Mekene 14

Kepine Matre Loi e Tro Sa Nue La Menu i Itre Xan

HAPEU, ase hë hane akötrë eö hnene la ketre atr?— Hnei angeice hna qaja koi eö la itre trenge ithanata ka akötr, maine lepi eö pena?— Hapeu, tro kö eö a të la ngazo i angeic?—

Nyimutre enehila la itre atr ka thele troa të la ngazo hna kuca koi angatr. Ngo hnei Iesu hna ini së laka, loi e tro sa nuetrije la ngazo ne la itre atr ka akötrë së. (Mataio 6:12) Ame e itre xa ijin, nemene la nyine tro sa kuca, e akötrë së ju hnene la ketre atr? Aija tro sa nue la ngazo i angeic?—

Kolo hi lo mekune lai hna pi atre hnei Peteru. Haawe, ame ju hi la ketre drai, hnei angeice hna hnyinge koi Iesu, ka hape: ‘Hapeu, tro ni a asevene lao nue la ngazo i angeic?’ Ngo tha asevene hmekuje kö. Öni Iesu ka hape: ‘Tro eö a asemitre sevene’ lao nue la ngazo ne la atr ka akötrë eö ngöne la nöjei ijin.

Tru catre pi hë! Thatreine jë kö së lai troa mekune la nöjei ngazo asë hna kuca koi së hnene la ketre atr. Ngo celë hi la hnei Iesu hna upi së lai troa kuca, ene la troa thëthëhmine la etrune la ngazo hna kuca koi së hnene la itre xan. Maine angatr a qeje menu koi së, haawe, loi e tro sa nuetrije la itre ngazo i angatr.

Iesu a ajane tro la itretre drei nyidrë a trotrohnine hnyawa la aliene la troa nue la ngazo ne la itre xan. Celë hi matre, thupene la hnei nyidrëti hna sa la hnyinge i Peteru, hnei nyidrëti hna qaja koi angatr la ketre  edromë. Pi tro kö eö a hane drenge la edromë cili?—

Hetrenyi ekö la ketre joxu ka lolo. Hnei nyidrëti hna ithue maniene la itre hlue i nyidrë ka aja ixatua. Ngo ame ju hi la ketre drai, hnene la joxu cili hna upe la itre hlue i nyidrë troa të la manie i nyidrë. Ame la ketre hlue i nyidrë, tre, traqa koi 60 milio la etrun la manie nyine tro angeic a të kowe la joxu. Tha fene manie kö!

Ngazo pe, pine laka hnene la hlue cili hna huliwane asë la manie i joxu, ene  pe thatreine hë angeic troa të lai mani. Qa ngöne lai, hnene la joxu hna amekötine ka hape, tro ha salemë angeic me föi angeic, me ha nekö i angeic me itre ewekë i angeic, matre troa të la manie i nyidrë. Ame koi eö, nemene ju hë la hna mekune hnene la hlue cili?—

Hna sa watingöne ca hnene la hlu, me sipone iele joxu, ka hape: ‘Joxu, pane treqe ni ju, nge tro ni a hamëne asë la nöjei ewekë i cilie.’ Maine eö ju lai joxu, ke, tro hë eö a ujë tune kaa kowe la hlue cili?— Hnene la joxu hna utipine la hlue i nyidrë, nyidrëti pë hë a apëne ju la gufa i angeic. Öni nyidrëti jë hi kowe la hlue ka hape, tha nyipi ewekë hmaca kö tro angeice a të lo 60 milio lao denari. Hane hi lai kola elitrauje la madrine ne la hlu!

Ngo atre fe hi eö la hna kuca e thupen hnene la hlue cili? Hnei angeice hna tro me qaja kowe la ketre hlue ka trene gufa koi angeice troa canga të la manie i angeic, ca hadredre hi la etrun. Traqa ju hi angeice a öje la nyinyawa ne lai hlu, me hape: ‘Awe hmaca jë eö lo ca hadredr lao denari hnenge hna hamë eö!’ Ame koi eö, ka lolo kö la aqane ujë ne la hlue cili, nge kolo petre hi a ase apëne la gufa ka tru i angeic hnene la joxu?—

Eje hi laka, ame lo lai hlue ka troa të la ca hadredr lao denari, tre, ka puafala angeic. Tha ijiji angeice kö troa canga të lo lai mani. Celë hi matre, hnei angeice hna sa watingöneca, me sipo iel kowe la hlue cili, ka hape: ‘Pane treqe ni ju, nge tro ni a hamëne asë la nöjei ewekë i ’ö.’ Hapeu, ma ka loi jë kö e tro lai ketre hlue ekö a pane itreqe?— Maine eö ju lai hlu hna sipo iele kow, tro hë eö a ujë tune kaa?—

Ka ngazo catre la thina ne la hlu, nge isa pengöi angeice memine la joxu. Ame la aja i angeic, tre, ene la troa canga të la manie i angeic. Nge pine laka tha hna të kö la manie hnene lo lai ketre hlu, ene pe umë angeice pi e hnine la kalabus. Öhne jë hi la ewekë cili hnene la itre xa hlu, nge hace ju hi la hni angatr. Atraqatre la utipine i angatr kowe la hlue hna akalabusin. Angatre pë hë a qajaqaja jë kowe la joxu.

