Kauhanyo 13

Be Ne Ba Bile Balutiwa Ba Jesu

KI UFI mutang’a Mulimu yo munde ka ku fitisisa ya kile a pila?— U kumbile, ki Jesu Kreste. Kana u hupula kuli lwa kona ku ba sina yena?— Bibele i bulela kuli n’a lu tomezi mutala wa ku latelela. Mi u bata kuli lu be balutiwa ba hae.

Kana wa ziba se ku talusa ku ba mulutiwa wa Jesu?— Ku talusa lika ze ñata. Sa pili, lu lukela ku ituta ku yena. Kono ha ku feleli f’o. Hape lu lukela luli ku lumela z’a bulela. Ha lu eza cwalo, lu ka eza z’a lu bulelela.

Batu ba bañata ba bulela kuli ba lumela ku Jesu. Kana u hupula kuli kaufel’a bona ki balutiwa ba hae luli?— Kutokwa, buñata bwa bona haki balutiwa ba hae. Ba kana ba ya kwa keleke. Kono buñata bwa bona ba li ku ba ba itute za n’a lutile Jesu. Kaniti, ki bao fela ba ba latelela mutala wa Jesu ba ba li balutiwa ba hae.

Ha lu bulele za ba bañwi be ne ba li balutiwa ba Jesu ha n’a sa pila fa lifasi. Yo muñwi wa pili ku ba mulutiwa ki Filipi. Filipi n’a ile ku y’o biza Natanaele mulikan’a hae (y’o hape u bizwa kuli Bartolome), mi wa kona ku iponela yena a inzi mwatas’a kota. Natanaele ha n’a tile ku Jesu, Jesu n’a ize: ‘A mu bone, ki y’o munna ya sepahala, Muisilaele wa niti.’ Natanaele a komoka, mi a buza kuli: ‘U ni ziba cwañi?’

Jesu a li: “Filipi a si ka ku biza kale, ni ku boni ha u  inzi mwa kota ya feiga.” Natanaele a komoka kuli Jesu n’a ziba hande kwa n’a inzi, kacwalo Natanaele a li: “Ki wena Mwan’a Mulimu, Mulena wa Isilaele.”—Joani 1:49.

Ba bañwi ne ba bile balutiwa ba Jesu lizazi pili Filipi ni Natanaele ba si ka ba balutiwa ba hae. Bao ki bo Andreasi ni muhulwan’a hae Pitrosi hamoho ni Joani mi mwendi ni Jakobo muhulwan’a Joani. (Joani 1:35-51) Kono nakonyana hasamulaho, ba bane bao ba kutela kwa musebezi wa bona wa bundui. Mi zazi le liñwi Jesu ha n’a nze a zamaya fa munanga wa Liwate la Galilea, a bona bo Pitrosi ni Andreasi ba laleka kanyandi mwa liwate. Jesu kih’a ba biza a li: “Mu ni latelele.”

Ha n’a zwelapili hanyinyani, Jesu a bona bo Jakobo ni Joani. Ne ba li mwa sisepe ni ndat’a bona, ba nze ba onga tunyandi twa bona.  Jesu a ba biza kuli ba mu latelele ni bona. N’o ka ezañi kambe Jesu n’a ku bizize? Kana n’o ka ya ni yena honaf’o?— Banna bao ne ba ziba Jesu kuli ki mañi. Ne ba ziba kuli u lumilwe ki Mulimu. Kacwalo, honaf’o, ba siya tunyandi twa bona ni musebezi wa bona wa bundui mi ba latelela Jesu.—Mateu 4:18-22.

Banna bao ha ne ba bile balateleli ba Jesu, kana ku talusa kuli ku zwelela f’o, ne ba ezanga ze lukile kamita?— Kutokwa. Mwendi wa hupula kuli banna bao mane ne ba kile ba kananisana ka za kuli yo mutuna ku bona ki mañi. Kono ne ba teelelize ku Jesu, mi ne ba tabela ku cinca. Haiba lu tabela ku cinca, ni luna lwa kona ku ba balutiwa ba Jesu.

