KAPU 13

Bayina Kukumaka Balongoki ya Yezu

NANI ke nsadi ya kuluta mbote ya Nzambi yina kuzingaka na ntoto?— Nge mepesa mvutu ya mbote, Yezu Kristu. Keti nge keyindula nde beto le kuma bonso yandi?— Biblia ketuba nde yandi pesaka beto mbandu sambu beto landa yo. Mpi yandi kelomba beto na kuvanda balongoki na yandi.

Keti nge mezaba kana kuvanda longoki ya Yezu ketendula inki?— Yo ketendula mambu mingi. Ntetentete, yandi fwe longa beto. Kansi yo mesuka pana ve. Beto fwe kwikilaka dyaka na masonga yonso mambu yina ya yandi ketuba. Kana beto kesala mpidina, yo tamonisa nde beto kesala mambu yina ya yandi ketubila beto.

Bantu mingi ketubaka nde bo kekwikilaka na Yezu. Keti nge keyindula nde bo yonso kele mpenza balongoki na yandi?— Ve, mingi na kati na bo kele ve balongoki na yandi. Ziku bo kekwendaka na nzo-Nzambi. Kansi mingi na kati na bo mezwaka ntete ve ata fyoti ntangu ya kulonguka mambu ya Yezu kulongaka. Ya kyeleka, kaka bayina kelandaka mbandu ya Yezu kele balongoki na yandi.

Beto tubila ndambu ya bantu yina kuvandaka balongoki ya Yezu ntangu yandi vandaka muntu na ntoto. Filipo kele mosi na kati ya bantu ya ntete yina kukumaka balongoki. Filipo kwendaka kusosa nduku na yandi Natanaele (yina bo vandaka kubinga mpi Bartelemi), yina nge kemona ya kuvanda na nsi ya nti. Ntangu Natanaele kwisaka na Yezu, Yezu kutubaka nde: ‘Tala muntu ya masonga, muntu ya kyeleka ya Izraele.’ Natanaele kuyitukaka mpi yandi yulaka nde: ‘Inki mutindu nge mezaba munu.’

 Yezu kutubaka nde: “Ntangu Filipo me binga nge ntete ve, mono monaka nge me vanda na nsi ya nti ya bafige.” Natanaele kuyitukaka na kumona nde Yezu kuzabaka mbotembote kisika ya yandi vandaka, ebuna Natanaele kutubaka nde: “Nge kele Mwana-Nzambi! Nge kele ntotila ya Izraele!”—Yoane 1:49.

Bankaka kukumaka balongoki ya Yezu kilumbu mosi na ntwala ya Filipo ti Natanaele. Bantu yango kuvandaka Andre ti mpangi na yandi Piere mpi Yoane mpi ziku ti mbuta na yandi, Yakobo. (Yoane 1:35-51) Kansi, na nima ya mwa ntangu, balongoki yai yonso iya kuvutukilaka kisalu na bo ya kuloba bambisi. Ebuna kilumbu mosi ya Yezu vandaka kutambula na lweka ya Nzadi ya Galilea, yandi monaka Piere ti Andre kelosa bukondi na masa. Yezu kubingaka bo nde: ‘Beno landa munu.’

Ntangu yandi pusanaka mwa ntama fyoti, Yezu kumonaka Yakobo ti Yoane. Bo vandaka na kati ya bwatu ti tata na bo, bo vandaka kuyidika  babukondi na bo. Yezu kubingaka bo mpi nde bo landa yandi. Inki nge zolaka kusala kana Yezu kubingaka nge? Keti nge zolaka kulanda yandi na mbala mosi?— Bantu yai kuzabaka Yezu. Bo zabaka nde Nzambi muntu kutindaka yandi. Yo yina bo yambulaka kisalu na bo ya kuloba bambisi na mbala mosi sambu na kulanda Yezu.—Matayo 4:18-22.

Ntangu bantu yai kukumaka balongoki ya Yezu, keti yo tendulaka nde mambu yonso ya bo kumaka kusala na nima kuvandaka kaka ya mbote?— Ve. Ziku nge keyibuka nde bantu yai vandaka kutulana nkutu ntembe bo na bo sambu na kuzaba nani kuvandaka muntu ya kuluta nene na kati na bo. Kansi bo vandaka kuwila Yezu, mpi bo vandaka na luzolo ya kusoba. Kana beto ke na luzolo ya kusoba, beto mpi le kuma balongoki ya Yezu.

