BUSHE umuntu alikubifyapo?— Bushe acitile ifya kukukalifya?— Bushe na iwe ufwile ukumukalifya nga filya fine akucitile?—

Abantu abengi nga babakalifya balabwekeshamo. Lelo Yesu asambilishe ukuti tufwile ukweleela abatubiifya. (Mateo 6:12) Ni shani nga ca kuti umuntu atubiifya fye lyonse? Miku inga tulingile ukumweleela?—

Ico e cintu Petro alefwaya ukwishiba. E co bushiku bumo aipwishe Yesu ati: ‘Bushe mfwile ukumweleela ukufika ku miku 7?’ Imiku 7 yacepa. Yesu atile: ‘Ufwile ukweleela ukufika ku miku 77’ nga ca kuti umuntu akubiifya ukufika kuli iyo miku.

Iyo miku ingi sana! Te kuti tupende ne miku atukalifya, bushe te ifyo? Kabili ici e co Yesu aletweba: Tatufwile ukulaibukisha imiku abantu batubiifya. Nga balomba ubweleelo tufwile ukubeleela.

Yesu alefwaya ukulanga abasambi bakwe ifyo cacindama ukweleela. E co pa numa ya kwasuka Petro, ashimikile abasambi bakwe umulumbe. Bushe kuti watemwa nkushimikile?—

 Kale kwali imfumu iisuma. Yalekongwesha na basha ba iko indalama lintu balekabila ubwafwilisho. Lelo ubushiku bwalifikile lintu imfumu yalefwaya abasha ba iko ukubwesha indalama bakongwele. Umusha umo aliletelwe uwakongwele ku mfumu indalama amamilioni 60. Isho shali ni ndalama ishingi sana!

Lelo ulya musha alibomfeshe indalama shonse isha mfumu e co afililwe ukubwesesha imfumu shilya nkongole. E co imfumu yatile ulya musha bamushitishe.  Imfumu yalandile no kuti bashitishe no mukashi wa ulya musha pamo na bana bakwe na fyonse ifyo akwete. Lyene, shilya ndalama bakapoka nga bashitisha, bali no kulipila imfumu. Uletontonkanya ukuti ulya musha ayumfwile shani pali ci?—

Afukeme ku mfumu no kulomba ati: ‘Napaapaata, mpeniko inshita na imbi, kabili ndi no kubwesha indalama shonse nakongola kuli imwe.’ Auba ilya mfumu, cinshi wali no kucita kuli ulya musha?— Ilya mfumu yaumfwilile uluse umusha wa iko. E co imfumu yaeleele ulya musha. Yaebele umusha ukuti talekabila kubwesha indalama nangu shimo pali yalya mamilioni 60. Ulya musha afwile alitemenwe sana!

Lelo cinshi ulya musha acitile nomba? Aile no kusanga umusha umbi, uyo akongweshe indalama 100. Aikete ulya musha munankwe no kutendeka ukumufina pa mukoshi, no kutila: ‘Mbwesesha indalama 100 isho wakongola!’ Bushe kuti waelenganya umuntu ukucite co, maka maka nga nabamweleela nga nshi ku mfumu?—

Umusha, uwakwete inkongole sha ndalama 100 ali mupiina. Afililwe ukubwesha shilya ndalama ilyo line. E co afukamine umusha munankwe no kulomba ati: ‘Napaapaata, mpeniko inshita na imbi, kabili nkamubwesesha inkongole.’ Bushe ulya muntu alekabila ukupeela umusha munankwe inshita na imbi?— Aciba ni we nga wacitile shani?—

Uyu muntu taali umusuma filya imfumu yali. Alefwaya indalama shakwe ilyo line. Kabili pa mulandu wa kuti umusha munankwe afililwe ukulipila, amupoosele mu cifungo. Abasha bambi balimwene fyonse fi, kabili tabatemenwe. Baumfwilile uluse ulya musha bapoosele mu cifungo. E co baileeba imfumu ifyacitike.

 Imfumu na yo tayatemenwe icacitike. Yalikalipe sana pa mulandu wa ulya musha ashaeleele umunankwe. E co yaitile ulya musha no kumweba ati: ‘We musha mubi, bushe nshakulekelele inkongole wakwete kuli ine? Bushe na iwe taufwile ukulekelela umusha mubiyo?’

Ulya musha ashaleelela alekabila ukusambililako kuli ilya mfumu isuma. Lelo tasambilileko. E co ilya mfumu yapoosele ulya musha mu cifungo ukufikila akabweshe shilya ndalama amamilioni 60. Kabili, mu cifungo tengasanga indalama sha kulipila imfumu. E co ali no kwikalilila mulya ukufikila imfwa.

Ilyo Yesu apwishishe ukushimika uyu mulumbe, aebele abakonshi bakwe ati: “E fyo na Tata wa mu muulu akacita kuli imwe, nga tamulekelela muntu onse munyina ku mitima yenu.”—Mateo 18:21-35.

Wamona, ifwe bonse twalikwata inkongole ishingi kuli Lesa.  Na kuba, ubumi bwesu bwafuma kuli Lesa! E co nga twalinganya ku nkongole twakwata kuli Lesa, abantu bambi bakwata fye inkongole shinono kuli ifwe. Imisha bakwata kuli ifwe shaba kwati ni shilya ndalama 100 isho ulya musha akongwele kuli ulya musha umbi. Lelo imisha twakwata kuli Lesa pa mulandu wa fintu fyabipa tucita shaba kwati ni ndalama amamilioni 60 isho ulya musha akongwele ku mfumu.

Lesa musuma sana. Nangu twacita ifintu fyabipa, alatweleela. Tatukanda pa kutupoka ubumi umuyayaya. Lelo ili lisambililo tulingile ukwibukisha: Lesa akatweleela ilintu fye tuleelela abatubiifya. Ilyo lisambililo lyacindama, bushe te ifyo?—

E co umuntu nga akucite cibi lelo alomba ubwelelo, cinshi uli no kucita? Bushe uli no kumweleela?— Ni shani nga alekukalifya imiku iingi? Bushe na lyo line ukamweleela?—

Nga ca kuti ni fwe tulelomba ubwelelo, kuti twafwaya ulya muntu ukutweleela bushe te ifyo?— E co na ifwe tufwile ukumweleela. Tatufwile ukulanda fye ati twamweleela, lelo tufwile ukumweleela ukufuma pa mutima. Lintu twacite co, tulanga ukuti tulefwaya ukuba abakonshi ba kwa Kasambilisha Mukalamba.