Ibuot 14

Ntak Emi Nnyịn kpefende Inọ

NTE akanam owo ekededi edue fi?— Nte enye ama anam n̄kpọ oro abiakde fi m̀mê etịn̄ idiọk ikọ ye afo?— Nte afo ekpenyene ndinam enye ukem n̄kpọ oro enye akanamde fi?—

Edieke owo anamde n̄kpọ oro ayatde mmọ esịt, ediwak owo ẹsisio usiene. Edi Jesus ama ekpep ete ke nnyịn ikpenyene ndifen nnọ mbon oro ẹduede nnyịn. (Matthew 6:12) Nso edieke owo awakde ndinam n̄kpọ oro nnyịn mîmaha? Utịm ikafan̄ ke nnyịn ikpefen inọ enye?—

Oro edi se Peter okoyomde ndifiọk. Ntre usen kiet enye ama obụp Jesus ete: ‘Nte nnyene ndifen nnọ enye tutu esịm utịm ikatiaba?’ Utịm ikatiaba ikemke. Jesus ọkọdọhọ ete: ‘Afo enyene ndifen nnọ enye utịm ike ata ye efụteba’ edieke owo oro eduede fi awak ntre.

Ini oro awak etieti! Nnyịn idikam itịghi mme ndudue m̀mê ndiọi n̄kpọ owo awak ntre, nte iyeti? Ndien emi edi se Jesus eketịn̄de ọnọ nnyịn: Nnyịn ikpodomoke nditi ibat ndudue oro mbon en̄wen ẹduede nnyịn. Edieke mmọ ẹdọhọde ẹfen ẹnọ mmimọ, nnyịn ikpenyene ndifen nnọ mmọ.

Jesus okoyom ndiwụt mme mbet esie nte edide ata akpan n̄kpọ ndifen nnọ. Ntre ke enye ama ọkọbọrọ mbụme Peter,  enye ama obụk mbụk kiet ọnọ mme mbet esie. Nte afo akpama ndikop mbụk oro?—

Ini kiet ko eti edidem kiet ama odu. Enye ama ọfọn ido etieti. Enye ama akam ọbuọt mme ifịn esie okụk ke ini mmọ ẹkeyomde un̄wam. Edi usen ama edikem emi edidem oro okoyomde ifịn esie emi ẹkekamade enye isọn ẹdikpe. Ọfọn, ẹma ẹda ofụn kiet ẹdi emi akakamade edidem oro okụk awakde esịm okụk miliọn 60. Uwak okụk edi oro!

 Edi ofụn oro ama abiat kpukpru okụk edidem oro ndien ikekemeke ndifiak n̄kpe edidem. Ntre edidem ama ọnọ uyo ete ẹnyam enye. Edidem n̄ko ama ọdọhọ ete ẹnyam n̄wan ofụn oro ye nditọ esie ye kpukpru se enye enyenede. Ekem ẹkenyene ndida okụk oro ẹkenyamde mmọ n̄kpe edidem. Afo ekere ke emi eketie ofụn oro didie ke idem?—

Enye ama ọtọn̄ọ edọn̄ ke iso edidem onyụn̄ ekpe ubọk ete: ‘Mbọk, nọ mi ini, ndien nyekpe kpukpru isọn oro n̄kamade fi.’ Edieke afo ekpedide edidem oro, nso ke afo akpakanam ofụn oro?— Edidem ama atua ofụn esie mbọm. Ntre edidem ama efen ọnọ enye. Enye ama etịn̄ ọnọ ofụn oro ete ke enye inyeneke ndikpe okụk ndomokiet ke otu okụk miliọn 60 oro. Emi ekenem ofụn oro esịt didie ntem!

Edi nso ke ofụn oro akanam esisịt ini ke oro ebede? Enye ama adaha ọwọrọ onyụn̄ okụt ofụn efen, emi akakamade enye okụk ikie kpọt. Enye ama omụm ofụn emi onyụn̄ ọtọn̄ọ ndifịk enye itọn̄, ọdọhọde ete: ‘Kpe okụk ikie oro akamade mi!’ Nte afo emekeme ndikere nte owo akpanamde utọ n̄kpọ oro, akpan akpan ke edidem ama ekefen ọnọ enye?—

Nte ededi, ofụn oro akakamade okụk ikie kpọt ekedi ubuene. Enye ikekemeke ndikpe okụk oro ke ebe oro. Ntre enye ama ọduọ ke ukot ekemmọ ofụn oro onyụn̄ ekpe ubọk ete: ‘Mbọk, nọ mi ini, ndien nyekpe se n̄kamade fi.’ Nte owo oro ama ọnọ ekemmọ ofụn ini?— Nso ke afo akpakanam?—

Owo emi ikọfọnke ido nte edidem ọkọfọnde. Enye okoyom okụk esie ke ebe oro. Ndien sia ekemmọ ofụn mîkekemeke ndikpe okụk oro, enye ama anam ẹsịn enye ke ufọk-n̄kpọkọbi. Ifịn eken ẹma ẹkụt kpukpru se iketịbede, ndien mmọ ikenemke esịt. Mbọm ofụn oro okodude ke ufọk-n̄kpọkọbi ama anam mmọ. Ntre mmọ ẹma ẹka ẹketịn̄ ẹnọ edidem.