Jesu n’a memile batu ba mifuta kaufela kuli ba be balutiwa ba hae. Zazi le liñwi, mutangana ya fumile ya n’a li nduna a taha ku Jesu mi a mu buza mwa n’a ka konela ku fumanela bupilo bo bu sa feli. Nduna ya fumile y’o ha n’a bulezi kuli u kalezi kwa bwanana ku mamela milao ya Mulimu, Jesu a li ku yena: “Taha, u ni latelele.” Kana wa ziba se ne si ezahezi?—

Munna y’o ha n’a utwile kuli ku ba mulutiwa wa Jesu ne ku lukela ku ba kwa butokwa hahulu ku fita ku fuma, n’a swabile maswe. N’a si ka ba mulutiwa wa Jesu kakuli n’a lata hahulu masheleñi a hae ku fita mwa n’a latela Mulimu.—Luka 18:18-25.

Jesu ha s’a kutalize ibat’o ba ka silimo ni licika, a keta baapositola ba 12 kwa balutiwa ba hae. Baapositola bao ne ba li banna ba n’a lumanga ku eza musebezi o ipitezi. Kana wa ziba mabizo a bona?— Ha lu bone nji lwa kona ku ituta ona. Ha ku ba bone fa likepe le li tatama, mi u bone nji wa kona ku bulela mabizo a bona. Cwale u like ku bulela mabizo a bona ku zwelela mwa toho.

Nako ha ne i nze i ya, yo muñwi kwa baapositola ba 12 a ba ya maswe. Libizo la hae ki Judasi Isikariota. Hasamulaho, ne ku ketilwe mulutiwa yo munwi kuli a be muapositola. Kana wa ziba libizo la  hae?— Ki Matiasi. Hasamulaho, bo Paulusi ni Barnabasi ni bona ba t’o ba baapositola, kono ne ba sa balelwi ku ba 12.—Likezo 1:23-26; 14:14.

Sina ha ne lu itutile mwa Kauhanyo 1 ya buka ye, Jesu n’a tabela banana ba banyinyani. Ki kabakalañi ha n’a ba tabela?— Ki kabakala kuli n’a ziba kuli ni bona ne ba kona ku ba balutiwa ba hae. Mane, banana ba kona ku bulela lika ka nzila ye kona ku tahisa kuli niheba ba bahulu ba teeleze ni ku bata ku ituta ze ñwi ka za Muluti yo Mutuna.

Basali ba bañata ni bona ne ba bile balutiwa ba Jesu. Ba bañwi ne ba tamanga misipili ni yena ha n’a yanga kwa minzi ye  miñwi ku y’o kutaleza teñi. Bo Maria Magdalena, Joana, ni Suzana ne ba ezize cwalo. Mwendi hape ne ba tusize kwa ku mu apehela lico ni ku mu tapiseza liapalo.—Luka 8:1-3.

Kana wa bata ku ba mulutiwa wa Jesu?— U si libali kuli ku bulela fela kuli lu balutiwa ba hae ha ku talusi kuli lu balutiwa luli. Lu lukela ku bonisa kuli lu ba bañwi ba balutiwa ba hae ko lu li kaufela, isiñi fela ha lu ya kwa mikopano ya Sikreste. Kana wa kona ku hupula libaka ze ñwi ko lu tokwa ku bonisa kuli lu balutiwa ba Jesu?—

Lu swanela ku eza cwalo kwa ndu. Kono hape sibaka se siñwi ki kwa sikolo. Wena ni na ha lu lukeli ku libala kuli, kuli lu be mulutiwa wa niti wa Jesu, kamita lu lukela ku eza mwa n’a ezezanga yena, ku si na taba kuli lu kai.

Cwale lu bale hamoho se i bulela Bibele ka za balutiwa ba Jesu kwa Mateu 28:19, 20; Luka 6:13-16; Joani 8:31, 32; ni 1 Pitrosi 2:21.

[Siswaniso se si fa likepe 72]

Munna y’o ki mañi, mi u bile cwañi mulutiwa wa Jesu?

[Siswaniso se si fa likepe 73]

Ki bomañi b’a biza Jesu kuli ba be balutiwa ba hae?

[Maswaniso a fa likepe 75]

Pitrosi

Andreasi

Jakobo (munyan’a Joani)

Joani

Filipi

Natanaele

Mateu

Tomasi

Jakobo (mwan’a Alfea)

Simoni

Judasi (ya bizwa hape kuli Tadea)

Judasi Isikariota

[Maswaniso a fa likepe 76]

Ki bomañi basali ba be ne ba tusize Jesu ha n’a yanga kwa ku kutaza?

[Siswaniso se si fa likepe 76]

Ki kai ko ku li kwa butokwa ko lu lukela ku bonisa kuli lu mulutiwa wa Jesu?