NŨŨ ũkoretwo arĩ ndungata ya Ngai ĩrĩa njega makĩria?— Nĩ Jesu Kristo. Nĩ ũkuona ta tũngĩtuĩka take?— Bibilia yugaga atĩ aatũigĩire kĩonereria nĩguo tũrũmagĩrĩre. Ningĩ Jesu nĩ atwĩraga tũtuĩke arutwo ake.

Wee nĩ ũĩ ũrĩa tũngĩka nĩguo tũtuĩke arutwo a Jesu?— Harĩ maũndũ twagĩrĩirũo nĩ gwĩka. Wa mbere nĩ atĩ, nĩ twagĩrĩirũo kwĩruta kuuma kũrĩ Jesu. Ũndũ ũngĩ nĩ atĩ, nĩ twagĩrĩirũo gwĩtĩkia biũ maũndũ marĩa atũrutaga. Tũngĩtĩkia maũndũ macio, nĩ tũrĩkaga ũrĩa atwĩraga twĩke.

Andũ aingĩ nĩ moigaga atĩ nĩ metĩkĩtie Jesu. Hihi ũgwĩciria othe nĩ arutwo ake?— Aca, aingĩ ao ti arutwo ake. No makorũo nĩ mathiaga kanitha. No aingĩ ao matirĩ meruta maũndũ marĩa Jesu aarutanire. Ma nĩ atĩ, arutwo a Jesu nĩ andũ arĩa marũmagĩrĩra kĩonereria gĩake.

Reke rĩu twarie ũhoro wa andũ amwe arĩa maarĩ arutwo a Jesu rĩrĩa aarĩ gũkũ thĩ. Ũmwe wa andũ arĩa maatuĩkire arutwo a Jesu nĩ Filipu. Filipu aacokire agĩthiĩ agĩetha mũratawe Nathanaeli (ningĩ nĩ eetagwo Bathoromayo), ũcio ũrona mbica-inĩ aikarĩte rungu rwa mũtĩ. Rĩrĩa Nathanaeli aakinyire harĩ Jesu, Jesu oigire ũũ: “Ta rorai Mũisiraeli kũna ũtarĩ ũhinga.” Nathanaeli aamakire nginya akĩũria Jesu atĩrĩ: ‘Ũmenyete ũhoro wakwa atĩa?’

 Jesu aamũcokeirie ũũ: ‘Filipu atanagwĩta, nĩ nguonire rĩrĩa uuma rungu rwa mũtĩ wa mũkũyũ.’ Nathanaeli nĩ aamakire nĩ kũigua atĩ Jesu nĩ aamenyaga harĩa aarĩ, nĩ ũndũ ũcio akĩra Jesu ũũ: “Wee nĩwe Mũrũ wa Ngai, wee ũrĩ Mũthamaki wa Isiraeli.”—Johana 1:49.

No nĩ kũrĩ andũ angĩ maatuĩkire arutwo a Jesu mbere ya Filipu na Nathanaeli. Andũ acio nĩ Andrea na mũrũ wa nyina Petero o hamwe na Johana; na hihi Jakubu mũrũ wa nyina na Johana aarĩ ũmwe wao. (Johana 1:35-51) Thutha wa ihinda, Andrea, Petero, Johana na Jakubu nĩ maacokire biacara-inĩ yao ya gũtega thamaki. No mũthenya ũmwe Jesu arĩ hakuhĩ na Iria rĩa Galili, nĩ onire Petero na Andrea magĩtega thamaki. Jesu aameerire ũũ: “Nũmĩrĩrai.”

 Rĩrĩa Jesu aathiire mbere hanini, nĩ onire Jakubu na Johana. Maarĩ na baba wao gatarũ-inĩ magĩthondeka neti ciao cia gũtega thamaki. Jesu akĩmeta nĩguo mamũrũmĩrĩre o nao. Hihi korũo nĩwe Jesu eetire-rĩ, ũngĩekire atĩa? Hihi nĩ ũngĩamũrũmĩrĩire o hĩndĩ ĩyo?— Andũ acio nĩ maamenyaga atĩ Jesu aatũmĩtwo nĩ Ngai. Kwoguo maatigire wĩra wao wa gũtega thamaki hau hau, na makĩrũmĩrĩra Jesu.—Mathayo 4:18-22.

