KASI muteŵeti wa Ciuta wakuruska wose ni njani?— Waneneska, ni Yesu Kristu. Kasi ukughanaghana kuti nase tingacita vintu mwakuyana na iye?— Baibolo likuyowoya kuti iye walikutirekera ciyerezgero cakuti ticirondezge. Ndiposo wakuticema ise kuti tiŵe ŵasambiri ŵake.

Kasi ukumanya ico cikung’anamura kuŵa musambiri wa Yesu?— Cikung’anamura vintu vinandi. Cakudanga, tikwenera kusambira kufuma kwa iye. Kuti nkusambira pera yayi, paliso vinyake. Tikwenera kugomezga ivyo Yesu wakuyowoya. Usange tikugomezga, mbwenu ticitenge ivyo wakutiphalira.

Ŵantu ŵanandi ŵakuyowoya kuti ŵali na cigomezgo mwa Yesu. Kasi ukughanaghana kuti wose mbasambiri nadi ŵa Yesu?— Yayi, ŵanandi ŵa iwo mbasambiri ŵake yayi. Nangauli ŵangaŵa kuti ŵakuruta ku tcharitchi, kweni ŵanandi ŵakupatura yayi nyengo yakuti ŵasambire ivyo Yesu wakasambizga. Nadi pano, ni ŵekha awo ŵakurondezga ciyerezgero ca Yesu ndiwo mbasambiri ŵake.

Sono tidumbiranenge vya awo ŵakaŵa ŵasambiri ŵa Yesu pa nyengo iyo iye wakaŵira pano pasi. Yumoza mwa ŵantu ŵakwambilira awo ŵakaŵa ŵasambiri ŵake wakaŵa Filipu. Filipu wakaruta na kukasanga mubwezi wake Natanayeli (uyo wakucemekaso kuti Bartolomeyu), uyo ukumuwona pa cithuzithuzi apa wakhala pasi pa khuni. Apo Natanayeli wakiza kwa Yesu, Yesu wakati: ‘Wonani muntu wambura  uryarya, Muisrayeli nadi.’ Natanayeli wakazizwa, anteura wakafumba kuti: ‘Mwandimanya uli?’

Yesu wakazgora wakati: ‘Wandakuceme Filipu, ucali musi mwa khuni la cikuyu lira, nkakuwona.’ Natanayeli wakazizwa comene kuti Yesu wakamanya malo apo iye wakakhala, anteura Natanayeli wakayowoya kuti: “Imwe ndimwe Mwana wa Ciuta, ndimwe Karonga wa Israyeli.”—Yohane 1:49.

Pakaŵaso ŵanji awo ŵakaŵa ŵasambiri ŵa Yesu pambere Filipu na Natanayeli ŵandaŵe ŵasambiri. Mazina ghawo ghakaŵa Andireya na mukuru wake Petros, ndiposo Yohane na mukuru wake Yakobe. (Yohane 1:35-51) Pamanyuma pake ŵasambiri ŵanayi aŵa ŵakamureka Yesu na kurutaso kukakora somba. Zuŵa linyake apo Yesu wakendanga mumpepete mwa Nyanja ya Galileya, wakawona Petros na Andireya ŵakuponya neti zakukolera somba mu nyanja. Yesu wakaŵacema wakati: ‘Zani kwa ine.’

 Wakati wendapo pacoko, Yesu wakawona Yakobe na Yohane. Iwo ŵakaŵa na awiskewo mu boti, ŵakasonanga neti zakukolera somba. Yesu wakaŵacema kuti ŵamurondezge. Kasi iwe ntena ukacita wuli usange Yesu wakucemenge? Kasi ntena ukamurondezga nyengo yeneyiyo?— Ŵanarumi aŵa ŵakamanya nadi kuti uyu wakaŵa Yesu. Ŵakamanya kuti iye wakatumika na Ciuta. Ndico cifukwa cake ŵakareka nyengo yeneyiyo kukora somba na kumurondezga Yesu.—Mateyu 4:18-22.

