O AI le auauna sili a le Atua i ana auauna uma lava?— Ioe, o Iesu Keriso. O le ā sou manatu, e mafai ona tatou pei o Iesu?— Ua fai mai le Tusi Paia na faataatia e Iesu se faataʻitaʻiga ina ia tatou mulimuli ai. Ua valaaulia i tatou e Iesu ina ia avea ma ona soo.

E te iloa o ā mea e aofia ai i le avea ma se soo o Iesu?— E tele mea e aofia ai. Muamua lava, e tatau ona aʻoaʻoina i tatou e Iesu. Ae e lē na o le pau ai lenā. E tatau foʻi ona tatou talitonu moni i mea ua fetalai mai ai Iesu. A tatou talitonu i ai, o le a tatou faia mea na.

E toʻatele tagata ua fai mai e talitonu iā Iesu. Ae o le ā sou manatu, o i latou uma o ni soo o Iesu?— E leai, o le toʻatele o na tagata e lē o ni soo o Iesu. Atonu latou te ō i lotu. Ae o le toʻatele o tagata na, e leʻi faaaluina so latou taimi e faamasani ai i aʻoaʻoga a Iesu. O le mea moni, e na o i latou e mulimuli i le faaaʻoaʻoga a Iesu e avea ma ona soo.

Seʻi tatou talanoa i nisi na avea ma soo o Iesu a o soifua o ia i le lalolagi. O se tasi na muamua lava avea ma soo o Iesu, o Filipo. Na maua e Filipo lana uō o Natanielu (o le isi ona igoa o Patolomaio), o loo nofonofo i lalo o se laau e pei ona e vaaia i le ata. Ina ua alu atu Natanielu iā Iesu, na faapea atu Iesu: “Faauta, o le Isaraelu moni, e leai sona pepelo.” Ua teʻi Natanielu ma fesili iā Iesu: ʻO fea e te silafia mai ai aʻu?’

 Na tali atu Iesu: “Na ou iloa oe i lalo o le mati, a o leʻi valaau atu lava Filipo iā te oe.” Ua ofo Natanielu ona na silafia e Iesu le mea tonu lava na iai o ia, ona fai atu loa lea iā Iesu: “O oe lava o le Alo o le Atua, o oe lava le Tupu o Isaraelu.”​—Ioane 1:49.

Na iai isi tagata na avea ma soo o Iesu i le aso e muamua atu i le aso lea na avea ai Filipo ma Natanielu ma soo. O igoa o tamāloloa na o Aneterea ma lona uso o Peteru, o Ioane ma atonu foʻi o lona uso o Iakopo. (Ioane 1:35-51) Ae mulimuli ane, na toe foʻi nei soo e toʻafā i a latou galuega faifaiva. I se isi aso a o savali Iesu i le matafaga o le Sami o Kalilaia, na ia iloa atu Peteru ma Aneterea o tatao le la upega i le sami. Na valaau atu Iesu iā i laʻua: “Inā mulimuli mai ia iā te aʻu.”

 A o faaauau le savaliga a Iesu, na ia iloa ai foʻi Iakopo ma Ioane. Na latou iai faatasi ma lo la tamā i se vaa, ma o loo fonofono lo latou upega. Na valaau atu foʻi Iesu iā i laʻua ina ia mulimuli iā te ia. O le ā sau mea e fai pe ana valaau atu Iesu iā te oe? Faamata e te mulimuli loa iā Iesu i le taimi lenā?— Sa iloa e tamāloloa nei Iesu. Na latou iloa na auina mai Iesu e le Atua. O le taimi lava lea na latou tuua ai loa a latou galuega faifaiva ae mulimuli iā Iesu.​—Mataio 4:18-22.

Ina ua avea nei tamāloloa ma soo o Iesu, pe o lona uiga ea latou te leʻi toe faia lava se mea sesē?— E leai. Atonu e te manatua, na fefinauaʻi nei tamāloloa po o ai o i latou e sili. Ae na latou faalogo iā Iesu, ma na naunau e sui o latou uiga. Afai tatou te naunau e sui a tatou amio, e mafai foʻi ona avea i tatou ma soo o Iesu.

Sa valaaulia e Iesu so o se tagata e avea ma ona soo. I se tasi aso, na alu atu ai se alii mauʻoa e lē matua tele iā Iesu, ma fesili atu i ai po o le ā sana mea e fai ina ia maua ai le ola e faavavau. Ina ua fai mai le alii mauʻoa, na ia tausia tulafono a le Atua mai lava a o laʻitiiti, na valaaulia e Iesu o ia: “Mulimuli mai iā te aʻu.” E te iloa le mea na tupu?—

Ina ua iloa e lenei alii e ao ona faatāua le avea ma soo o Iesu na i lo le tele o tupe, na matuā faanoanoa ai. E leʻi avea le alii lenei ma soo o Iesu auā na sili atu lona manaʻo i ana tupe na i lo le alofa i le Atua.​—Luka 18:18-25.

Ina ua toeitiiti atoa le tausaga ma le ʻafa talu ona talaʻi Iesu, na ia filifilia ai le 12 o ona soo e avea ma aposetolo. O aposetolo, o tamāloloa ia na auina atu e Iesu e fai se galuega faapitoa. E te iloa o latou igoa?— Seʻi o tatou taumafai la e aʻo o latou igoa. Seʻi vaai i o latou ata nei, pe mafai ona e taʻu maia o latou igoa. Ia taumafai e taʻu mai o latou igoa e aunoa ma le tilotilo i ata.

 Peitaʻi, sa iai se tasi aposetolo na amio leaga mulimuli ane. O lona igoa o Iuta le Sekara. Ona filifilia ai lea o se tasi o soo e avea ma aposetolo. E te iloa lona igoa?— O Matatia. Sa avea foʻi Paulo ma Panapa ma aposetolo mulimuli ane ai, peitaʻi e leʻi aofia i laʻua i le ʻauaposetolo e toʻa 12.​—Galuega 1:23-26; 14:14.

E pei ona tatou iloa mai le Mataupu 1 o le tusi lenei, e fiafia tele Iesu i tamaiti. Aiseā na fiafia ai Iesu i tamaiti?— Auā na silafia e Iesu e mafai foʻi ona avea tamaiti ma ona soo. E mautinoa lava e mafai e tamaiti ona faia ni faamatalaga i se auala e uunaʻia ai tagata matutua ina ia mananaʻo e aʻoaʻo atili mea e uiga i le Faiaʻoga Sili.

 E toʻatele foʻi fafine na avea ma soo o Iesu. Na faimalaga faatasi isi fafine ma Iesu a o talaʻi atu i isi aai. O igoa o nisi o fafine na, o Maria le Makatala, o Ioana ma Susana. Atonu na latou fesoasoani foʻi e saunia taumafa a Iesu ma tā ona lavalava.​—Luka 8:1-3.

E te manaʻo e avea oe ma soo o Iesu?— Ia manatua foʻi, e lē lava le faapea atu o i tatou o soo o Iesu. E tatau ona tatou amio lelei e pei o soo o Iesu e lē gata i taimi e fai ai sauniga faa-Kerisiano, ae i so o se mea tatou te iai. Pe e mafai ona e mafaufau i ni nofoaga, e tāua ona tatou amio lelei ai, ia pei o se soo o Iesu?—

Ioe, i totonu o lo tatou aiga. Ae o se isi nofoaga, o totonu o aʻoga. O se mea e tatau ona tatou manatuaina, ina ia avea ma soo moni o Iesu, e tatau ona tatou amio lelei e pei o Iesu i le aso atoa, i aso uma ma i so o se mea tatou te iai.