SA BAU dua beka e cakava vei iko na ka e sega ni dodonu?​— E vakaleqai iko beka se e cavuta na vosa e mositi iko?— E dodonu li mo sauma na veika e cakava vei iko oya?—

E levu na tamata era na sauma na ca e caka vei ira. Ia e tukuna o Jisu meda vosoti ira era cala vei keda. (Maciu 6:12) Vakacava ke cakava tiko ga e dua na ivalavala e sega ni dodonu? Meda na vosoti koya vakavica?—

E via kila sara ga o Pita. E tarogi Jisu ena dua na siga: ‘Meu vosoti koya sara vaka vitu?’ E sega ni rauta me vaka vitu ga. E kaya o Jisu: ‘Mo vosoti koya vaka vitusagavulukavitu’ ke vaka oya na levu ni nona valavala ca vei iko.

Sa bau levu sara ga na iwiliwili oya! Ena sega mada ga ni rawa meda nanuma kece tiko e vitusagavulukavitu na ka ca e cakava vei keda e dua, se vakaevei? Oya sara ga na ka e tukuna vei keda o Jisu: Meda kua ni nanuma tiko na levu ni gauna era valavala ca kina vei keda o ira na tani. Ke ra kerea mera vosoti, vosoti ira.

E via vakaraitaka o Jisu vei ira nona tisaipeli na bibi ni veivosoti. Ni sauma oti na taro nei Pita, sa qai talanoa vei ira. O via rogoca na italanoa oya?—

Tiko kina e dua na tui vinaka. E  turaga yalovinaka. E dau soli dinau vei ira na nona dauveiqaravi nira vinakata na veivuke. Dua na siga sa vinakata na tui mera sauma lesu na nona dauveiqaravi na ilavo era dinautaka. E kau vua na tui e dua nona dauveiqaravi e dinautaka tu vua na tui e 60 na milioni na tiki ni ilavo. Oya e dua na ilavo levu!

Sa vakayagataka na nona ilavo na tui na dauveiqaravi oya, sa sega ni rawa ni sauma lesu. Mani vakarota na tui me sa volitaki  o koya. E vakarota tale ga na tui me volitaki na watina, o ira na luvena, kei na veika kece e taukena. Me qai soli vua na tui na ilavo e rawa mai na volivolitaki oya. Na cava o nanuma e vakasamataka na dauveiqaravi oya?—

E qai tekiduru ena mata ni tui na dauveiqaravi me vakamamasu: ‘Yalovinaka solia mada vei au na gauna, au na sauma kece vei kemuni na ilavo au dinautaka.’ Ke o iko na tui oya, na cava o na cakava vua na dauveiqaravi?— E lomana na dauveiqaravi na tui, mani vosoti koya. E tukuna vua me sa kua ni vakasuka yani na ilavo, oya na 60 na milioni na tiki ni ilavo. E sega ni tukuni rawa na nona marau na dauveiqaravi!

Ia na cava e qai cakava na dauveiqaravi oya? Ni lako ga e tuba e raica sara e dua tale na dauveiqaravi e dinautaka tu vua e duanadrau ga na tiki ni ilavo. E kidomoki koya, qai kaya vua: ‘Sauma mai na duanadrau na tiki ni ilavo o dinautaka vei au!’ O rawa ni vakasamataka me dua e cakava na ka oya, vakauasivi ni se qai vosoti koya ga na tui ena nona dinau levu?—

E tamata dravudravua na dauveiqaravi e dinautaka na duanadrau na tiki ni ilavo. A dredre me sauma sara ga ena gauna oya na nona dinau. Mani cuva sobu ena yava i koya na nona itokani dauveiqaravi qai vakamamasu: ‘Yalovinaka solia mada vei au na gauna, au na sauma kece vei kemuni na ilavo au dinautaka.’ E dodonu beka me solia na tamata oya na gauna vua na nona itokani dauveiqaravi?— Na cava o na cakava?—

Na tamata oqo e sega ni yalovinaka me vakataki koya na tui. E vinakata sara ga ena gauna oya na nona ilavo. Ni sega ni sauma rawa na nona dinau o nona itokani dauveiqaravi, e biuti koya sara i valeniveivesu. Era raica na vo ni dauveiqaravi na ka e yaco oya, ra qai sega ni taleitaka. Era lomana dina na dauveiqaravi sa tiko e valeniveivesu. Ra mani tukuna vua na tui na ka e yaco.

 E sega tale ga ni taleitaka na tui. E katakatataki koya sara ga na dauveiqaravi e sega ni veivosoti. Mani kacivi koya mai qai tukuna vua: ‘Tamata ivakarau ca, au sega li ni vosoti iko au qai bokoca na nomu dinau? E sega li ni dodonu mo vosota tale ga na nomu itokani dauveiqaravi?’

A dodonu me vuli vua na tui vinaka na dauveiqaravi sega ni dauveivosoti oya. Ia e sega. Mani biuti koya na dauveiqaravi oya i valeniveivesu na tui me yacova ni sa sauma kece na 60 na milioni na tiki ni ilavo. Ia ena sega ga ni rawa ilavo e valeniveivesu me sauma lesu kina na nona ilavo na tui. Sa na vesu tu ga me yacova ni mate.

Ni talanoa oti o Jisu, e qai kaya vei iratou na nona imuri: “E na cakava tale ga vaka kina vei kemudou ko Tamaqu vakalomalagi, kevaka dou sega ni dau vosoti ira na wekamudou mai na vu ni yalomudou.”​—Maciu 18:21-35, VV.

E levu sara na ka eda dinautaka tu vua na Kalou. Na noda bula  mada ga e solia na Kalou! Ni laurai na ka eda dinautaka tu vua na Kalou, e lailai sara na ka era dinautaka vei keda na tamata. Na ka era dinautaka vei keda e vaka ga na duanadrau na tiki ni ilavo a dinautaka e dua na dauveiqaravi oya vua na nona itokani dauveiqaravi. Ia na ka eda dinautaka tu vua na Kalou ena vuku ni ivalavala ca eda cakava e vaka sara ga na 60 na milioni na tiki ni ilavo e dinautaka na dauveiqaravi oya vua na tui.

Sa rui yalovinaka na Kalou. Dina ga nida valavala ca, ia e vosoti keda o koya. E sega ni vinakata meda sauma na noda valavala ca ena nona tinia vakadua na noda bula. Ia meda nanuma vinaka na ivakavuvuli oqo: Ena vosoti keda ga na Kalou kevaka eda vosoti ira era caka ca vei keda. Oya e dua na ka meda vakasamataka vakabibi, se vakaevei?—

Ke dua e cakava na ka e mositi iko qai kere veivosoti, na cava o na cakava? O na vosoti koya?— Vakacava ke cakava vaka vica? O na vosoti koya tiko ga?​—

Ke da kere veivosoti eda na vinakata meda vosoti, se vakacava?— E dodonu meda cakava tale ga vaka kina vei ira na tani. Meda kua ni tukuna ga nida vosoti ira ia meda vosoti ira sara ga mai lomada. Nida cakava oya, eda vakaraitaka nida vinakata dina meda nona imuri na Qasenivuli Levu.