TUU nga xpinni Dios ni qué liica nuchee ni bibani lu Guidxilayú riʼ yaʼ.... Jnézapeʼ nga guniʼluʼ: laabe nga Jesucristu. Ñee raʼbuʼ zanda gúninu casi bíʼnibe la?... Biblia cayabi laanu guláʼquibe ti ejemplu ni chinándanu. Ne laabe cayábibe laanu gácanu discípulo stibe, o chinándanu laabe.

Nannuʼ xi riníʼ gácanu discípulo stiʼ Jesús la?... Riniʼni stale cosa. Tobi de laani nga guizíʼdinu de laabe. Peru cadi nga si diʼ. Laaca naquiiñeʼ guni crenu de guidubi ladxidoʼno cani rusiidibe ne gúninu cani.

Nuu stale tu riníʼ runi cré Jesús. Peru, ñee raʼbuʼ dxandíʼ nácacabe discípulo stibe la?... Stale de laacabe cadi nacadícabe ni. Zándaca pa riécabe yuʼduʼ, peru qué huabeecabe tiempu para guiziidicabe guiráʼ ni guníʼ Maestru Ni Jma Nanna Gusiidiʼ que. Ca discípulo si stiʼ Jesús nga ni dxandíʼ zinanda modo bíʼnibe.

Guininu de tuudxi binni ni guca discípulo stiʼ Jesús ora guyuube lu Guidxilayú riʼ. Tobi de cani bizulú primé nga Felipe. Ne laabe nagueendaca yeyúbibe xhamígube Natanael (ni laaca láʼ Bartolomé), ni zuba xaʼnaʼ ti yaga casi rihuinni lu dibuju ca. Ora bidxiña Natanael ra nuu Jesús la? Jesús gudxi laabe: Raríʼ zeeda tobi ni dxandipeʼ naca binni Israel, laabe qué rusiguiibe. Bidxagayaa Natanael stale ne gunabadiidxaʼ laabe: «Paraa binibiáʼ lu naa yaʼ».

 Jesús bicabi laabe: «Ante cuidxi Felipe lii, ora nuu lu xaʼna yaga duʼga que, maca biiya lii». Natanael bidxagayaa ximodo ganna Jesús paraapeʼ ndiʼ nuube, ngue runi nabe: «Lii nga Xiiñi Dios. Lii nga Rey sti binni Israel» (Juan 1:49).

Yanna Andrés ne bíʼchibe Pedru ne zaqueca Juan ne zándaca ne bíʼchibe Jacobo (o Santiagu), gúcacabe discípulo stiʼ Jesús ti dxi ante gaca Felipe ne Natanael discípulo (Juan 1:35-51). Peru, despué la? guidápacabe bibiguétacabe para guinaazecabe benda sti biaje. Ti dxi, laga zidiʼdiʼ Jesús guriá nisadóʼ stiʼ Galilea, biiyabe Pedru ne Andrés cusábacaʼ chin ndaaniʼ nisa para guinaazecaʼ benda. Jesús gudxi laacabe: «Lata nanda naa».

Guzá si Jesús sti ndaa que biiyabe Jacobo ne Juan. Nuucaʼ ndaaniʼ barcuhuiiniʼ stiʼ bixhózecaʼ cayunichaahuicaʼ chin ni  rinaazenecaʼ benda. Jesús laaca gudxi laacabe chinándacabe laa. Xi ñúniluʼ pa ñabi Jesús lii ninándaluʼ laa yaʼ. Nineluʼ laabe oraqueca la?... Ca hombre que nánnacabe tuu nga Jesús. Nánnacabe Dios biseendaʼ laabe. Ngue runi, oraqueca bisaanacabe xhiiñacabe ne yenándacabe laabe (Mateo 4:18-22).

