TIKA dong ngat mo otimo gin mo marac i komi?— En mono owano in nyo owaco gin mo ma ocwero cwinyi?— Omyero mono in bene icul wange kit ma en otimo kwede i komi-ni?—

Ka ngat mo ocwero cwinygi, pol pa dano gicwero cwiny ngat meno bene me culo wange. Ento Yecu opwonyo ni myero watim kica bot jo ma gibalo i komwa. (Matayo 6:12) Ento ka ngat mo cwero cwinywa tyen mapol kono? Omyero watimme kica tyen adi?—

Meno aye gin ma Petero onongo mito ngeyone. Pi meno, i nino mo acel en openyo Yecu ni: ‘Omyero mono atimme kica tyen abiro?’ Tyen abiro keken pe romo. Yecu owacci: ‘Omyero itim kica tyen pyerabiro tyen abiro’ ka ngat mo otimo bal i komi tyen mapol kumeno.

Meno pud dong obedo tyen mapol ya! Wiwa bene pe bitwero po i kom wel jami maraco ma ngat moni otimo nyo owaco i komwa, tika twere? Man aye gin ma Yecu onongo tye ka wacciwa: Omyero pe watemme me kwano jami maraco ma jo mukene gitimo i komwa. Ka gupenyo ni myero watim botgi kica omyero watim botgi.

Yecu onongo mito nyutu bot  lupwonnyene kit ma bedo ka timo kica pire tek kwede. Pi meno, i nge gamo lapeny pa Petero-ni, en otito bot lupwonnyene lapor acel. Tika i mito winyone?—

I kare mo mukato angec, onongo tye kabaka mo ma kite ber. En onongo lakica adada. En onongo miyo cente me adena bot luticce ka gimito kony. Ento nino oromo ma kabaka tye ka mito ni luticce ma gitye ki banyane gudwok centene. Kikelo latic acel ma tye ki banya me cente denari milion 60 i nyim kabaka. Meno onongo obedo twon cente madit adada!

 Ento latic-ci onongo otiyo ki cente ducu pa kabaka dok onongo dong pe twero culone. Pi meno, kabaka omiyo twero ni myero kicat en woko. Kabaka bene owaco ni myero kicat dakone, lutinone kacel ki jamine ducu. Ka dong cente ma kinongo ki i kom cat man omyero kicul ki kabaka. Itamo ni latic-ci owinyo nining ki i cwinye?—

En orumo conge piny i nyim kabaka kun bako doge bote ni: ‘Ladit kong idi cwinyi i koma do ci abiculo banyani ducu ma atye kwede.’ Kono onongo nene ibedo kabaka-ni, ngo ma onongo ibitimo i kom latic man?— Kabaka otamo pi laticce-ni matek. Pi meno kabaka otimme kica. En owaco ki laticce meno ni myero pe dong odwok cente mo keken ki i kom denari milion 60 ca. Cwiny latic man pud dong obedo yom ya!

Ento ngo ma latic meno otimo i ngeye? En okato woko ki bot kabaka ci onongo latic lawote mukene ma tye ki banyane me denari miya acel. En ogwaro latic lawote man ki ngute ci ocako deyone kun wacce ni: ‘Cul banyana me denari miya acel ma tye boti-ni!’ Mono iromo tamo i kom ngat mo me timo gin macalo meno kun pud kabaka otimme kica pi banyane madit?—

Latic lawote ma tye ki banya me denari miya acel-li onongo tye lacan. En onongo pe twero culo cente man cutcut. Pi meno, en oryebbe piny i nyim latic lawote-ni ci obako doge ni: ‘Kong idi cwinyi i koma, ci abiculo banyani.’ Laco-ni mono onongo myero omi kare mukene ki latic lawote-ni?— Ngo ma onongo ibitimo?—

Laco man onongo pe lakica calo kabaka. En onongo mito centene cutcut. Ento pien ni latic lawote ni ononge pe twero culo banyane, en oweko ki tere i buc. Lutic luwote mukene-ni guneno ka gin man timme ci cwinygi ocwer. Kica omakogi i kom latic ca ma tye i buc-ci. Pi meno gucito gutito lokke bot kabaka.

 Kabaka bene cwinye ocwer pi gin ma otimme. Kiniga omake matek adada i kom laticce ma okwero timo kica-ni. Pi meno en olwonge ci owacce ni: ‘In latic ma kite rac, an pe aweko banyana ducu ma onongo itye kwede? Onongo in bene pe kica omyero omaki i kom latic lawoti?’

Latic ma pe lakica-ni onongo myero opwony timo kica ki bot kabaka ma kite ber-ri. Ento en pe onongo pwony mo keken. Pi meno kabaka obolo latic meno i buc nio ka en oculo banya me denari milion 60 ca. Ngene kene ni ki i buc en pe binongo cente matwal me culo banya pa kabaka. Pi meno omyero obed kuno wang ma en oto.

I kare ma Yecu otyeko tito lapor man, en owaco bot lulub kore ni: “Wora ma tye i polo bene bitimowu kit meno, ka ce pe wutimo kica bot dano ki i cwinywu, dano acel acel ki ominne.”—Matayo 18:21-35.

 Omyero inge ni wan ducu watye ki banya madit pa Lubanga. Ki lok ada, kwowa oa ki bot Lubanga! Dong banyawa ma tye bot dano mukene tidi ka kiporo ki banya pa Lubanga ma watye kwede. Banyawa ma dano gitye kwede bedo calo denari miya acel ma latic acel ca onongo odeno ki bot latic lawote mukene-ni. Ento banya pa Lubanga ma watye kwede pi jami maraco ma watimo rom aroma ki denari milion 60 ma latic-ci odeno ki bot kabaka.

Lubanga lakica adada. Kadi bed watimo jami maraco en timiwa kica. En pe miniwa pwod ki kwanyo kwowa ento ka wato en bicerowa. Pi meno, wiwa myero opo i kom pwony eni: Lubanga timiwa kica keken ka wan watimo kica ki dano ma obalo i komwa. Man obedo pwony ma pire tek, pe kumeno?—

Dong ka ngat mo ocwero cwinynyi ento obako doge boti, ibitimo gin ango? Mono ibitime kica?— Ento ka otimme tyen mapol kono? Pud ibimedde ki timme kica?—

Ka wan aye onongo watye ka kwayo kica, onongo kono wamito ni dano moni-ni otimiwa kica, pe kumeno?— Pi meno omyero watim kumeno bene bote. Pe omyero wawac awaca keken ni watimme kica ento myero watimme kica ada ki i cwinywa. Ka watimo meno, wanyutu ni ada wamito bedo lulub kor Lapwony Madit-ti.