MAY nakahimo na bala sa imo sing malain?— Nasaklaw ka bala sa iya ukon may nasiling bala sia sa imo nga masakit?— Amo man bala ang dapat mo himuon sa iya?—

Madamo nga tawo ang nagabalos kon masaklaw sila. Apang si Jesus nagtudlo nga dapat naton patawaron ang mga nakasala sa aton. (Mateo 6:12) Ano kon madamo nga beses na nga nasaklaw kita sa isa ka tawo? Pila ka beses naton sia patawaron?—

Luyag ni Pedro nga mahibaluan ini. Gani isa ka adlaw ginpamangkot niya si Jesus: ‘Patawaron ko bala sia sing makapito ka beses?’ Apang, indi pa tuman ang pito ka beses. Si Jesus nagsiling: ‘Dapat ka magpatawad sing kapituan kag pito ka beses’ kon makasala sa imo ang isa ka tawo sing subong sina kadamo.

Madamo ini nga beses! Indi gani naton madumduman ang subong sini kadamo nga sala ukon masakit nga hambal nga nahimo sa aton sang isa ka tawo, indi bala? Kag amo sini ang luyag ni Jesus nga matun-an naton: Indi naton dapat pag-isipon ang mga sala nga nahimo sa aton. Kon mangayo sila sing patawad, dapat naton sila patawaron.

Luyag ni Jesus ipakita sa iya mga disipulo kon daw ano gid ka importante ang mangin mapinatawaron. Gani sang masabat niya ang pamangkot ni Pedro, ginsugiran niya ang  iya mga disipulo sing isa ka sugilanon. Luyag mo bala pamatian ini?—

May isa anay ka maayo nga hari. Mainayuhon gid sia. Ginapahulam pa gani niya sing kuwarta ang iya mga ulipon kon nagakinahanglan sila sing bulig. Apang nag-abot ang adlaw nga nanukot ang hari. Gani, ginpatawag sa atubangan sang hari ang isa ka ulipon nga nakautang sa hari sing 60 milyones ka denario. Madamo gid ini nga kuwarta!

Apang nagasto na tanan sang ulipon ang kuwarta  sang hari amo nga indi sia makabayad. Gani nagmando ang hari nga ibaligya sia. Nagsiling man ang hari nga ibaligya ang iya asawa kag ang iya mga anak kag ang tanan nga iya. Nian, ibayad sa hari ang binaligyaan. Ano sa banta mo ang ginbatyag sang ulipon?—

Nagluhod sia sa atubangan sang hari kag nagpakitluoy: ‘Palihug, hatagi ako sing dugang pa nga tion, kag bayaran ko ikaw sang tanan nga nautang ko sa imo.’ Kon ikaw ang hari, ano ang himuon mo?— Naluoy ang hari sa iya ulipon. Gani ginpatawad sia sang hari. Ginsingganan niya ang ulipon nga indi na kinahanglan nga bayaran pa niya ang bisan pila nga kuwarta, ang bisan pila sa 60 milyones ka denario. Pat-od nga nalipay gid ang ulipon!

Apang ano ang ginhimo sini nga ulipon? Naglakat sia kag nakita niya ang isa pa ka ulipon, nga nakautang sa iya sing isa lamang ka gatos ka denario. Ginliab niya kag ginkuga ining masigkaulipon, nga nagasiling: ‘Bayari ako sing isa ka gatos ka denario nga nautang mo sa akon!’ Mahanduraw mo bala ang isa ka tawo nga nagahimo sini, ilabi na sa tapos mapatawad sang hari sa daku nga kuwarta nga nautang niya?—

Bueno, ang ulipon nga nakautang sing isa lamang ka gatos ka denario imol gid. Wala pa sia sing inugbayad. Gani naghapa sia sa tiilan sang iya masigkaulipon kag nagpakitluoy: ‘Palihug, hatagi ako sing dugang pa nga tion, kag bayaran ko ikaw sang nautang ko sa imo.’ Ginhatagan bala sini nga tawo ang iya masigkaulipon sing plaso?— Ano ang himuon mo?—

Ini nga tawo indi kaangay sang hari nga mainayuhon. Luyag niya nga bayaran sia dayon. Kag bangod indi sia mabayaran sang iya masigkaulipon, ginpabilanggo niya ini. Nakita sang iban nga mga ulipon ang tanan nga natabo, kag wala nila ini maluyagi. Naluoy sila sa ulipon nga ginbilanggo. Gani naglakat sila kag ginsugid ini sa hari.

Wala man maluyagi sang hari ang natabo. Naakig gid sia sa indi mapinatawaron nga ulipon. Gani ginpatawag niya sia kag ginsilingan: ‘Ikaw  nga malain nga ulipon, indi bala nga ginpatawad ko ikaw sa nautang mo sa akon? Indi bala nga dapat ginpatawad mo man ang imo masigkaulipon?’

Dapat nakatuon ang indi mapinatawaron nga ulipon sing leksion gikan sa maayo nga hari. Apang wala sia manuto. Gani ginpabilanggo sang hari ini nga ulipon tubtob mabayaran niya ang 60 milyones ka denario. Kag, sa pagkamatuod, samtang sa sulod sia sang bilangguan indi gid sia makatigayon sing kuwarta nga inugbayad sa hari. Gani magapabilin sia diri tubtob mapatay sia.

Sa paghingapos ni Jesus sang iya sugilanon, ginsilingan niya ang iya mga sumulunod: “Sa amo man nga paagi ang akon langitnon nga Amay magapakig-angot man sa inyo kon indi kamo magpatawad sing tinagipusuon, ang kada isa sa iya utod.”—Mateo 18:21-35.

Dapat mahangpan mo nga kita tanan may daku nga utang sa Dios. Sa katunayan, ang aton mismo kabuhi naghalin sa Dios! Gani kon ipaanggid  sa utang naton sa Dios, diutay lamang ang utang sang iban nga tawo sa aton. Ang ila utang sa aton daw subong lamang sang isa ka gatos ka denario nga nautang sang isa ka ulipon sa iya masigkaulipon. Apang ang nautang naton sa Dios bangod sang aton madamo nga mga sala daw kaangay sang 60 milyones ka denario nga nautang sang isa ka ulipon sa hari.

Ang Dios tuman ka mainayuhon. Bisan pa nakahimo kita sing malain, ginapatawad niya kita. Wala niya kita ginasukot paagi sa pagkuha sang aton kabuhi tubtob sa walay katubtuban. Apang amo ini ang leksion nga dapat naton tandaan: Patawaron lamang kita sang Dios kon patawaron man naton ang mga tawo nga makasala sa aton. Indi bala isa ini ka importante nga leksion nga dapat hunahunaon?—

Gani kon may makahimo sa imo sing butang nga indi maayo apang mangayo sia sing patawad, ano ang himuon mo? Patawaron mo bala sia?— Ano kon matabo ini sing madamo nga beses? Patawaron mo bala sia gihapon?—

Kon kita ang nagapangayo sing patawad, luyag gid naton nga patawaron kita sang isa ka tawo, indi bala?— Gani dapat nga amo man ang himuon naton sa iya. Indi lamang dapat kita magsiling nga ginapatawad naton sia kundi dapat gid naton sia patawaron sing tinagipusuon. Kon himuon naton ini, ginapakita naton nga luyag gid naton nga mangin mga sumulunod sang Daku nga Manunudlo.