¿PIN Jehová Diosta tukuypi kasukun?... Arí, Jesusmi. ¿Atisunmanchu pay jina kayta?... Atisunmanmi. Bibliapunin niwashanchis paypa ejemplonta qatikunapaq. Jesús kikinmi munan paypa qatikuqnin kananchista.

Ichaqa, ¿imakunatan ruwananchis Jesuspa qatikuqnin kanapaq?... Ñaupaqtaqa paymantan astawan yachananchis. Chaymantapas creenanchismi tukuy yachachisqanpi. Jinaspapas kasukunanchismi kamachiwasqanchista.

Askha runakunan ninku: “Creeykun Jesuspi”, nispa. ¿Chayta llapa niqkunachu Jesuspa qatikuqnin kanku?... Manan. Wakinqa rinkun iglesiankuta, ichaqa manan Bibliata leenkuchu Jesusmanta yachanankupaq. Cheqaq cristianokunaqa Jesuspa ejemplontan qatikunanku.

Jesusqa kay allpapi kashaspan qatikuqninkunata ajllakuran. Jujninmi karan Felipe. Felipetaq amigon Natanaelta (juj sutinmi Bartolomé) maskhaspa Jesusman aparan. Payqa sach’a k’uchupin tiyasharan, kay dibujopi rikusqayki jina. Natanael achhuykuqtinmi Jesús niran: ‘Qhawariychis kay runata, paypiqa manan engaño kanchu’, nispa. Natanaeltaq Jesusta tapuran: ‘¿Imaynapitaq reqsiwankiri?’, nispa.

Jesusmi niran: “Manaraq Felipe wajamushasuqtiykin noqaqa rikumuyki higos sach’a k’uchupi kashaqta”,  nispa. Chay nisqanmanta anchata admirakuspan Natanaelqa niran: “Qanqa Diospa Churinmá kasqanki, Israelpa reyninmá kasqanki”, nispa (Juan 1:49).

Juj p’unchay ñaupaqtan Jesusqa ajllasqaña Andresta wayqen Pedrotawan. Chaymantapas Juanta, yaqapaschá wayqen Santiagotawan (Juan 1:35-51). Chay qhepamanmi ichaqa tawantinku challwana llank’anankuman kutipuranku. Juj kutinmi Jesusqa Galilea qochaq cantonta purisharan. Chaypin rikuran Pedrota Andrestawan challwa jap’inanku llikata qochaman wijch’uykushaqta. Jinan Jesusqa niran: “Qhepayta jamuychis”, nispa.

Chay cercallapin rikuran Santiagota wayqen Juantawan. Paykunaqa botepin papankuwan kuska challwananku mallata  sirasharanku. Jinan Jesusqa paykunatawan wajaran. ¿Imatan qan ruwawaq chhaynata Jesús wajasuqtiyki? ¿Kaq ratochu riwaq?... Chay runakunaqa yacharankun Jesusta Diospuni kachamusqanta. Chaymi llank’anankuta saqerparispa Jesusta qatikuranku (Mateo 4:18-22).

Jesuspa qatikuqnin kapuspa, ¿allin kaqllatapunichu ruwaranku?... Manan, mayninpiqa pantarankun. Juj kutinmi paykunapura discutiranku mayqenninku aswan importante kasqankumanta, ¿yuyashanki? Ichaqa Jesuspa consejonta uyarikuspan cambiaranku. Sichus noqanchispas kausayninchista cambiasun chayqa, Jesuspa qatikuqninmi kapusun.

Jesusqa llapa runakunatan invitaran qatikuqnin kanankupaq. Juj kutinmi qhapaq wayna Jesusman achhuykuspa tapuran: “¿Imatan ruwanay wiñay kausayta chaskinaypaq?”, nispa. Chay waynaqa wawa kasqanmantapachan Diospa kamachisqan leykunata junt’asqa. Chaymi Jesusqa niran: “Qatikamuway”, nispa. ¿Qatikuranchu?...

Jesusmi niran Diosta serviy aswan importante kasqanta qhapaq kay maskhanamantaqa. Chaymi chay waynaqa sinchita llakikuran. Payqa tukuy kaqnintan astawan munakuran, chaymi mana Jesusta qatikuranchu (Lucas 18:18-25).

Jesusqa juj wata kuskanta jina predicaspan 12 qatikuqninkunata ajllaran apostolkuna kanankupaq. Chay apostolkunaqa especial llank’anatan chaskiranku. ¿Yachankichu paykunaq sutinta?... Chayta kunan yachasun. Dibujota qhawaspa sapankankuq sutinta leey. Chaymanta umallaykimanta niy sapankankuq sutinta.

Watakuna qhepamanmi Judás Iscariote millayman tukupuran. Chaymi paypa rantinpi juj jaykupuran. ¿Yachankichu sutinta?...  Sutinmi Matías. Qhepamanmi Pablowan Bernabewan Jesuspa apostolnin kapuranku. Ichaqa manan 12 apostolkunawan kuskachu yupasqa karanku (Hechos 1:23-26; 14:14).

Kay libroq qallariyninpi yachasqanchis jina, Jesusqa tiempotan t’aqaran wawakunawan rimananpaq. ¿Imarayku?... Wawakunapas Jesuspa qatikuqnin kayta atisqankurayku. Paykunaqa sumaqtan rimanku. Chaymi kuraqkunapas paykunata uyarispa Jesusmanta yachayta munanku.

Jesustaqa manan qharikunallachu qatikuran, karanmi warmikunapas. Wakinqa Jesuswan kuskan juj llaqtakunata  viajaqku predicanankupaq. Wakinmi karan María Magdalena, Juana, Susana. Paykunachá mayninqa mijunata wayk’uqku p’achatapas t’aqsaqku (Lucas 8:1-3).

¿Munawaqchu Jesuspa qatikuqnin kayta?... Ichaqa manan simillawanchu chayta ninanchis. Nitaqmi juñukusqanchis wasillapichu sumaqta portakunanchis. Jesuspa qatikuqnin kanapaqqa tukuy ladopin allinta portakunanchis. ¿Maykunapin allinta portakuwaq?...

Arí, wasipi, escuelapi, juj ladokunapi ima. Ichaqa kayta ama qonqasunchu: Jesuspa qatikuqninkunaqa Jesús jinan allinta portakunanchis maypi kaspapas.