ADDA kadin nakaaramid kenka iti di nasayaat?— Nadangrannaka kadi wenno napagsawannaka iti nasakit?— Rumbeng aya nga ibalesmo ti inaramidna kenka?—

Adu ti tattao a no madangranda, kayatda ti agibales iti nangdangran kadakuada. Ngem insuro ni Jesus a pakawanentayo koma dagidiay nakabasol kadatayo. (Mateo 6:12) Ania ngay no mamin-adu nga agbasol kadatayo ti maysa a tao? Mamin-ano a pakawanentayo?—

Dayta idi ti kayat a maammuan ni Pedro. Isu nga iti maysa nga aldaw, dinamagna ken Jesus: ‘Masapul kadi a pakawanek agingga iti mamimpito?’ Ngem saan nga umdas ti mamimpito. Kinuna ni Jesus: ‘Masapul a pakawanem agingga iti mamimpitopulo ket pito’ no kasta ti kaadu ti basol kenka dayta a tao.

Nakaad-adu dayta! Saantay pay ketdin a malagip ti kasta kaadu a nagbasolan kadatayo ti maysa a tao, di ngamin? Kastoy ti kayat nga isuro kadatayo ni Jesus: Saantayo koma a lagipen ti kaadu ti nagbasolan kadatayo dagiti sabsabali. No dumawatda iti pammakawan, pakawanentayo koma ida.

Kayat nga ipakita ni Jesus kadagiti adalanna no kasano kapateg ti  mamakawan. Isu a kalpasan a sinungbatanna ti saludsod ni Pedro, adda inestoriana kadagiti adalanna. Kayatmo kadi a maammuan dayta?—

Adda maysa a nakasaysayaat nga ari. Pautanganna pay dagiti adipenna iti kuarta no kasapulanda ti tulong. Ngem dimteng ti aldaw a kayat ti ari a bayadanen dagiti adipenna ti kuarta nga inutangda. Gapuna, indatagda ti maysa  nga adipen a nakautang iti ari iti 60 milion a denario. Adu a kuarta dayta!

Ngem inibusen ti adipen ti kuarta ti ari ket dinan mabayadan ti utangna. Gapuna, imbilin ti ari a mailako dayta nga adipen. Kinuna pay ti ari a mailako ti asawa ken dagiti annak ti adipen ken amin a sanikuana. Iti kasta, maibayad amin iti ari dagiti paglakuan. Panagkunam, ania ti narikna ti adipen?—

Nagparintumeng iti sanguanan ti ari ket nagpakpakaasi: ‘Pangngaasim, ikannak pay iti gundaway, ket bayadakto amin nga utangko kenka.’ No sika koma ti ari, ania koma ti inaramidmo iti adipen?— Naasian ti ari iti adipenna. Gapuna, pinakawan ti ari. Kinunana iti adipen a saanen a kasapulan a bayadanna ti uray maysa laeng kadagiti 60 milion a denario. Sigurado a naragsakan unay dayta nga adipen!

Ngem kalpasanna, ania ti inaramid dayta nga adipen? Rimmuar ket nasarakanna ti sabali pay nga adipen a nakautang kenkuana iti sangagasut laeng a denario. Ginammatanna daytoy padana nga adipen sana binekkel, a kunkunana: ‘Bayadam ti sangagasut a denario nga inutangmo kaniak!’ Agasem dayta! Kasta kadi ti masapul nga aramidenna kalpasan a pinakawan ti ari ti nakaad-adu nga utangna?—

Napanglaw ti adipen a nakautang iti sangagasut laeng a denario. Dina mabayadan a dagus dayta. Gapuna, nagparintumeng iti sanguanan ti padana nga adipen ket nagpakpakaasi: ‘Pangngaasim, ikkannak pay iti gundaway, ket bayadakto ti utangko kenka.’ Rumbeng aya nga inikkanna pay koma iti gundaway ti padana nga adipen?— Ania koma ti inaramidmo?—

Saan a kas iti ari, awan asina daytoy a tao. Kayatna a mabayadan a dagus ti kuartana. Ket gapu ta saan a makabayad ti padana nga adipen, impaibaludna dayta. Nakita dagiti dadduma nga adipen daytoy a  pasamak, ket nakapungtotda. Naasianda iti adipen a naibalud. Gapuna, impulongda dayta iti ari.

Nakapungtot met ti ari. Napalalo ti pungtotna iti awan asina nga adipen. Gapuna, pinaayaban ti ari ket kinunana: ‘Dakes nga adipen, saan aya a pinakawanko ti utangmo kaniak? Gapuna, saan aya a rumbeng a pinakawanmo met koma ti padam nga adipen?’

Rumbeng a nakasursuro koman iti leksion manipud iti nasayaat nga ari dayta nga awanan asi nga adipen. Ngem saan a nakasursuro. Gapuna, impaibalud ti ari dayta nga adipen agingga a mabayadanna ti 60 milion a denario. Siempre, saan a pulos a makaurnong iti kuarta a pagbayadna iti ari bayat a sibabalud. Isu nga agtalinaed sadiay agingga a matay.

Kalpasan a maestoria daytoy ni Jesus, kinunana kadagiti pasurotna: “Iti kasta met laeng a pamay-an makilangento kadakayo ti nailangitan nga Amak no saankayo a mangpakawan tunggal maysa iti kabsatna manipud iti puspusoyo.”​​—Mateo 18:21-​35.

 Laglagipem a nakaad-adu ti utangtayo iti Dios. Kinapudnona, ti Dios ti nangted iti mismo a biagtayo! Isu a no idiligtayo ti utangtayo iti Dios, bassit laeng ti utang kadatayo dagiti sabsabali. Ti utangda kadatayo ket mayasping iti sangagasut a denario nga utang ti maysa nga adipen iti padana nga adipen. Ngem ti utangtayo iti Dios gapu iti basbasoltayo ket mayasping iti 60 milion a denario nga utang ti adipen iti ari.

Naasi unay ti Dios. Nupay adu ti basoltayo, pakawanennatayo. Saannatayo a singiren babaen ti panangikkatna nga agnanayon iti biagtayo. Ngem daytoy ti leksion a masapul a laglagipentayo: Pakawanennatayo laeng ti Dios no pakawanentayo dagiti nakabasol kadatayo. Napateg dayta a leksion, di ngamin?—

Isu a no adda nakabasol kenka ngem kalpasanna agpadispensar, ania ti aramidem? Pakawanem kadi?— Ania ngay no namin-adu? Pakawanem kadi latta?—

No datayo ti agkidkiddaw iti pammakawan, kayattayo a pakawanennatayo ti sabali a tao, di ngamin?— Kasta met koma ngarud ti aramidentayo kenkuana. Saantayo koma a basta ibaga a pakawanentayo, no di ket talaga koma a naimpusuan ti pammakawantayo kenkuana. No aramidentayo dayta, ipakpakitatayo a talaga a kayattayo ti agbalin a pasurot ti Naindaklan a Mannursuro.