Yezu kulombaka bantu ya mitindu yonso na kuvanda balongoki na yandi. Kilumbu mosi, mwana-bakala mosi yina kuvandaka mfumu mpi mvwama kukwisaka na Yezu mpi yandi yulaka Yezu nde nki mutindu yandi le baka luzingu ya mvula na mvula. Ntangu mfumu yina ya mvwama kutubaka nde yandi kezitisaka bansiku ya Nzambi banda na kileki na yandi, Yezu kusongaka yandi nde: “Kwisa kulanda mono.” Keti nge kezaba nki kusalamaka?—

Ntangu bakala yina kubakisaka nde kuvanda longoki ya Yezu fwe vanda na mfunu mingi kuluta kuvanda mvwama, yandi kusepelaka ve ata fyoti. Yandi kumaka ve longoki ya Yezu sambu yandi zolaka mbongo na yandi mingi kuluta Nzambi.—Luka 18:18-25.

Na nima ya kusala kisalu ya kulonga kiteso ya mvula mosi ti ndambu, Yezu kuponaka bantu 12 na kati ya balongoki na yandi sambu bo kuma bantumwa. Bantumwa kuvandaka bantu yina ya yandi tindaka na kusala kisalu mosi ya nene. Keti nge mezaba bazina na bo?— Beto meka na kulonguka bazina na bo. Tala bifwanisu na bo awa, mpi tala kana nge le tanga bazina na bo. Na nima, meka na kutanga bazina na bo na ntu.

Nsukansuka, ntumwa mosi na kati ya bantumwa yai 12 kukumaka mbi. Zina ya ntumwa yango kuvandaka Yudasi Iskariote. Na nima, bo ponaka longoki yankaka sambu yandi kukuma ntumwa. Keti nge mezaba zina na yandi?— Zina na yandi Matiasi. Na nima, Polo ti Barnabasi mpi  kukumaka bantumwa, kansi bo vandaka ve na kati ya kimvuka ya bantumwa yina 12.—Bisalu 1:22-26; 14:14.

Mutindu beto longukaka na KAPU 1 ya mukanda yai, Yezu vandaka kusepela na bana ya fyoti. Sambu na nki yandi salaka yo?— Sambu yandi zabaka nde bo mpi lendaka kukuma balongoki na yandi. Ya kyeleka, mbala mingi bana ketubaka mambu na mutindu mosi ya kepesaka nkutu bambuta nzala ya kuwa yo mpi mpusa ya kulonguka mambu mingi ya metala Longi ya Nene.

Bankento mingi mpi kukumaka balongoki ya Yezu. Mingi na kati na bo kusalaka banzyetolo ti yandi ntangu yandi vandaka kwenda kulonga na babwala yankaka. Maria ya bwala Magdala, Yoana, mpi Suzana kusalaka yo. Ziku bo vandaka  kusadisa yandi na kulambila yandi madya mpi kuyobisila yandi bilele.—Luka 8:1-3.

Keti nge kezola kuvanda longoki ya Yezu?— Nge fwe zaba nde kutuba kaka na munoko nde beto ke balongoki na yandi kekumisa beto ve balongoki na yandi. Beto fwe salaka mambu ya kemonisa nde beto kele balongoki na yandi na konso kisika yina ya beto kele, beto fwe salaka yo ve kaka na ntangu ya beto kekwendaka na balukutakanu ya Bukristu. Keti nge le yindula mwa bisika yina yo kevandaka mfunu nde beto sala mambu ya kemonisa nde beto kele balongoki ya Yezu?—

Ee, beto fwe monisaka yo na nzo. Kansi, kisika yankaka ya beto fwe monisaka yo kele na nzo-nkanda. Kima ya nge ti munu fwe vilaka ve kele nde sambu na kuvanda longoki ya kyeleka ya Yezu, beto fwe salaka mambu mutindu yandi vandaka kusala, ntangu yonso, bilumbu yonso, na konso kisika yina beto kele.

Ntangu yai beto tanga kumosi mambu ya Biblia ketuba na yina metala balongoki ya Yezu na Matayo 28:19, 20; Luka 6:13-16; Yoane 8:31, 32; mpi 1 Piere 2:21.

[Kifwanisu ya kele na lutiti 72]

Yai nani, mpi nki mutindu yandi mekuma longoki ya Yezu?

[Kifwanisu ya kele na lutiti 73]

Yezu kebinga banani nde bo kwisa kukuma balongoki na yandi?

[Bifwanisu ya kele na lutiti 75]

Yudasi (ya bo vandaka kubinga mpi Tadeo)

Yudasi Iskariote

Simoni

Yakobo (mwana ya Alfeo)

Toma

Matayo

Natanaele

Filipo

Yoane

Yakobo (mpangi ya Yoane)

Andre

Piere

[Bifwanisu ya kele na lutiti 76]

Bankento yai ya kusadisaka Yezu ntangu yandi vandaka kwenda kulonga kuvandaka banani?

[Kifwanisu ya kele na lutiti 76]

Na nki kisika yo ke mfunu nde beto sala mambu ya kemonisa nde beto ke balongoki ya Yezu?