KAPU 14

Sambu na Nki Beto Fwe Lolulaka

KETI muntu mesalaka nge dezia kima ya mbi?— Keti yandi salaka kima mosi ya kupesaka nge mpasi na ntima to yandi tubilaka nge dyambu mosi ya mbi?— Keti nge mpi fwe sala yandi mbi mutindu yandi salaka nge?—

Bantu mingi kevutulaka mbela na bantu yina kesalaka bo mbi. Kansi Yezu kulongaka nde beto fwe lolulaka bayina kesalaka beto mbi. (Matayo 6:12) Inki beto tasala kana muntu mesala beto mbi mbala mingi? Mbala ikwa beto fwe lolula yandi?—

Piere zolaka kubaka mvutu na ngyufula yai. Yo yina kilumbu mosi yandi yulaka Yezu nde: ‘Keti mu fwe lolula yandi mbala nsambwadi?’ Kansi mbala nsambwadi mefwana ve. Yezu kutubaka nde kana muntu kesala nge mbi mbala mingi, ‘Nge fwe lolula yandi mbala makumi nsambwadi na nsambwadi.’

Bambala mingi mpenza! Yo ke monana pwelele nde beto takukaka nkutu ve kuyibuka mambu mingi ya mbi yina muntu tasalaka beto, mpidina ve? Dyambu yai ya beto mekatuka kutuba kemonisa nde Yezu zolaka kulonga beto dilongi yai: Beto fwe sosaka ve kutanga bambala ya bantu yankaka kesala beto mbi. Kana bo melomba beto na kulolula bo, beto fwe lolula bo.

Yezu zolaka kusonga balongoki na yandi nde kulolula ke mfunu mingi mpenza. Yo yina na nima ya kupesa mvutu na ngyufula ya Piere, yandi telaka balongoki na yandi disolo mosi. Keti nge kezola kuwa yo?—

 Kuvandaka ti ntotila mosi ya mbote na ntangu ya ntama. Yandi vandaka ntotila ya mbote mpenza. Yandi vandaka kudefisa nkutu bampika na yandi mbongo ntangu bo vandaka na mfunu ya lusadisu. Kansi kilumbu mosi, ntotila kuzolaka nde bampika na yandi kuvutudila yandi mbongo yina ya bo defaka. Ebuna bo natilaka ntotila mpika mosi yina kuvandaka ti mfuka na yandi ya bibende ya mbongo bamilio 60. Mbongo mingi mpenza!

Kansi mpika yango kusadilaka mbongo yonso ya ntotila ebuna mpila ya kufuta mfuka ya ntotila kuvandaka  dyaka ve. Yo yina ntotila kupesaka bantu na yandi ordre nde bo teka yandi. Ntotila kutubaka dyaka nde bo teka nkento na yandi, bana na yandi mpi bima na yandi yonso. Ebuna, mbongo ya bo zolaka kubaka, bo zolaka kufuta mfuka ya ntotila. Nge keyindula nde mpika yina kudiwaka nki mutindu ntangu yandi waka mpidina?—

Yandi fukamaka na ntwala ya ntotila mpi yandi bondilaka nde: ‘Pardo, pesa munu mwa ntangu mingi, na nima mu tafuta mfuka na nge yonso.’ Kana nge vandaka ntotila yina, inki nge zolaka kusala mpika yina?— Ntotila kuwilaka mpika na yandi mawa. Yo yina ntotila kulolulaka yandi. Yandi tubilaka mpika yina nde yandi kufuta dyaka ve mbongo yina, ata kibende mosi ve na kati ya bamilio 60 ya bibende yina yandi zolaka kufuta. Ntembe kele ve nde mpika yina kuwaka kyese mpenza!

Kansi mpika yina kusalaka nki na nima? Yandi basikaka ebuna yandi kutanaka ti mpika yankaka, yina kuvandaka ti mfuka na yandi ya mbongo ya bibende 100 mpamba. Yandi kangaka mpika yina na mungungu mpi yandi yantikaka na kukanga yandi mpema, na kutubaka nde: ‘Futa mfuka na munu ya bibende ya mbongo 100!’ Keti nge le ndima nde muntu yai ya ntotila mekatuka kulolula mingi mpidina, yandi muntu kesala kima ya mutindu yai?—

Mpika yina kuvandaka na mfuka ya bibende ya mbongo 100 kuvandaka nsukami. Yandi vandaka ve na mbongo ya kufuta mfuka na ntangu yina. Yo yina yandi fukamaka na ntwala ya nduku na yandi ya kuvandaka mpi mpika bonso yandi sambu na kubondila yandi nde: ‘Pardo, pesa munu mwa ntangu mingi, mu tafuta mfuka na nge.’ Keti yo lombaka nde mpika yina kupesa nduku na yandi yina ya mpika mwa ntangu mingi?— Inki nge zolaka kusala na kisika na yandi?—

Muntu yai kuvandaka ve ntima ya mbote, bonso ntotila. Yandi zolaka nde bo pesa yandi mbongo na yandi kaka na ntangu yina. Ebuna sambu nduku na yandi yina ya mpika kukukaka ve na kufuta yo, yandi tulaka yandi na boloko. Bampika yankaka kumonaka mutindu mambu yonso kulutaka, mpi bo sepelaka na yo ve. Bo waka mawa sambu na mpika yina  kuvandaka na boloko. Yo yina bo kwendaka kusonga ntotila mambu yango.