Thutha wa andũ acio gũtuĩka arũmĩrĩri a Jesu-rĩ, hihi meekaga ũrĩa kwagĩrĩire hingo ciothe?— Aca. Ririkana atĩ kũrĩ hĩndĩ andũ acio maakararanagia igũrũ rĩgiĩ nũũ warĩ mũnene gũkĩra arĩa angĩ. No nĩ maathikĩrĩirie Jesu na nĩ meehaarĩirie gũcenjia. Angĩkorũo nĩ twĩhaarĩirie gũcenjia, o na ithuĩ no tũtuĩke arutwo a Jesu.

Jesu aaheire andũ a mĩthemba yothe mweke wa gũtuĩka arutwo ake. Hĩndĩ ĩmwe mũtongoria warĩ mũtongu mũno nĩ aathiire harĩ Jesu akĩmũũria ũrĩa angĩka nĩguo akaagaya muoyo wa tene na tene. Rĩrĩa mũtongoria ũcio oigire atĩ aatũire aathĩkagĩra watho wa Ngai kuuma arĩ mũnini, Jesu aamwĩrire ũũ: ‘Ũka ũtuĩke mũrũmĩrĩri wakwa.’ Nĩ ũĩ ũrĩa gwathiire?—

Rĩrĩa mũtongoria ũcio eerirũo atĩ gũtuĩka mũrutwo wa Jesu nĩ kwa bata gũkĩra ũtonga, nĩ aaiguire ũũru mũno. Akĩrega gũtuĩka mũrutwo wa Jesu tondũ nĩ eendete ũtonga wake gũkĩra Ngai.—Luka 18:18-25.

Thutha wa Jesu kũhunjia hakuhĩ mwaka ũmwe na nuthu, nĩ aathuurire arutwo 12 matuĩke atũmwo ake. Atũmwo maarĩ athuri arĩa Jesu aatũmire makarute wĩra wa mwanya. Hihi wee nĩ ũmoĩ?— Reke tuone kana no tũmamenye. Ta rora mbica ciao haha, na ũgwete marĩĩtwa mao. Rĩu geria kũgweta marĩĩtwa mao ũtekũrora mbica.

 No nĩ harĩ mũtũmwo ũmwe wacokire agĩtuĩka mũru. Eetagwo Judasi Mũisikariota. Thutha-inĩ, mũrutwo ũngĩ nĩ aathuurirũo agĩtuĩka mũtũmwo handũ hake. Nĩ ũĩ mũrutwo ũcio eetagwo atĩa?— Eetagwo Mathia. Thutha-inĩ Paulo na Baranaba nĩ maatuĩkire atũmwo, no matiataranagĩrio hamwe na acio 12.—Atũmwo 1:23-26; 14:14.

Thĩinĩ wa gĩcunjĩ kĩa mbere, nĩ tuonire atĩ Jesu nĩ eendete ciana. Aaciendete nĩkĩ?— Tondũ nĩ oĩ atĩ o nacio no ituĩke arutwo ake. Ningĩ ciana no ciarie maũndũ na njĩra ĩngĩtũma andũ agima mende gũthikĩrĩria na kwĩruta ũhoro wĩgiĩ Mũrutani Ũrĩa Mũnene.

 Ningĩ nĩ kũrĩ atumia maatuĩkire arutwo a Jesu. Amwe ao nĩ maakoragwo hamwe nake agĩthiĩ matũũra-inĩ kũhunjia. Amwe ao nĩ Mariamu Mũmagidali, Joana na Susana. O na no gũkorũo nĩ maamũrugagĩra na makamũhũũrĩra nguo.—Luka 8:1-3.

Hihi wee no wende gũtuĩka mũrutwo wa Jesu?— Ririkana atĩ, kuuga tu tũrĩ arutwo a Jesu, gũtingĩtũma tũtuĩke arutwo ake. Twagĩrĩirũo gũkorũo na mĩthiĩre ĩronania atĩ tũrĩ arutwo ake hingo ciothe, to rĩrĩa tũrĩ mĩcemanio-inĩ ya Gĩkristiano. Ũgwĩciria nĩ kũ kũngĩ twagĩrĩirũo gũkorũo na mĩthiĩre ĩronania atĩ tũrĩ arutwo a Jesu?—

Twagĩrĩirũo gũkorũo na mĩthiĩre ta ĩyo rĩrĩa tũrĩ mũciĩ, na rĩrĩa tũrĩ cukuru. Nĩ twagĩrĩirũo kũririkana atĩ, nĩguo tũkorũo tũrĩ arutwo a Jesu, no mũhaka hĩndĩ ciothe twĩkage ta ũrĩa eekaga.