 Edidem ikenemke esịt n̄ko iban̄a se iketịbede. Enye ama ayat esịt etieti ye ofụn oro mîkefenke inọ owo do. Ntre edidem ama okot enye onyụn̄ ọdọhọ ete: ‘Afo idiọk ofụn, nte ami n̄kefenke nnọ fi ke se afo akakamade mi? Ntre nte afo ukpefenke unọ ekemmọ ofụn?’

Ofụn oro mîkefenke inọ owo do ekpekenyene ndikpep n̄kpọ nto eti edidem oro. Edi enye ikekpepke. Ntre idahaemi edidem ama anam ẹsịn ofụn oro ke ufọk-n̄kpọkọbi tutu enye ekeme ndikpe okụk miliọn 60 oro. Edi, enye idikemeke ndisịne ke ufọk-n̄kpọkọbi nnyene okụk ndikpe edidem tutu amama. Ntre enye eyesịne do tutu akpa.

Ke ini Jesus okobụkde mbụk emi ama, enye ama ọdọhọ mme mbet esie ete: “Kpasụk ntre ke Ete Mi ke heaven edinam ye mbufo, ke mbufo kiet kiet mîfenke eyen-ete mbufo ke ofụri esịt.”—Matthew 18:21-35.

Afo omokụt nte ke kpukpru nnyịn imakama Abasi ata akamba  isọn. Ke nditịm ntịn̄, Abasi ọnọ nnyịn uwem! Ntre ke imende idomo ye se nnyịn ikamade Abasi, mme owo efen ẹkama nnyịn ata ekpri n̄kpọ. Se mmọ ẹkamade nnyịn etie nte okụk ikie oro ofụn kiet akakamade ofụn enye eken. Edi se nnyịn ikamade Abasi ke ntak mme idiọkn̄kpọ oro nnyịn inamde etie nte okụk miliọn 60 emi ofụn oro akakamade edidem.

Abasi ọfọn ido etieti. Okposụkedi nnyịn inamde mme n̄kpọ oro mîfọnke, enye esifen ọnọ nnyịn. Enye isioho nnyịn usiene ke ndisobo nnyịn mfep ke nsinsi. Edi emi edi ukpepn̄kpọ oro oyomde nnyịn iti: Abasi edifen ọnọ nnyịn n̄kukụre edieke nnyịn ifende inọ mbon oro ẹduede nnyịn. Nte emi idịghe n̄kpọ oro akpanade ikere iban̄a?—

Ntre edieke owo anamde n̄kpọ oro afo mûmaha edi ekem ọdọhọ fi okûyat esịt, nso ke afo edinam? Nte afo eyefen ọnọ enye?— Nso edieke enye anamde oro ediwak ini? Nte afo oyosụk efen ọnọ enye?—

Edieke ekpedide nnyịn iben̄e edifen nnọ, nnyịn ikpama owo enye eken efen ọnọ nnyịn, nte nnyịn ikpamaha?— Ntre nnyịn ikpenyene ndinam ukem oro nnọ enye. Nnyịn ikpetịn̄ke n̄kukụre ke inua nte ke imefen inọ enye, edi nnyịn ikpenyene ndinen̄ede mfen nnọ enye ke esịt nnyịn. Ke ini nnyịn inamde oro, nnyịn iwụt ite ke nnyịn imenen̄ede iyom ndidi mme anditiene Akwa Andikpep.

Man ifiọk nte edifen nnọ edide akpan n̄kpọ, yak ikot n̄ko Mme N̄ke 19:11; Matthew 6:14, 15; ye Luke 17:3, 4.

[Ndise ke page 77]

Nso ke Peter okoyom ndifiọk mban̄a edifen nnọ?

[Ndise ke page 78]

Nso iketịbe ke ini ofụn oro ekekpede edidem ubọk ete ọnọ imọ ini ndikpe isọn?

[Mme ndise ke page 78]

Didie ke ofụn oro akanam n̄kpọ ye ekemmọ ofụn emi mîkekemeke ndikpe enye isọn?

[Ndise ke page 80]

Nso ke edidem akanam ofụn oro mîkefenke inọ owo do?

[Ndise ke page 81]

Nso ke afo edinam edieke owo ọdọhọde fi efen ọnọ imọ?