Ntotila mpi kusepelaka ve na mambu yina. Yandi wilaka mpika makasi mingi mpenza sambu yandi lolulaka ve mpangi na yandi. Ebuna yandi bingaka yandi mpi yandi zabisaka yandi nde: ‘Nge mpika yai ya mbi, keti mu lolulaka nge ve sambu na mfuka na munu ya nge vandaka na yo? Keti nge le lolula ve nduku na nge?’

Mpika yina kulolulaka ve zolaka kubaka dilongi na mambu yina ntotila ya mbote kusalaka yandi. Kansi yandi salaka yo ve. Yo yina, ntotila kutulaka mpika yina na boloko tii kuna ya yandi tafuta mfuka yina ya bibende ya mbongo bamilio 60. Ntembe kele ve nde, na kati ya boloko yandi lendaka ve ata fyoti kuzwa mbongo ya kufuta ntotila. Disongidila, yandi zolaka kubikala na boloko tii kuna ya yandi tafwa.

Ntangu Yezu kumanisaka na kuta disolo yai, yandi tubilaka balongoki na yandi nde: “Tata na mono kele na zulu ta sala beno mutindu mosi mpi, kana muntu kubikila mpangi na yandi ya nkaka mfuka ve na ntima yonso.”—Matayo 18:21-35.

 Nge fwe bakisa nde beto yonso kele ti mfuka mingi mpenza ya Nzambi. Ya kyeleka, luzingu na beto katukaka na Nzambi! Yo yina, kana beto fwanisa mfuka yina ya beto kele na yo na ntwala ya Nzambi ti mfuka na beto yina bantu yankaka kele na yo, beto kemona nde mfuka na beto yina bantu yankaka kele na yo ke fyoti. Mfuka na beto yina bo ke na yo ke bonso mfuka ya bibende ya mbongo 100 ya mpika yina zolaka kufuta mpangi na yandi. Kansi, mfuka ya Nzambi yina beto ke na yo sambu na mambu ya mbi yina beto kesalaka, kele bonso mfuka ya bamilio 60 ya bibende ya mbongo yina mpika zolaka kufuta na ntotila.

Nzambi ke ntima ya mbote mpenza. Ata beto mesalaka mambu ya mbi, yandi kelolulaka beto. Yandi kefwaka beto ve kimakulu sambu na kufutisa beto mfuka. Kansi dilongi ya beto fwe baka ke yai: Nzambi kelolulaka beto kaka kana beto kelolula bantu yina kesalaka beto mbi. Dilongi yai ke mfunu mingi mpenza, mpidina ve?—

Yo yina kana muntu mesala nge kima mosi ya mbi, na nima yandi lomba nge ndolula, inki nge tasala? Keti nge talolula yandi?— Inki nge tasala kana yandi kesala yo mbala mingi? Keti nge talolulaka yandi kaka?—

Kana beto bantu kelomba ndolula na muntu yankaka, beto tazola nde yandi lolula beto, mpidina ve?— Yo yina, beto fwe sala yandi mpi mutindu mosi. Beto fwe tuba kaka ve na munoko nde beto melolula yandi, kansi beto fwe lolula yandi mpenza na ntima na beto. Kana beto mesala yo, beto tamonisa nde beto kezola mpenza kuvanda balongoki ya Longi ya Nene.

Sambu na kubakisa mfunu ya kulolula, beto tanga mpi Bingana 19:11; Matayo 6:14, 15; mpi Luka 17:3, 4.

[Kifwanisu ya kele na lutiti 77]

Inki Piere zolaka kuzaba sambu na yina metala kulolula?

[Kifwanisu ya kele na lutiti 78]

Inki ntotila kusalaka ntangu mpika kulombaka ntangu mingi sambu na kufuta mfuka?

[Bifwanisu ya kele na lutiti 78]

Inki mambu mpika kusalaka mpangi na yandi mpika yina kukukaka ve kufuta mfuka na yandi?

[Kifwanisu ya kele na lutiti 80]

Inki mambu ntotila kusalaka mpika yina kulolulaka ve?

[Kifwanisu ya kele na lutiti 81]

Inki nge tasala kana muntu kulomba nge na kulolula yandi?