodonu?— Sega. O na rairai nanuma ni ratou a veiletitaka mada se o cei vei iratou e uasivi. Ia eratou qai vakarorogo vei Jisu, ratou mani veisautaka kina na nodratou rai. Ke da veisau tale ga, ena rawa meda tisaipeli i Jisu.

O Jisu e sureti ira na duidui tamata mera nona tisaipeli. Dua na gauna e lako mai vei Jisu e dua na cauravou vutuniyau me tarogi Jisu se ena rawata vakacava na bula tawamudu. Ni tukuna na cauravou vutuniyau oya ni sa muria tiko mai na ivakaro ni Kalou ni se gone, e mani sureti koya o Jisu: “Lako mai mo muri au.” O kila na ka e yaco?​—

E sega ni marautaka na cauravou ni tukuni vua ni bibi cake nona yaco me tisaipeli i Jisu mai na nona vutuniyau. E sega ni mani tisaipeli i Jisu baleta e bibi cake nona lomana na nona ilavo mai na nona lomana na Kalou.​—Luke 18:18-25.

Ni oti nona vunau voli o Jisu ena volekata na dua veimama na yabaki, sa qai digitaka e 12 vei ira na tisaipeli me ratou yapositolo. Ratou talai na yapositolo me ratou cakava e vica na cakacaka bibi. O kilai iratou?— Daru vulica mada na yacadratou. Raica mada na kedratou itaba oqori, tovolea ni cavuta mada na yacadratou. Qai tovolea ni cavuqaqataka na yacadratou.

E qai ca e dua vei iratou. Oqo o Jutasa Isikarioti. E qai digitaki  tale e dua me yapositolo. O kila na yacana?— O Mataiasi. Rau qai yapositolo tale ga o Paula kei Panapasa, ia erau sega ni lewe ni ilawalawa yapositolo e 12.​—Cakacaka 1:23-26, VV; 14:14.

E dau kauaitaki ira na gone o Jisu, me vaka eda vulica ena Wase 1 ni ivola oqo. Na cava e kauaitaki ira kina?— Baleta ni kila o koya ni rawa tale ga mera nona tisaipeli. Na ivalavala ni nodra tukuna e so na ka na gone e rawa kina vei ira na uabula mera rogoca ra qai vulica na veika e baleta na Qasenivuli Levu.

E levu tale ga na yalewa era tisaipeli i Jisu. So era tomani koya ni lai vunau ena so na veikoro. Eratou vakayacora oqori o  Meri na yalewa ni Makitala, o Joana, kei Susana. Ratou veivuke tale beka ga ena kena vakarautaki na kena kakana kei na sava ni nona isulu.​—Luke 8:1-3.

O bau vinakata tale ga mo tisaipeli i Jisu?— Nanuma ni sega ni rawa meda vakatokai wale tu ga meda tisaipeli. E dodonu meda vakaraitaki keda nida nona tisaipeli ena vanua cava ga eda tu kina, me kua nida qai vakaraitaka ga ena gauna ni soqoni vakarisito. O rawa ni vakasamataka e so na vanua e bibi meda vakaraitaka kina nida tisaipeli i Jisu?—

Io, e noda vale sara ga. Vaka kina e koronivuli. Daru kua ni guilecava ni vinakati me daru tisaipeli dina i Jisu ena loma ni dua taucoko na siga, kei na veisiga, se daru mani tiko e vei.