¿OĨMAPA ojapóva nderehe mbaʼe vai?... ¿Oĩmapa nenupãva térã iñeʼẽ arhélva ndéve?... Oimérõ upéicha, ¿iporãtapa rejapóramo avei hese peteĩ mbaʼe vai?...

Heta oĩ oñevengáva hapicháre. Péro Jesús omboʼe vaʼekue ñaporoperdona vaʼerãha (Mateo 6:12). ¿Ha mbaʼe rejapóta peteĩ nde rapicha ndetrata vaíramo heta vése? ¿Mboy vésepa reperdona vaʼerã chupe?...

Apóstol Pedro oikuaase vaʼekue upéva. Upévare oporandu Jesúspe: ‘¿Siete vése piko ovaléma?’. Péro ndahaʼéi upéicha, upévare Jesús heʼi chupe: “Ndaʼéi ndéve siete vése, setenta y siete vése voi katu”.

Jesús heʼi setenta y siete vése voi. Epensamína, peteĩ ñande rapicha ojapóramo heta vése ñanderehe mbaʼe vai, ¿ñanemanduʼapátapa? Nahániri. Ha upéva Jesús la omboʼese vaʼekue: ndovaleiha ñakonta ni ñanemanduʼa umi mbaʼe vai ojejapóvare ñanderehe. Oĩramo oipotáva ñaperdona chupe, ñaperdona vaʼerã.

Jesús oipota idisipulokuéra oikuaa iñimportanteha operdona hapichakuérape. Upévare, heʼi rire Pédrope  mboy vésepa operdona vaʼerã omombeʼu peteĩ istória. ¿Rehendusépa?...

Oĩ vaʼekue peteĩ rréi ivuenoitereíva, ha oiporukáva jepi pláta ijesklavokuérape isogue jave hikuái. Péro peteĩ díape, oipota ojepaga chupe ha ohenoika chupekuéra. Peteĩva odeve chupe sesenta millón de monéda, ha upéva hetaiterei hína.

Péro pe esklávo oiporupaitéma la ipláta, ha  ndorekovéima opaga hag̃ua ideveha. Upévare, pe rréi heʼi oñevende hag̃ua pe esklávope, hembirekópe, itaʼyrakuérape ha umi mbaʼe orekóva guive. Ha pe pláta oñembyatýva ojeporúta ojepaga hag̃ua pe rréipe. ¿Mbaʼéichapa nde ere oñeñandúne hague pe esklávo?...

Haʼe oñesũ pe rréi renondépe ha ojerure asy chupe: “Cheraʼarõmiéna sapyʼami, ha apagapaitéta ndéve la adevéva”. Ndérire pe rréi, ¿mbaʼépa rejapo vaʼerãmoʼã?... Pe rréi ombyasyeterei pe esklávope ha operdona chupe. Upévare heʼi natekotevẽiha opaga ni michĩmi pe sesenta millón odevévagui. ¡Oiméne ovyʼaite raʼe pe esklávo!

Péro, ¿mbaʼépa ojapo pe esklávo upéi? Osẽ rire pe rréi oĩhágui, otopa ótro esklávore odevéva chupe cien monéda. Péva ningo saʼieterei, péro haʼe ojagarra hapichápe ijajúragui ojuvy hag̃uáicha voi chupe, ha heʼi: ‘¡Epagáke chéve la redevéva koʼag̃aite!’. Pe rréi ningo operdona chupe, haʼe katu noperdonaséi hapichápe. Ni ndajaroviaséi péicha ojapo hague, ¿ajépa?...

Pe esklávo odevéva cien monéda imboriahu, ha upévare ndaikatúi opaga upepete. Upémarõ oñesũ hapicha renondépe ha ojerure asy chupe: “Cheraʼarõmiéna ha apagapaitéta ndéve”. ¿Oĩ porãtapa omeʼẽvéramo chupe tiémpo?... ¿Mbaʼépa nde rejapo vaʼerãmoʼã?...

Ko kuimbaʼe ndojoguaiete pe rréipe. Haʼe oipota ojepaga chupe upepete, ha naimbaʼeporãigui hapichándi oguerahakántema kárselpe. Umi ótro esklávo ohecha la oikóva ha ndogustaiete chupekuéra. Ombyasy hikuái pe esklávope oho haguére kárselpe, ha upémarõ oho omombeʼu pe rréipe la oikóva.

 Pe rréi ipochyeterei pe esklávondi noperdonái haguére hapichápe. Upévare ohenoika ha heʼi chupe: ‘Nde esklávo aña, che aheja reínte kuri ndéve nde deveha. ¿Ndaikatúi piko nde avei reperdona raʼe nde rapichápe?’.

Pe esklávo aña ojapo vaʼerã kuri pe rréi ojapo haguéicha, péro ndojapói. Upévare pe rréi oguerahaka chupe kárselpe, ha heʼi opytataha upépe opagapa peve ideveha. Jaikuaaháicha, kárselpe ndaikatumoʼãi ogana pláta opaga hag̃ua pe odevéva, upévare oĩta upépe omano meve.

Omombeʼupa rire ko istória, Jesús heʼi idisipulokuérape: “Péicha avei ojapóta penderehe che Ru yvagapegua, napeperdonáiramo pende pyʼaite guive pene ermánope” (Mateo 18:21-35).

Ñandejára omeʼẽ ñandéve heta mbaʼe porã, upévare heta jadeve chupe. Ñapensávo umívare, jahechakuaa saʼietereiha umi  mbaʼe odevéva ñandéve ñande rapicha, ojogua umi cien monéda odeve vaʼekue pe esklávo. Ñande katu manterei jajavy ha Jehová ñaneperdona, upévare heta jadeve chupe, haʼete pe sesenta millón odeve vaʼekue pe esklávo aña.

Ñandejára ningo ivuenoiterei. Haʼe ñaneperdona jajapóramo jepe heta mbaʼe noĩporãiva. Ndahaʼéi ku ojapótava ñanderehe mbaʼe vai ñandekovra hag̃ua. Péro aníke nderesarái ko mbaʼégui: Ñandejára ñaneperdona hag̃ua, ñande raẽ ñaperdona vaʼerã ñande rapichápe. ¿Ajépa iñimportánte ñanemanduʼa meme ko mbaʼére?...

Upéicharõ, oĩ jave ojapóva nderehe mbaʼe vai ha upéi oipota reperdona chupe, ¿mbaʼépa rejapóta? ¿Reperdonátapa chupe?... Ha ojapóramo heta vése nderehe mbaʼe vai, ¿reperdona jeýtapa chupe?...

Nde rejapóramo mbaʼe vai ótrore, katuete reipotáne neperdona avei, ¿ajépa?... Upévare nde avei reperdona vaʼerã nde rapichápe. Ha ndahaʼéi erénte vaʼerã, síno reperdona vaʼerã nde pyʼaite guive. Péicha rejapóramo, rehechaukáta añetehápe rejoguaseha Mboʼehára Guasúpe.