Ketre tha madrine fe kö la joxu. Atraqatre la elëhni nyidrë kowe lai hlue ka tha hane kö nue la ngazo ne lo lai ketre. Haawe, hnei nyidrëti hna  hë angeic, me hape: ‘We, hlue ka ngazo, hapeu, tha hnenge kö lo hna nuetrije lo gufa i ’ö? Tha ijiji eö kö troa hane nue fe la gufa ne la sine huliwa i eö?’

Maine ju ekö tro la hlue cili ka pë hni ne utipin a hane xomi ini qaathene la joxu ka loi thiina. Ngo gufa kö. Haawe, hnene la joxu hna umë angeic e kalabus, nge tro kö angeic elanyi a lö qa lai, e ase hë angeice të asë lo lai 60 milio lao denari. Ngo eje hi lai laka, thatreine jë kö tro angeice a të la trenge manie cili, haawe, ka tro pë hë angeice a meci e kalabus.

Ame la kola nyipune la edromë celë, tre, öni Iesu kowe la itretre drei nyidrë, ka hape: “Kete troa kuca tune koi nyipunie hnei Kakati e hnengödrai, e tha tro asë kö nyipunieti a isa nue tiji jinine qa kuhu hni nyipunie.”—Mataio 18:21-35.

Atre hnyawa hi eö laka, nyimutre la itre ewekë nyine tro sa të koi Akötresie. Nyipi ewekë tro sa trotrohnine hnyawa laka, Akötresie la ka hamë mel. Haawe, maine tro sa goeëne la etrune la itre ewekë nyine tro sa të koi Akötresie, tre, easa atrehmekune hnyawa, laka, ka pëkö pengöne la itre  ewekë hna troa të koi së hnene la itre atr. Kola troa ceitu memine lo ca hadredr lao denari hna troa të hnene lo hlu kowe lo ketre sine huliwa i angeic. Ngo ame easë xajawa i Akötresie, tre, pine laka nyimutre la itre ewekë ka ngazo hne së hna kuca, haawe, easa tune lo lai hlue ka troa të la 60 milio lao denari kowe la joxu.

Ngo ka lolo catre la thiina i Akötresie. Ngacama nyimutre la itre ngazo hne së hna kuca, ngo Nyidrëti pala hi a nue itre ej. Tha Nyidrëti kö a thapa la mele së, hnene laka tha hne së kö hna nyi thupei Nyidrë. Ngo ame la ini ka sisitria nyine tro sa xome hnyawa, tre, ene laka tro Akötresieti a nue la ngazo së e hne së hna nue la ngazo ne la itre xan. Hapeu, tha ketre ini ka sisitria kö lai?—

Haawe, maine kola akötrë eö hnene la ketre atr, nge thupene lai, angeice hmaca a traqa troa wai eö me qeje menu, tre, nemene ju hë la hnei eö hna troa kuca? Tro kö eö a nuetrije la ngazo i angeic?— Nge tune kaa e akötrë eö hmaca jë hnei angeic? Hapeu, tro pala hi eö a nue la ngazo i angeic?—

Maine eö ju la ka qeje menu, hapeu ajane kö eö troa nue la ngazo i eö?— Haawe, kuca tune ju fe koi angeic. Tha tro hmekuje kö sa qaja ka hape, easa nue la ngazo i angeic, ngo loi e troa nue hnyawa cememine la hni ka pexej. Maine tro sa ujë tune lai, haawe, easë hi lai a amamane laka, easa ajane hnyawa troa xötrethenge la tulu ne la Atre Hamë Ini Ka Sisitria.

Maine easa ajane troa trotrohnine hnyawa la enyipiewekëne troa nuetrije la ngazo ne la itre xan, e jë la Ite Edomë 19:11; Mataio 6:14, 15; me Luka 17:3, 4.

[Iatr ne la götran 77]

Nemene la hnei Peteru hna pi atre göne la troa nue la ngazo ne la itre xan?

[Iatr ne la götran 78]

Nemene la hna kuca hnene la joxu ngöne la kola sipo iele nyidrë hnene la hlue troa hamë ijin koi angeic troa të la mani?

[Iatr ne la götran 78]

Tune kaa la aqane ujë ne la hlue kowe la sine huliwa i angeic ka tha të kö la manie i angeic?

[Iatr ne la götran 80]

Nemene la hna kuca hnene la joxu kowe la hlue ka pë hni ne utipin?

[Iatr ne la götran 81]

Tune kaa la aqane tro eö a ujë, e traqa pi ketre troa qeje menu koi eö?