Pamanyuma pakuti ŵanarumi aŵa ŵaŵa ŵasambiri ŵa Yesu, kasi iwo ŵakacitanga vintu viweme pera?— Yayi. Kumbukira kuti pakwambilira ŵakasuskananga za uyo wakaŵa mukuru pakati pawo. Kweni ŵakapulikiranga ivyo Yesu wakayowoyanga, ndipo ŵakayezgayezga kuti ŵasinte nkaro yawo. Usange nase tikuyezgayezga kuti tisinte nkaro yithu, nase tingaŵa ŵasambiri ŵa Yesu.

Yesu wakacema ŵantu ŵakupambana-pambana kuti ŵaŵe ŵasambiri ŵake. Zuŵa linyake muwusi musambazi wakiza kwa Yesu na kumufumba umo wangasangira umoyo wamuyirayira. Peneapo muwusi musambazi wakayowoya kuti wakasunganga marango gha Ciuta kuyambira apo wakaŵa munyamata, Yesu wakamuphalira kuti: ‘Iza kuno undirondezge.’ Kasi ukumanya ico cikacitika?—

Apo mwanarumi yura wakapulika kuti kuŵa musambiri wa Yesu ncintu cakuzirwa comene kuruska usambazi, wakaŵa na citima comene. Wakatondeka kuŵa musambiri wa Yesu cifukwa wakatemwa comene ndarama kuruska Ciuta.—Luka 18:18-25.

Pamanyuma pakuti Yesu wapharazga kwa cirimika na hafu, wakasanka ŵasambiri ŵake 12 kuti ŵaŵe ŵapostole. Ŵapostole aŵa ŵakaŵa ŵanarumi awo wakaŵatuma kuti ŵacite ncito yapadera. Kasi ukuŵamanya mazina ghawo?— Tiye timanye mazina ghawo. Laŵiska pa vithuzithuzi apa na kuwona usange ungayowoya mazina ghawo. Pamanyuma pake uzunure mazina ghawo mwambura kulaŵiska mu buku.

Pamanyuma pake yumoza mwa ŵasambiri 12 wakazgoka muheni. Zina lake likaŵa Yuda Iskariote. Yikati yarutapo nyengo, musambiri  munyake wakasankika kuti waŵe mpostole. Kasi ukumumanya zina lake?— Wakaŵa Matiya. Pamanyuma pake Paulos na Barnaba ŵakaŵaso ŵapostole, kweni iwo ŵakaŵa gulu limoza yayi la ŵapostole 12 ŵara.—Milimo 1:23-26; 14:14.

Nga ni umo tikasambilira mu Cipaturo 1 ca buku lino, Yesu wakatemwanga kucezga na ŵana. Ncifukwa wuli iye wakacitanga nteura?— Wakamanya kuti ŵana nawo ŵangaŵa ŵasambiri ŵake. Ŵana ŵangayowoya vintu mu ntowa iyo yingapangiska ŵantu ŵarara kutegherezga comene na kusambira vintu vinandi vyakuyowoya za Msambizgi Waluso.

Pakaŵaso ŵanakazi ŵanandi awo ŵakaŵa ŵasambiri ŵa Yesu. Ŵanji mwa iwo ŵakendanga naye apo  wakarutanga ku misumba yinyake kukapharazga. Ŵanji awo ŵakenda na Yesu ŵakaŵa Mariya Magadala, Yohana na Susana. Panyake ŵanakazi aŵa ŵakamuphikirangaso cakurya Yesu na kumucapira maraya ghake.—Luka 8:1-3.

Kasi ungatemwa kuŵa musambiri wa Yesu?— Kumbukira kuti, kuyowoya waka kuti tikukhumba kuŵa ŵasambiri ŵake ncakukwanira yayi. Tikwenera kucita vintu nga mbasambiri ŵake kulikose uko tiri, kuti ku maungano gha Cikristu pera yayi. Kasi ungazunura malo ghanyake uko tikwenera kurongora kwizira mu ivyo tikucita kuti ndise ŵasambiri ŵa Yesu?—

Enya nadi, tikwenera kurongora pa nyumba. Malo ghanyake nku sukulu. Ico iwe na ine tingaruwanga yayi ncakuti, kuti tiŵe ŵasambiri ŵaunenesko ŵa Yesu, tikwenera kucita vintu mwakuyana na umo Yesu wakacitira zuŵa lose, zuŵa lirilose, kulikose uko tingaŵa.