Guca si ca hombre que discípulo sti Jesús, ñee raʼbuʼ bíʼnicabe puru si ni jneza la?... Coʼ. Zándaca guietenaláʼdxiluʼ gudinde diidxacabe de tu laa nga jma risaca ládecabe. Peru bicaadiágacabe Jesús ne bichaacabe. Laanu pa laaca racaláʼdxinu guchaʼnu la? zanda gácanu discípulo stibe.

Jesús biʼniʼ invitarbe guiráʼ clase binni para gaca discípulo stibe. Ti dxi la? bidxiña ti xaíque stiʼ ti guidxi laabe ti baʼdunguiiu ni napa stale bueltu ne gunabadiidxaʼ laabe xi naquiiñeʼ guni para guicaa guendanabani ni qué zaluxe. Ora guníʼ hombre riʼ runi ni na ley stiʼ Dios dede dxi nahuiiniʼ la? Jesús gudxi laabe: «Dananda naa». Nannuʼ xi guca óraque la?...

Ora gúnnabe jma risaca nga gaca binni discípulo stiʼ Jesucristu que gapa bueltu la? baʼdunguiiu que guyuu triste. Ne qué ñácabe discípulo stiʼ Jesús purtiʼ jma gunnaxhiibe xpuéltube que Dios (Lucas 18:18-25).

Jesús maʼ napa ti iza aronda de cucheeche diidxaʼ ora gulibe doce de ca discípulo que para gácacaʼ apóstol stibe. Ca apóstol que gúcacaʼ caadxi hombre ni gucuaacaʼ ti dxiiñaʼ risaca. Ñee nannuʼ tu lácabe la?... Guidúʼyanu pa zanda guizíʼdinu lácabe. Biiyadxí lu ca dibuju ca ne biiyaʼ pa ganda gúʼndaluʼ lácabe. Oracaruʼ guníʼ cani chupa chonna biaje ti guiaananeluʼ cani.

Despué, tobi de ca doce apóstol, ni láʼ Judas Iscariote que gúcabe malu ne sti discípulo guyuu lugar stibe. Ñee nannuʼ tu laabe la?... Laabe nga Matías. Gudiʼdiʼ si ca iza ca la? Pablu  ne Bernabé laaca gúcacaʼ apóstol stibe, peru qué ñacadícabe de ca doce que (Hechos 1:23-26; 14:14).

Casi modo bizíʼdinu lu primé capítulo stiʼ libru riʼ, Jesús gunnaxhiibe ca baʼduʼ que. Xiñee yaʼ.... Purtiʼ nánnabe zanda gueeda gácacaʼ discípulo stibe. Ni dxandíʼ nga ca baʼduʼ ca riníʼcabe stale tiru xiixa dede cani huaniisi ca rucaadiágacaʼ ne racaláʼdxicaʼ guiziidicaʼ de Maestru Ni Jma Nanna Gusiidiʼ.

Stale gunaa laaca yenanda Jesús. Casi María Magdalena, Juana ne Susana, ca gunaa riʼ yenecaʼ laabe ora yegucheechebe diidxaʼ sti guidxi. Zándaca pa  laaca gucanécabe laabe para guiaʼriʼ xhábabe ne gúnicabe guendaró para laabe (Lucas 8:1-3).

Ñee riuláʼdxiluʼ gácaluʼ discípulo stiʼ Jesús la?... Bietenalaʼdxiʼ: qué zácadinu discípulo stiʼ Jesús pa guinísinu runi crenu laabe. Naquiiñeʼ gusihuínninu nácanu discípulo stibe ratiica nuunu, cadi ra riuusinu para guizíʼdinu de Jiobá. Ñee caníʼ íqueluʼ paraaruʼ naquiiñeʼ gusihuínninu ni la?...

Ya, ralídxinu. Sti lugar ca zanda gácani ra scuela. Para gácanu tobi ni dxandíʼ zinanda Jesús la? cadi chuʼ dxi gusiaandanu naquiiñeʼ gúninu casi bíʼnibe guiráʼ ora ne ratiica nuunu.