ARLAANNIT ajortumik pineqarnikuuit? — Immaqa taassuma annersippaatit imaluunniit ajortumik oqarfigaatit? — Taama pineqaruit, taava taamaaqataanik akissaviuk? —

Amerlasuut ingerlaannaq akiniaasarput. Assersuutigalugu arlaannit annersinneqarunik ingerlaannaq akisisarput. Jiisusilli ilinniartippaatigut uagutsinnut ajortuliortut isumakkeerfigisassagivut. (Matthæusi 6:12) Aamma taamaaliortassaagut arlaleriarluta ajortumik pineqarutta? — Qasseriarluta allat isumakkeerfigisassagatsigit? —

Tamanna Petrusip aamma paaserusussimavaa, taamaattumillu ullut ilaanni Jiisusi ima aperaa: ‘Arfineq-marloriarlunga allaat isumakkeerfiginnissaanga?’ Petrusi isumaqaraluarpoq arfineq-marloriarluni isumakkeerfiginninneq ingasappallaartoq, arfinerli-marluk naammanngivipput. Jiisusi oqarpoq arlaannit 77-eriarluni ajortuliorfigineqaruni 77-eriarluni isumakkeerfigissagaa.

Ila amerlaqaat! Ajuallatsitsinerit taama amerlatigisut kisissagaluarutsigik piffissap ingerlanerani qassimut killissimanerluta puiorsimassagipput ilimanarpoq, ilaa? Tamatuminngarpiaruna Jiisusip ilinniartinniaraatigut: Allat uagutsinnut ajortuliorneri eqqaamaniarsarissanngilavut.  Isumakkeerfigeqquppata isumakkeerfigissavavut.

Jiisusip ajoqersukkat paasitikkusuppai isumakkeerfiginnittarnissaq qanoq pingaaruteqartigisoq. Petrusip apeqqutaa akereeramiuk ajoqersukkani oqaluttuamik oqaluttuuppai. Taanna tusarusuppiuk? — Imaappoq:

Ilaannigooq ajunngitsumik kunngeqarpoq. Ima ajunngitsigalunilu pitsaatigaaq allaat kiffani aningaasanik  amigaateqaleraangata atukkittarlugit. Ullulli ilaanni aningaasatini uterterusulerpai. Kiffaasa ilaat kunngimut aningaasanik sølvinik 60 millioninik akiligassaqarpoq. Aningaasarpassuuppullu!

Kiffalli taassuma kunngip atukkiussai tamaasa atoreersimavai, taarsersinnaanagillu. Taava kunngi aalajangerpoq kiffaq taanna nulialu meeraalu piilu tamaasa tuniniarneqassasut. Aningaasat tunisinermi isertitat kunngip pissagai. Kiffap tamanna paasigamiuk qanoq misigisimassasoraajuk? —

Kiffaq kunngip saanut seeqqummerpoq qinnuigalugulu: ‘Kamagittarlutit pinnga, taava atukkiussatit tamaasa taarserumaarpakka.’ Illit kunngiusimasuugaluaruit kiffaq susimassagaluarpiuk? — Kunngip kiffaq naakkigingaalerpaa akiligassaanillu isumakkeerfigalugu. Ima oqarpoq: ‘Aningaasat sølvit 60 millionit taakkua ilaannaalluunniit akilertariaqanngilatit.’ Kiffaq taanna pilluarsimassaqaaq!

Kiffarli qanoq iliorpa? Anivoq kiffaqatinilu aningaasanik sølvinik 100-innarnik akiitsulik ornillugu. Toqqusassillugulu oqarfigaa: ‘Aningaasat sølvit 100-t taarsigassatit akilikkit!’ Takorluulaariaruk kiffaq taamaaliortoq uffa aatsaaginnaq nammineq kunngimit akiitsorpassuarminik isumakkeerfigineqareersimagaluarluni!

