ANI mɔ ko efee bo efɔŋ pɛŋ?— Ani epila bo aloo ejɛ́ bo?— Ani esa akɛ bo hu ofee lɛ efɔŋ tamɔ bɔ ni efee bo lɛ nɔŋŋ pɛpɛɛpɛ?—

Mɛi babaoo yɛ ni kɛ́ mɔ ko fee amɛ efɔŋ lɛ, amɛbaafee nakai mɔ lɛ hu efɔŋ koni amɛkɛto lɛ najiaŋ. Shi Yesu tsɔɔ akɛ, esa akɛ wɔkɛ efɔŋ ake mɛi ni feɔ wɔ efɔŋ lɛ. (Mateo 6:12) Shi kɛji akɛ mɔ ko ejieee mlihilɛ kpo etsɔɔɔ wɔ shii abɔ hu? Shii enyiɛ esa akɛ wɔkɛke lɛ?—

Enɛ ji sane ni Petro tao akɛ eeele. No hewɔ lɛ, gbi ko lɛ, ebi Yesu akɛ: ‘Ani esa akɛ mikɛke lɛ shii kpawo sɔŋŋ lo?’ Shi, shii kpawo po faaa. Yesu kɛɛ akɛ: ‘Esa akɛ okɛke mɔ lɛ shii nyɔŋmai kpawo kɛ kpawo’ kɛji akɛ efee esha eshi bo shii abɔ ni tamɔ nakai.

Efá waa diɛŋtsɛ! Wɔnyɛŋ wɔkai tɔmɔi babaoo loo nibii gbohii babaoo ni mɔ ko efee wɔ lɛ, aloo jeee nakai? Ni enɛ ji nɔ ni Yesu kɛɔ wɔ lɛ, akɛ: Esaaa akɛ wɔbɔɔ mɔdɛŋ ni wɔkaiɔ shii abɔ ni ekolɛ mɛi krokomɛi baafee wɔ efɔŋ lɛ. Kɛji akɛ amɛbi ni wɔkɛke amɛ lɛ, esa akɛ wɔkɛke amɛ.

Yesu miisumɔ ni etsɔɔ ekaselɔi lɛ bɔ ni ehe hiaa waa ni amɛkɛ tɔmɔ ake. No  hewɔ lɛ, beni eha Petro sanebimɔ lɛ hetoo lɛ, egba ekaselɔi lɛ sane ko. Ani obaasumɔ ni obo toi?—

Maŋtsɛ kpakpa ko hi shi be ko. Emli hi waa diɛŋtsɛ. Ekɛ shika po faa etsuji kɛji akɛ ehe miihia ni aye abua amɛ. Shi gbi ni maŋtsɛ lɛ sumɔɔ ni etsuji lɛ awo lɛ nyɔmɔ ni amɛhiɛ lɛ lɛ bashɛ. Ojogbaŋŋ, akɛ tsuji lɛ ekome ni hiɛ maŋtsɛ lɛ nyɔmɔ shika kukuji akpekpei 60 ba maŋtsɛ lɛ hiɛ. Eji shika ni fa babaoo diɛŋtsɛ!

 Shi tsulɔ lɛ efite maŋtsɛ lɛ shika lɛ fɛɛ, ni enyɛɛɛ ewo maŋtsɛ lɛ nyɔmɔ. No hewɔ lɛ, maŋtsɛ lɛ kɛ famɔ ha akɛ ahɔ̃ɔ lɛ. Maŋtsɛ lɛ kɛɛ hu akɛ ahɔ̃ɔ tsulɔ lɛ ŋa kɛ ebii kɛ nɔ fɛɛ nɔ ni eyɔɔ. Kɛkɛ lɛ, akɛ shika ni abaaná kɛjɛ amɛhɔ̃ɔmɔ mli lɛ baawo maŋtsɛ lɛ nyɔmɔ. Te osusuɔ akɛ tsulɔ lɛ nu enɛ he eha tɛŋŋ?—

