KO OI te ‵toe tavini ‵lei a te Atua telā ne ola?— E tonu koe, ko Iesu Keliso. E mata, e mafaufau koe me e mafai o fai tatou e pelā mo ia?— Ia, e fai mai te Tusi Tapu me ne tuku mai ne ia se fakaakoakoga ‵lei ke tau‵tali atu tatou ki ei. Kae e ‵kami ne ia tatou ke fai mo fai ana soko.

E iloa ne koe a te uiga o te fai mo fai se soko o Iesu?— E fakauiga loa ki mea e uke. Muamua la, e ‵tau o tauloto tatou mai i a ia. Kae e se gata fua i konā. E ‵tau foki o tali‵tonu tatou ki ana muna. Kafai e fai tatou penā, ka fai ne tatou a mea e manako a ia ke fai ne tatou.

E fai mai a tino e tokouke me e tali‵tonu latou ki a Iesu. E mata, e mafaufau koe me e fai a latou katoa mo fai ana soko?— Ikai, a te tokoukega o latou e se fai penā. E mafai o olo atu latou ki lotu. Kae e seki fakamāumāu aka eiloa ne tino e tokouke a taimi ke tauloto ki mea ne akoako mai ne Iesu. A te ‵tonuga loa, ko tino fua kolā e tau‵tali atu ki te fakaakoakoga a Iesu e fai mo fai ana soko.

Ke na sau‵tala tatou ki nisi tino kolā ne fai mo soko o Iesu i te taimi ne fai ei a ia mo fai se tagata i te lalolagi nei. A te tino muamua e tokotasi ne fai mo ana soko ko Filipo. Ne fanatu a Filipo o ‵sala tena taugasoa ko Natanielu (e fakaigoa foki ki a Patolomaio), telā e lavea ne koe e sagasaga mai lalo i se lakau. I te taimi ne fanatu ei a Natanielu ki a Iesu, ne fai atu a Iesu: ‘Kiloke, tenei eiloa te tino Isalaelu telā e seai se uiga fakaloiloi i a ia.’ Ne poi a Natanielu kae fesili atu: ‘Ne iloa pefea ne koe au?’

 Ne fai atu a Iesu: “A koi tuai o kalaga atu a Filipo ki a koe i lalo i te lakau ko te mati, a ko leva ne lavea ne au a koe.” Ne ofo malosi eiloa a Natanielu me ne iloa ‵lei ne Iesu a te koga ne nofo ei a ia, telā ne fai atu ei a Natanielu: “Te Faiakoga, a koe ko te Tama a te Atua, a koe ko te Tupu o Isalaelu.”—Ioane 1:49.

Ne fai a nisi tino mo fai a soko o Iesu i te aso mai mua o te faiga o Filipo mo Natanielu mo soko. A lāua konei ko Anitelea mo tena taina ko Petelu, penā foki loa mo Ioane kae kāti mo te taina foki o Ioane ko Iakopo. (Ioane 1:35-51) Kae mai tua malie ifo, ne toe ‵foki atu a latou tokofa konei ki te lotou pisinisi faiika. I te aso e tasi, i te taimi ne sasale atu ei a Iesu i tafa o te Tai o Kalilaia, ne lavea ne ia a Petelu mo Anitelea ko tuku ifo te lā tili ki te tai. Ne kalaga atu a ia ki a lāua: “Tau‵tali mai i a au.”

Ne momea atu a ia ki mua, kae ne lavea ne ia a Iakopo mo Ioane. Ne ‵nofo atu lāua i te poti fakatasi mo te lā tamana, kae faite olotou tili. Ne  kalaga atu a Iesu ki a lāua ke tau‵tali atu foki i a ia. Ne a au mea ka fai moi ne kalaga atu a Iesu ki a koe? E mata, ka tautali fakavave atu eiloa koe i a ia?— E iloa ne tāgata konei a Iesu. E iloa ne lāua me ne uga mai a ia ne te Atua. Tela la, i konā foki eiloa, ne tiakina te lā pisinisi faiika kae tau‵tali atu i a Iesu.—Mataio 4:18-22.

