NGUYIPHI inceku yaNkulunkulu lelunge kunato tonkhe leyake yaphila?— NguJesu Khristu. Ucabanga kutsi singafanana yini naye?— LiBhayibheli litsi Jesu wasibekela sibonelo lokufanele sisilandzele. Usicela kutsi sibe bafundzi bakhe.

Uyati yini kutsi kusho kutsini kuba ngumfundzi waJesu?— Kusho tintfo letinyenti. Kwekucala, kufanele sifundze kuye. Kodvwa akugcini nje lapho. Kufanele siphindze sikukholwe sibili loko lakushoko. Nangabe senta njalo, sitokhona kukwenta loko lasitjela kona.

Bantfu labanyenti batsi bayakholwa kuJesu. Ucabanga kutsi bonkhe labantfu babafundzi baJesu mbamba yini?— Linyenti labo alisibo. Kungenteka kutsi bayaya esontfweni, kodvwa labanyenti kubo abatiniki sikhatsi sekufundza loko Jesu lakufundzisa. Kuyacaca kutsi ngulabalingisa sibonelo saJesu kuphela lababafundzi bakhe.

Ase sicoce ngalabanye lababa bafundzi baJesu ngesikhatsi alapha emhlabeni. Lomunye walabafundzi baJesu bekucala nguFiliphu. Filiphu wahamba wayofuna umngani wakhe Nathanayeli (lophindze abitwe ngekutsi nguBhatalomewu), lona lombona ahleti lapha phansi kwesihlahla. Ngesikhatsi Nathanayeli efika kuJesu, Jesu watsi: ‘Nayi indvodza letsembekile, lengumIsrayeli sibili.’ Nathanayeli wamangala wase uyambuta utsi: “Ungatelaphi?”

Jesu wamphendvula watsi: “Ngikubone asengakakubiti Filiphu, ngalesikhatsi ume ngephansi kwesihlahla  semkhiwa.” Nathanayeli wamangala ngobe Jesu bekati kutsi bekakuphi, ngako watsi: “UyiNdvodzana yaNkulunkulu futsi uyiNkhosi yaka-Israyeli.”​—Johane 1:49.

Kunalabanye lababa bafundzi baJesu ngayitolo, ngembikwekutsi boFiliphu naNathanayeli babe ngibo. Labo bekubo-Andreya naPhetro umnakabo, kanye naJohane mhlawumbe naJakobe umnakabo. (Johane 1:35-51). Nanobe kunjalo, ngemuva kwesikhatsi bobane babuyela ebhizinisini labo lekudweba tinhlanti. Ngako kwatsi ngalelinye lilanga Jesu ahamba ngaseLwandle LwaseGalile, wabona Phetro na-Andreya bafaka emanethi abo elwandle. Jesu wababita watsi: “Ngilandzeleni.”

Ngemuva kwekuhamba sikhashana, Jesu wabona Jakobe naJohane. Bebasesikebheni nababe wabo, balungisa emanethi abo. Jesu wababita  nabo, watsi abamlandzele. Bewutakwenta njani kube Jesu bekabita wena? Bewutamlandzela yini ngaso leso sikhatsi?— Lamadvodza bekamati Jesu. Bekati kutsi bekatfunywe nguNkulunkulu. Ngako avele ashiya libhizinisi lawo lekudweba, alandzela Jesu.​—Matewu 4:18-22.

Bese atakwenta tintfo letilungilie todvwa yini ngaso sonkhe sikhatsi?— Kungenteka uyakhumbula kutsi lamadvodza ake aphikisana ngekutsi ngubani lomkhulu emkhatsini wawo. Kodvwa amlalela Jesu, futsi afisa nekushintja. Nangabe natsi sifisa kushintja, singaba bafundzi baJesu.

Jesu wacela tonkhe tinhlobo tebantfu kutsi tibe bafundzi bakhe. Ngalelinye lilanga, umholi losemusha lonjingile waya kuJesu wambuta kutsi angakutfola njani kuphila lokuphakadze. Ngesikhatsi lombusi atsi bekasolo alalela imitsetfo yaNkulunkulu kusukela ebuntfwaneni, Jesu wammema watsi: “Bani ngumlandzeli wami.” Ucabanga kutsi kwentekani ngemuva kwaloko?—

Ngesikhatsi lombusi eva kutsi kuba ngumfundzi waJesu kubaluleke kakhulu kunekunjinga, waphatseka kabi. Akazange abe ngumfundzi waJesu ngobe bekatsandza imali yakhe kakhulu kunaNkulunkulu.​—Lukha 18:18-25.

Ngemuva kwekutsi Jesu sekashumayele cishe umnyaka nesigamu, wakhetsa bafundzi bakhe labangu-12 kutsi babe baphostoli. Wabatfuma kutsi bente umsebenti lobalulekile. Uyawati yini emagama alabaphostoli?— Ase siwafundze. Buka titfombe tabo lapha, bese usho emagama abo. Nyalo tama kusho lamagama abo ungakawabuki.

Lomunye kulabaphostoli labangu-12 wenta tintfo letimbi. Ligama lakhe bekunguJudasi Skariyothi. Ngekuhamba kwesikhatsi, kwakhetfwa lomunye umfundzi kutsi abe ngumphostoli. Uyalati yini ligama lakhe?— BekunguMatiyasi. Ngekuhamba kwesikhatsi boPawula naBhanabasi  nabo baba baphostoli, kodvwa bebangabalwa kulaba labangu-12.​—Imisebenti 1:23-26; 14:14.

Njengobe sifundzile eSehlukweni 1 salencwadzi, Jesu bekatinika sikhatsi sekuba nebantfwana. Ucabanga kutsi wakwentelani loko?— Kungobe bekati kutsi nabo bangaba bafundzi bakhe. Ecinisweni, bantfwana bangasho tintfo letingenta bantfu labadzala balalele futsi bafune kwati lokunyenti ngeMfundzisi Lomuhle Kakhulu.

Kunabomake labanyenti nabo lababa bafundzi baJesu. Labanye babo bahamba naye ngesikhatsi ayoshumayela kulamanye emadolobha. BoMariya waseMagdala, Jwana naSusana bahamba naye.  Kungenteka kutsi bebamsita ngekumlungisela kudla nangekuwasha timphahla takhe.​—Lukha 8:1-3.

Uyafuna yini kuba ngumfundzi waJesu?— Khumbula kutsi kumane usho nje kutsi ungumfundzi wakhe akukwenti ube nguye. Kufanele sitiphatse njengebafundzi bakhe ngisho nobe sikuphi, hhayi nje kuphela nasisesifundvweni. Tikhona yini letinye tindzawo locabanga kutsi nasikuto kubalulekile kutiphatsa njengebafundzi baJesu?—

Kufanele sitiphatse kanjalo nasisekhaya. Lenye indzawo lokufanele sitiphatse njengebafundzi baJesu kusesikolweni. Mine nawe kufanele singakhohlwa kutsi kute sibe bafundzi baJesu beliciniso, kufanele sitiphatse njengaye ngaso sonkhe sikhatsi, onkhe emalanga, ngisho nobe sikuphi.