Ekula shi yɛ maŋtsɛ lɛ hiɛ ni ekpa lɛ fai akɛ: ‘Ofainɛ, ha mi be ni fa ni mawo nyɔmɔ ni mihiɛ bo lɛ fɛɛ.’ Eji bo ji maŋtsɛ lɛ kulɛ mɛni obaafee tsulɔ lɛ?— Maŋtsɛ lɛ tsulɔ lɛ nii fee lɛ mɔbɔ. No hewɔ lɛ, maŋtsɛ lɛ kɛke lɛ. Ekɛɛ tsulɔ lɛ akɛ ehe ehiaaa ni eku sɛɛ ewo nyɔmɔ ni ehiɛ lɛ lɛ, ekawo shika kukuji akpekpei 60 lɛ ekome kwraa po he nyɔmɔ. Kwɛ bɔ ni enɛ baaha tsulɔ lɛ aná miishɛɛ waa aha!

Shi, mɛni nakai tsulɔ lɛ fee yɛ no sɛɛ? Eje kpo ni eyana tsulɔ kroko, ni hiɛ lɛ tsulɔ lɛ nyɔmɔ shika kukuji oha pɛ. Emɔ enaanyo tsulɔ lɛ sɛ̃, ni ebɔi lɛ miamɔ, akɛ: ‘Wo mi shika kukuji oha nyɔmɔ ni ohiɛ mi lɛ!’ Ani obaanyɛ ofee mɔ ko ni miifee nɔ ko ni tamɔ nakai, titri lɛ beni maŋtsɛ lɛ kɛ babaoo diɛŋtsɛ eke lɛ lɛ he mfoniri yɛ ojwɛŋmɔ mli okwɛ?—

Hɛɛ, tsulɔ ni hiɛ nyɔmɔ ni ji shika kukuji oha pɛ lɛ ji ohiafo. Enyɛɛɛ ewo shika lɛ amrɔ nɔŋŋ. No hewɔ lɛ, ekula shi yɛ enaanyo tsulɔ lɛ hiɛ ni ekpa lɛ fai akɛ: ‘Ofainɛ, ha mi be ni fa, ni mawo bo nyɔmɔ ni mihiɛ bo lɛ fɛɛ.’ Ani esa akɛ nuu lɛ aha enaanyo tsulɔ lɛ be ni fa?— Kulɛ mɛni obaafee?—

Nuu nɛɛ bɛ mlihilɛ tamɔ bɔ ni maŋtsɛ lɛ ji lɛ. Eetao eshika lɛ amrɔ nɔŋŋ. Ni akɛni enaanyo tsulɔ lɛ nyɛɛɛ awo lɛ nyɔmɔ ni ehiɛ lɛ lɛ hewɔ lɛ, eha ayawo lɛ tsuŋ. Tsuji krokomɛi lɛ na nɔ ni tee nɔ lɛ fɛɛ, ni eŋɔɔɔ amɛnaa kwraa. Tsulɔ lɛ ni ayawo lɛ tsuŋ lɛ nii fee amɛ mɔbɔ. No hewɔ lɛ, amɛtee ni amɛyabɔ maŋtsɛ lɛ amaniɛ.

 Maŋtsɛ lɛ hu sumɔɔɔ nɔ ni ba lɛ. Emli fu tsulɔ ni kɛ sane ekeee lɛ waa. No hewɔ lɛ, etsɛ lɛ ni ekɛɛ lɛ akɛ: ‘Bo tsulɔ fɔŋ, ani mikɛ nyɔmɔ ni ohiɛ mi lɛ ekeee bo? No hewɔ lɛ, ani esaaa akɛ onaa onaanyo tsulɔ lɛ mɔbɔ?’

