ESKI en dimoun in deza fer ou en keksoz mal?— I ti tap ou oubyen i ti dir ou en move parol?— Ou krwar ou devret fer parey avek li?—

Bokou dimoun i rann laparey ler en dimoun i fer zot en keksoz mal. Me Zezi ti ansennyen ki nou devret pardonn bann ki’n fer nou en keksoz mal. (Matye 6:12) Be si en dimoun i kontinyen fer pa bon avek nou? Ki kantite fwa nou bezwen pardonn li?—

Sanmenm ki Pyer ti anvi konnen. En fwa i ti demann Zezi: “Konbyen fwa mon devre pardonn li, ziska set fwa?” Set fwa pa ase. Zezi ti dir: ‘Ou devret pardonn li swasanndis set fwa’ si fodre.

Sa en kantite fwa sa! Nou pa pou ni kapab mazinen ki sa dimoun ti’n fer nou sak fwa. Be sanmenm ki Zezi ti pe dir nou: Nou pa devret sey mazinen ki kantite fwa en dimoun in fer nou en keksoz mal. Si zot demann nou pardon, nou devret pardonn zot.

Zezi ti anvi montre son bann disip ki i vreman enportan pour  pardonnen. Alors, apre ki i ti’n reponn Pyer son kestyon, i ti rakont son bann disip en zistwar. Ou ti a kontan tann sa zistwar?—

Alors en zour ti annan en bon lerwa. I ti byen zantiy. I ti menm pret son bann lesklav larzan ler zot ti bezwen. Me en zour lerwa ti demann son bann lesklav pour rann li sa ki zot dwa li. En lesklav  ki ti dwa li 60 milyon pyes larzan ti ganny anmennen devan lerwa. Sa en kantite larzan sa!

Me sa lesklav ti’n depans tou larzan lerwa e i pa ti kapab rann. Alors lerwa ti donn lord pour vann sa lesklav, son madanm, zanfan, ek tou sa ki i ti annan. Koumsa i ti a kapab ganny son larzan ki sa lesklav ti dwa li. Ki mannyer ou krwar sa lesklav ti santi?—

I ti tonm azenou devan lerwa e sipliy li: ‘Silvouple, donn mwan en pe plis letan, e mon a pey ou tou sa ki mon dwa ou.’ Si ou ti sa lerwa, ki ou ti pou fer?— Sa lerwa ti pran lapenn pour son lesklav. I ti pardonn li. I ti dir sa lesklav pa rann li sa larzan, ni menm enn sa pyes larzan. Sa lesklav ti’n bezwen vreman kontan!

Me ou konnen ki sa lesklav ti fer apre? I ti al vwar en lot lesklav ki ti dwa li zis san pyes larzan. I ti graponn sa lesklav dan son likou e konmans trangle li, e dir: ‘Rann mwan sa san pyes larzan ki ou dwa mwan!’ Ou kapab krwar en dimoun i kapab fer sa, sirtou apre ki lerwa ti’n les pase sa gro det ki i ti dwa?—

Sa lesklav ki ti dwa li zis san pyes larzan ti mizer. I pa ti kapab rann sa larzan deswit. I ti tonm ater dan son lipye e sipliy li: ‘Silvouple, donn mwan en pe plis letan, e mon a rann ou sa ki mon dwa ou.’ Eski sa zonm ti’n devret donn sa lot lesklav plis letan?— Ki ou ti pou fer si ou ti dan son plas?—

Me sa zonm li, i pa ti parey lerwa. I ti anvi son larzan konmela menm. E akoz sa lesklav pa ti kapab pey li, i ti fer li ganny met dan prizon. Lezot lesklav ki ti vwar sa pa ti kontan ditou.  Zot ti pran lapenn pour sa lesklav ki ti’n ganny met dan prizon. Alors zot ti al rakont lerwa sa ki ti’n arive.

Lerwa osi pa ti kontan sa ki ti’n arive. I ti vreman ankoler avek sa lesklav akoz i ti annan leker dir. Alors i ti fer apel li e dir li: ‘Ou en move lesklav! Mon’n fek efas tou ou det ki ou ti dwa mwan. Pa ou ti’n devret fer parey pour ou kanmarad?’

Sa lesklav leker dir ti’n devret aprann en bon leson avek sa bon lerwa. Me i pa ti aprann. Aprezan lerwa ti fer met sa lesklav dan prizon ziska i ti kapab pey li sa 60 milyon pyes larzan ki i ti dwa. Byensir i pa ti pou zanmen kapab rann lerwa son larzan akoz dan prizon i pa ti travay pour ganny larzan. Alors i ti pou reste dan prizon ziska son lanmor.

Pour fini sa zistwar, Zezi ti dir son bann disip: “Koumsa menm ki mon Papa ki dan lesyel pou fer avek zot si zot pa pardonn zot frer avek tou zot leker.”—Matye 18:21-35.

 Ou vwar, nou tou nou dwa Bondye en kantite. Menm nou lavi i sorti kot li! Alors lezot dimoun i dwa nou en pti gin konpare avek sa ki nou dwa Bondye. Sa ki lezot i dwa nou i parey sa san pyes larzan ki sa lesklav ti dwa sa lot. Me sa ki nou dwa Bondye akoz bann keksoz mal ki nou fer, i parey sa 60 milyon pyes larzan ki sa lesklav ti dwa lerwa.

Me Bondye i bon. Kantmenm nou fer bann keksoz mal, i pardonn nou. I pa fer nou peye par pran nou lavi enn fwa pour tou. Sa i en leson ki nou pa devret oubliye: Bondye i pardonn nou si selman nou pardonn bann dimoun ki fer nou en keksoz mal. En bon leson pour reflesir lo la, pa i vre?—

Alors si en dimoun i fer pa bon avek ou e apre i demann ou pardon, ki ou pou fer? Ou pou pardonn li?— Be si i fer sa plizyer fwa, ou pou pardonn li menm?—

Si nou ki ti pe demann pardon en lot dimoun, nou ti pou kontan sa dimoun pardonn nou, non?— Be nou osi nou bezwen fer parey. Pa zis dir nou pardonnen, me nou devret pardonn avek tou nou leker. Ler nou fer sa, nou montre ki nou vreman anvi vin disip sa Gran Ansennyan.