Ona ko tāgata konei ne fai mo soko o Iesu, e mata, ne fakauiga i ei me mai tua ifo, ka fai faeloa ne latou a mea ‵lei?— Ikai. Kāti e masaua ne koe me i tāgata konei ne kinau sāle me ko oi te ‵toe tino sili i a latou. Ne faka‵logo eiloa latou ki a Iesu, kae ne loto fia‵fia ke ‵fuli latou. Kafai e loto fia‵fia tatou o fai a ‵fuliga, e mafai foki o fai tatou mo soko o Iesu.

Ne ‵kami ne Iesu a vaegā tino katoa mo fai ana soko. I te taimi e tasi, ne fanatu se tamataene pule kae maumea ki a Iesu kae fesili atu me se a te auala e mafai ei o maua ne ia te ola se-gata-mai. I te taimi ne fai atu ei te pule maumea tenei me ko oti ne tausi ne ia a fakatonuga a te Atua mai tena folikiga eiloa, ne ‵kami ne Iesu a ia: ‘Vau koe ke fai mo oku soko.’ E iloa ne koe me se a te mea ne tupu?—

Ia, i te taimi ne iloa ei ne te tagata tenā me i te faiga mo soko o Iesu e ‵tau o fai mo fai te ‵toe mea tāua i lō te taumafai ke maumea, ne fanoanoa malosi eiloa tou tagata i ei. Ne seki fai a ia mo fai se soko o Iesu ona ko te mea ne sili atu tena alofa ki ana tupe i lō te Atua.—Luka 18:18-25.

Mai tua o te talaiatuga a Iesu mō tausaga toeitiiti ko kātoa te tasi mo te āfa, ne filifili aka ei ne ia ana soko e toko 12 ke fai mo ana apositolo. A apositolo ne tāgata kolā ne uga atu ke fai se galuega fakapito. E iloa ne koe olotou igoa?— Ke onoono aka tatou me e mafai o masaua ne tatou. Kilo atu ki olotou ata i konei, kae onoono aka me e mafai o taku mai ne koe olotou igoa. Ko taumafai ei koe o faka‵mau a igoa konā i tou mafaufau.

Fakamuli loa, ne kamata o masei a te tino e tokotasi mai i te toko 12 o apositolo. A ia ko Iuta te Isikaliota. Mai tua ifo, ne toe filifili aka a te  suā soko ke fai mo fai se apositolo. E iloa ne koe tena igoa?— Ko Matatia. Fakamuli ifo, ne fai foki a Paulo mo Panapa e pelā me ne apositolo, kae ne seki aofia lāua i soko e toko 12.—Galuega 1:23-26; 14:14.

E pelā mo te mea ne tauloto ne tatou i te Mataupu 1 o te tusi tenei, ne fiafia malosi a Iesu ki tamā tama‵liki. Kaia ne fai ei a ia penā?— Ona ko te mea ne iloa ne ia me e mafai foki o fai latou mo ana soko. A te ‵tonuga loa, e masani o fai atu ne tama‵liki a mea i se auala telā e fai ei a tino ma‵tua ke faka‵logo kae fia tauloto ki mea e uke atu e uiga ki te Faiakoga Sili.

E tokouke a fāfine ne fai mo fai a soko o Iesu. Ne faima‵laga atu a nisi tino mo ia i te taimi ne fanatu ei a ia ki nisi fa‵kai o talai. A Malia  te Makatala, Ioana, mo Susana ne aofia i a latou konā. Kāti ne fesoasoani atu foki latou ki te fakatokaga o ana mea‵kai kae ‵ta ana gatu.—Luka 8:1-3.

E mata, e manako koe o fai mo soko o Iesu?— Masaua a te fai atu fua me i a tatou ko ana soko e se fai ei tatou mo ana soko. E ‵tau o fai tatou mo ana soko i so se koga e ‵nofo atu tatou i ei, kae e se ko taimi fua e olo atu ei tatou ki fakatasiga Kelisiano. E mata, e mafai o mafaufau koe ki nisi koga kolā e tāua ke fai faka‵lei ‵tou mea e pelā me se soko o Iesu?—

Ao, e ‵tau o fai tatou penā i te fale. Kae ko te suā koga foki ko te akoga. Kae ko te mea telā e se ‵tau lele eiloa o puli i a tāua me i te fai mo fai se soko tonu o Iesu, e ‵tau o fakaakoako tatou ki a ia i te aso kātoa, i aso katoa, faitalia me e ‵nofo atu tatou i fea.