ЧИ УЫДИ Хуыцауы ӕппӕты хуыздӕр лӕггадгӕнӕг? ~ О, Йесо Чырысти. Куыд хъуыды кӕныс, нӕ бон у, ӕмӕ Йесойы хуызӕн уӕм? ~ Библийы фыст ис, Йесо нын кӕй равдыста, цӕрын нӕ куыд хъӕуы, уый. Ӕмӕ нын йӕхӕдӕг дзуры, цӕмӕй йӕ ахуыргӕнинӕгтӕ суӕм.

Зоныс ӕй, цӕмӕй Йесойы ахуыргӕнинӕгтӕ суӕм, уый тыххӕй нӕ цы хъӕуы аразын? ~ Фыццаг уал хъуамӕ базонӕм, цы нын дзуры, уый. Фӕлӕ уый фаг нӕу. Хъуамӕ ма нӕ йӕ ныхӕстӕ уырнгӕ дӕр кӕной. Ӕмӕ уӕд, цы нын дзуры, уый аразгӕ дӕр кӕндзыстӕм.

Бирӕтӕ дзурынц, зӕгъгӕ, мах Йесойыл ӕууӕндӕм. Фӕлӕ уыдоны се ’ппӕты дӕр Йесойы ахуыргӕнинӕгтӕ схонӕн ис? ~ Сӕ фылдӕрӕй уый зӕгъӕн нӕй. Уыдон, чи зоны, аргъуанмӕ дӕр цӕуынц. Фӕлӕ дзы бирӕты никуы фӕндыд, Йесо цӕуыл ахуыр кодта, уый базонын. Йесойы ахуыргӕнинаг та схонӕн ис, Йесо куыд цард, афтӕ чи цӕры, ӕрмӕстдӕр уыцы адӕймаджы.

Цӕй ӕмӕ базонгӕ уӕм, Йесо зӕххыл куы цард, уӕд йӕ ахуыргӕнинӕгтӕ чи уыдысты, уыдонимӕ. Йӕ фыццаг ахуыргӕнинӕгтӕй иу уыди Филипп. Филипп ацыд йе ’мбал Нафанаилы агурӕг (хуыдтой ма йӕ Варфоломей дӕр). Фенӕн ӕй ис мӕнӕ ацы нывыл, бады бӕласы бын. Нафанаил Йесомӕ куы ’рбацыд, уӕд дзы Йесо загъта: «Ай у ӕцӕг израилаг, сайын чи нӕ зоны, уый». Ууыл Нафанаил тынг бадис кодта ӕмӕ йӕ бафарста: «Кӕцӕй мӕ зоныс?»

«Филипп дӕм куы нӕма фӕдзырдта, уӕдмӕ дӕр дӕ федтон, легъуибӕласы бын куы бадтӕ, уӕд»,–  загъта Йесо. Кӕм уыди, уый Йесо кӕй зыдта, уый Нафанаилмӕ тынг диссаг фӕкаст, ӕмӕ йын загъта: «Ды дӕ Хуыцауы Фырт, ды дӕ Израилы Паддзах» (Иоанны 1:49).

Филипп ӕмӕ Нафанаилӕй иу бон раздӕр та Йесойы ахуыргӕнинӕгтӕ систы Андрей ӕмӕ йе ’фсымӕр Петр, стӕй Иоанн ӕмӕ ма, ӕвӕццӕгӕн, Иоанны ӕфсымӕр Иаков дӕр (Иоанны 1:35–51). Фӕлӕ цасдӕры фӕстӕ уыцы цыппар лӕджы ногӕй кӕсагахсыны куыст райдыдтой. Ӕмӕ иу бон Йесо Галилейы денджызы былгӕрӕтты куы фӕцӕйцыд, уӕд федта Петры ӕмӕ Андрейы, сӕ хызтӕ денджызы ӕппаргӕ. Ӕмӕ сын загъта: «Рацӕут мӕ фӕдыл».

Йесо дарддӕр куы ацыд, уӕд федта Иаковы ӕмӕ Иоанны. Уыдон сӕ фыдимӕ бадтысты лодкӕйы ӕмӕ хуыдтой сӕ кӕсагахсӕн хызтӕ. Йесо уыдонӕн дӕр загъта, цӕмӕй йӕ фӕдыл рацӕуой.  Дӕуӕн дӕр Йесо афтӕ куы загътаид, уӕд куыд бакодтаис? Уайтагъд йемӕ ацыдаис? ~ Уыцы лӕгтӕ зыдтой, Йесо чи у, уый. Уыдон зыдтой, Хуыцау ӕй кӕй рарвыста. Гъемӕ сӕ куыст уайтагъд ныууагътой ӕмӕ йӕ фӕдыл ацыдысты (Матфейы 4:18–22).

Уыцы адӕм Йесойы ахуыргӕнинӕгтӕ куы систы, уӕд цымӕ уый фӕстӕ алкӕддӕр, раст цы у, уый арӕзтой? ~ Уый афтӕ нӕу. Хъуыды ма йӕ кӕндзынӕ, уыдон сӕ кӕрӕдзиимӕ мӕстыйӕ кӕй дзырдтой, уӕлдӕр бынат сӕ кӕмӕн ис, ууыл. Фӕлӕ уӕддӕр Йесомӕ хъуыстой ӕмӕ архайдтой сӕхи аивыныл. Мах дӕр нӕхи аивыныл куы архайӕм, уӕд нӕ Йесойы ахуыргӕнинӕгтӕ рауайдзӕн.