Kulɛ esa akɛ tsulɔ ni kɛ sane ekeee lɛ akase nii kɛjɛ maŋtsɛ kpakpa lɛ ŋɔɔ. Shi ekaseee nɔ ko. No hewɔ lɛ, agbɛnɛ maŋtsɛ lɛ ha awo nakai tsulɔ lɛ tsuŋ kɛyashi be mli ni eeewo shika kukuji akpekpei 60 nyɔmɔ ni ehiɛ lɛ lɛ. Ni akɛni awo lɛ tsuŋ hewɔ lɛ, enyɛŋ ená shika ni ekɛaawo maŋtsɛ lɛ nyɔmɔ lɛ kɔkɔɔkɔ. No hewɔ lɛ, ebaahi jɛmɛ kɛyashi be mli ni eeegbo.

Beni Yesu gbe sane ni egbaa lɛ naa lɛ, ekɛɛ esɛɛnyiɛlɔi lɛ akɛ: “Nakai nɔŋŋ mitsɛ ni yɔɔ ŋwɛi lɛ hu aaaŋɔfee nyɛ, kɛji nyɛteŋ mɔ fɛɛ mɔ eŋɔɔɔ enyɛmi nɔtɔmɔ ekeee lɛ kɛjɛɛɛ etsuiŋ lɛ.”—Mateo 18:21-35.

Esa akɛ onu shishi akɛ, wɔ fɛɛ wɔhiɛ Nyɔŋmɔ nyɔmɔ babaoo. Yɛ anɔkwale mli lɛ, wala diɛŋtsɛ ni wɔyɔɔ lɛ baa kɛjɛɔ Nyɔŋmɔ ŋɔɔ!  No hewɔ lɛ, kɛ́ akɛto nyɔmɔ ni wɔhiɛ Nyɔŋmɔ lɛ he lɛ, nyɔmɔ ni mɛi krokomɛi hiɛ wɔ lɛ ji bibioo. Nyɔmɔ ni amɛhiɛ wɔ lɛ tamɔ shika kukuji oha ni tsulɔ kome lɛ hiɛ mɔ kroko lɛ. Shi nyɔmɔ ni wɔhiɛ Nyɔŋmɔ yɛ nibii fɔji ni wɔfeɔ hewɔ lɛ tamɔ shika kukuji akpekpei 60 ni tsulɔ lɛ hiɛ maŋtsɛ lɛ.

Nyɔŋmɔ mli hi waa. Eyɛ mli akɛ wɔfee nibii fɔji moŋ, shi ekɛkeɔ wɔ. Ehaaa wɔwo nyɔmɔ lɛ kɛtsɔ wɔwala ni eeefo sɛɛ kɛya naanɔ lɛ nɔ. Shi nikasemɔ ni ehe hiaa akɛ wɔkai ji akɛ: Nyɔŋmɔ kɛ wɔtɔmɔi keɔ wɔ kɛji akɛ wɔkɛ mɛi ni tɔ̃ɔ wɔnɔ lɛ anɔ̃ keɔ amɛ. Eji nɔ ko ni esa akɛ wɔsusu he jogbaŋŋ, aloo jeee nakai?—

No hewɔ lɛ, kɛji akɛ mɔ ko fee bo efɔŋ ko, ni agbɛnɛ ekɛɛ eekpa bo fai lɛ, mɛni obaafee? Ani okɛbaake lɛ?— Ni kɛji akɛ efee bo efɔŋ shii abɔ hu? Ani obaaya nɔ ni okɛke lɛ lolo?—

Kɛji akɛ wɔ ji mɔ ni biɔ ni akɛ efɔŋ ko ni wɔfee lɛ ake wɔ lɛ, wɔbaasumɔ ni mɔ kroko lɛ kɛke wɔ, aloo jeee nakai?— No hewɔ lɛ, esa akɛ wɔfee nakai nɔŋŋ wɔha lɛ. Jeee kɛɛmɔ pɛ kɛkɛ esa akɛ wɔkɛɛ akɛ wɔkɛke lɛ, shi esa akɛ wɔkɛke lɛ kɛjɛ wɔtsui mli diɛŋtsɛ. Kɛ́ wɔfee nakai lɛ, wɔtsɔɔ akɛ wɔmiisumɔ diɛŋtsɛ ni wɔtsɔ Tsɔɔlɔ Kpele lɛ sɛɛnyiɛlɔi.