Kiffaq taanna aningaasanik sølvinik 100-nik akiitsulik piitsuuvoq akiitsunilu ingerlaannaq taarsersinnaanagit. Kiffaqatini pallorfigaa qinnuigalugulu: ‘Kamagittarlutit pinnga, taava ilinnut akiitsukka taarserumaarpakka.’ Kiffap kiffaqatini kamagittarluni piffissalissanerpaa? — Illit qanoq iliorsimassagaluarpit? —

Kiffaq taanna inussiarnersuunngilaq, kunngitut inngilaq. Aningaasaatini massakkorluinnaq perusuppai. Kiffaqatinilu akiliisinnaanngimmat parnaarussaatippaa. Kiffat allat tamanna takuaat, iluarinagulu. Kiffaqatertik parnaarussaatinneqartoq naakkigaat, kunngilu ornippaat pisimasumik oqaluttuukkiartorlugu.

 Kunngittaaq tamanna iluarinngilluinnarpaa. Kiffarlu, kiffaqatini asanninngitsumik iliorfigisimammagu, kamaatingaalerpaa. Kunngip qaaqquaa oqarfigalugulu: ‘Kiffaq ajortoraa, akiitsunnik tamanik isumakkeerfigeriinnginnerpakkit? Illittaaq kiffaqatit naakkigisariaqannginnerpiuk?’

Kiffap naakkittaatsup kunngi ajunngitsoq ilinniarfigisimasariaqaraluarpaa. Ilikkagaqarsimanngilarli. Taava kunngip kiffaq taanna parnaarussaatippaa, tassaniittuartariaqarporlu aningaasat sølvit 60 millionit tamaasa taarsernissaasa tungaanut. Kisianni soorunami parnaarussivimmi aningaasanik katersisinnaanngilaq, taamaattumillu toqunissami tungaanut tassaniittariaqarpoq.

Jiisusip oqaluttuani naagamiuk ajoqersukkani ima oqarfigai: “Taamatuttaaq Ataatama qilammiittup ilarsi kinaluunniit pissavaa qatanngutini uummatimigut isumakkeerfiginngippagu.” — Matthæusi 18:21-35

 Tamatta Guutimut akiitsorpassuaqarpugut. Allaammi inuunerput Guutimit tunissutisiaraarput! Taamaammat Guutimut akiitsorpassuavut sanilliukkutsigit inuit uagutsinnut akiitsoqarpallaanngillat. Allat uagutsinnut akiitsui kiffap aningaasanik sølvinik 100-nik kiffaqatiminut akiitsui assigiinnarpaat. Uagulli Guutimut akiitsoqarpugut kukkusaratta kukkunivullu aningaasanut sølvinut 60 millioninut kiffap kunngiminut akiitsuinut assersuunneqarsinnaapput.

Guuti naakkinnittorujussuuvoq. Naak ajortuliortaraluartugut isumakkeerfigisarpaatigut. Piumasarinngilaa akiitsuvut naassaanngitsumut inuunitta akigineratigut akilissagivut. Ilinniagassarpulli tassaavoq Jehovap isumakkeerfigissagaatigut aatsaat uagutsinnut ajortuliorsimasut isumakkeerfigigutsigit. Tamanna uagutsinnut eqqarsaatissiivoq, ilaa? —

Arlaata ajortumik iliorfigippatit kingornali peqqissimissutigalugulu utoqqatserfigippatit taava qanoq iliussavit? Isumakkeerfigissaviuk? — Arlaleriarlunilu taama pisoqarpat taava suli isumakkeerfigerusussaviuk? —

Uagut allamut utoqqatserutta nuannaarutigissavarput taassuma isumakkeerfigippatigut, ilaa? — Taamaattumik uaguttaaq allat isumakkeerfigisariaqarpavut. Oqaannassanngilagullu isumakkeerfigalugu, qamuunali eqqarsaatitsigullu isumakkeerfigissavarput. Taamaaliorutta takutissavarput ilumut Ajoqersuisorsuarmut ajoqersugaarusulluta.