Йесо алыхуызон адӕмӕн дзырдта, цӕмӕй йӕ ахуыргӕнинӕгтӕ суыдаиккой. Иухатт ӕм ӕрбацыд иу хъӕздыг хицау ӕмӕ йӕ бафарста, зӕгъгӕ мӕ цы хъӕуы аразын, цӕмӕй ӕнустӕм цӕрон. Уыцы лӕг куы загъта, йӕ гыццылӕй фӕстӕмӕ Хуыцауы фӕдзӕхстытӕ кӕй ӕххӕст кӕны, уӕд ын Йесо загъта: «Рацу мӕ фӕдыл». Цымӕ куыд бакодта? ~

Уыцы хъӕздыг лӕг куы базыдта, ӕмӕ, цӕмӕй Йесойы ахуыргӕнинаг суа, уый тыххӕй йӕ хъӕуы йӕ хъӕздыгдзинӕдтӕ ныууадзын, уӕд тынг ӕрӕнкъард. Уый Йесойы ахуыргӕнинаг не сси, уымӕн ӕмӕ йе ’хцатӕ Хуыцауӕй фылдӕр уарзта (Лукайы 18:18–25).

Йесо иу аз ӕмӕ ’рдӕджы бӕрц Хуыцауы ныхас куы фӕхъусын кодта, уӕд йӕ ахуыргӕнинӕгтӕй равзӕрста 12 апостолы. Уыдоны уый ӕрвыста ахсджиаг куыст кӕнынмӕ. Сӕ нӕмттӕ сын зоныс? ~ Цӕй ӕмӕ сӕ сахуыр кӕнӕм. Ӕркӕс-ма сын сӕ нывтӕм ӕмӕ сын сӕ нӕмттӕ хъӕрӕй бакӕс. Ныр та сӕ ӕнӕкӕсгӕйӕ радзур.

Фӕстагмӕ 12 апостолӕй иу сси ӕвзӕр. Уый уыди Иудӕ Искариот. Фӕлӕ фӕстӕдӕр йӕ бӕсты равзӕрстой ӕндӕр адӕймаджы. Йӕ ном ын зоныс? ~ Уымӕн йӕ ном хуынди Матфий. Уый фӕстӕ Павел ӕмӕ Варнавӕ дӕр систы апостолтӕ, фӕлӕ уыдон 12 апостолӕй нӕ уыдысты (Хъуыддӕгтӕ 1:23–26; 14:14).

 Ацы чиныджы 1-аг сӕрӕй куыд базыдтам, афтӕмӕй-иу Йесо сывӕллӕтты ахуыр кӕнынӕн алкӕддӕр рӕстӕг ссардта. Куыд хъуыды кӕныс, цӕмӕн? ~ Уымӕн ӕмӕ йӕ зыдта, уыдонӕн дӕр сӕ бон кӕй у, ӕмӕ йӕ ахуыргӕнинӕгтӕ суой. Сывӕллӕттӕ арӕх ахӕм цыдӕртӕ фӕзӕгъынц, ӕмӕ стырты дӕр бафӕнды ӕппӕты хуыздӕр Ахуыргӕнӕгмӕ байхъусын ӕмӕ йӕ хуыздӕр базонын.

Сылгоймӕгтӕй дӕр бирӕтӕ систы Йесойы ахуыргӕнинӕгтӕ. Ӕндӕр горӕттӕм-иу хъусын кӕнынмӕ куы ацыд, уӕд-иу уыцы сылгоймӕгтӕй дӕр иуӕй-иутӕ йемӕ ацыдысты. Зӕгъӕм, Марийӕ Магдалинӕ, Иоаннӕ ӕмӕ Сусаннӕ. Уыдон  ма йын, ӕвӕццӕгӕн, кодтой хӕринаг дӕр ӕмӕ йын йӕ дзаумӕттӕ ’хсадтой (Лукайы 8:1–3).

Зӕгъ-ма, фӕнды дӕ, ӕмӕ Йесойы ахуыргӕнинаг уай? ~ Рох дӕ ма уӕд: афтӕ куы дзурай, зӕгъгӕ, ӕз Йесойы ахуыргӕнинаг дӕн, уӕд уый фаг нӕу. Хъуамӕ нӕ хъуыддӕгтӕй бӕрӕг уа, йӕ ахуыргӕнинӕгтӕ кӕй стӕм, ӕмӕ ӕрмӕст ӕмбырдты нӕ, фӕлӕ алы ран дӕр. Куыд хъуыды кӕныс, уый ма ноджыдӕр кӕм хъуамӕ уа бӕрӕг? ~

О, хӕдзары. Стӕй ма хъуамӕ бӕрӕг уа скъолайы дӕр. Дӕуӕй дӕр ӕмӕ мӕнӕй дӕр хъуамӕ ма рох кӕна: цӕмӕй Йесойы ахуыргӕнинӕгтӕ уӕм, уый тыххӕй хъуамӕ алы бон дӕр ӕмӕ алы ран дӕр нӕхи Йесойы хуызӕн дарӕм.